¹ Bè yóm igò le Pitér ne Jan tolo mudél ebè yó kem tau deng stifun bè yó lem Gónô Dwata, sut bélê le yó kem tau gel demsù ebè Dwata, mung kul yóm kefitan bè yó kem tau ge mentey bè Gónô Dwata, ne wen se bè yó kem Sadyusi. ² Ya tey kekelit le du yóm ketolok le Pitér, abay se yó ge tulón le yóm deng bud klowil Jisas. Ne bè yóm deng bud klowilen yó, yó se hol gónó le temngón du yóm angat bud klowil yó kem dumu tau deng matay. ³ Yó gónóm mon, tódô kenfô le lu le Pitér ne sù le lu lem blanggù efet kól haya, abay se deng kimel yóm kekefô le kul. ⁴ Bede tey dê bè yó kem tau deng mungol yóm ketolok le baling hemtahu. Setenù logi hemtahu gomong bè genan, wen dô limu libu kwadag le. ⁵ Timbow hayahen bè yó, gotu le stifun yó kem tau malak bè Jirusalim, dalang se yó kem tuha bélê le, ne yó kem tau gel temolok hlau. ⁶ Mung stifun bélê le Anas snéen, yóm hol geta bè yó kem tau gel demsù ebè Dwata, dalang se Kyafas ne Jan ne Aliksandér ne yó kem dumu fes lówó yóm tau hol geta yó. ⁷ Tódô hedà le Pitér lewu le Jan bè solu le, yó snólók le bélê le, mon le, “Kmò kehdà ye du nim tau tehe kihod ni? Tau du de bemlay du kuy yóm ketued ye mò du? Boluy du de gónó ye hlan du?” ⁸ Benalà Pitér lu, uma kóm yóm Tulus Dwata malak du kesumóngen, monen mò kul, “Yu kem tau gónó me ge galak, dalang se kuy kem tuha. ⁹ Ke yó snólók ye yóm ketóbóng me yóm tau tehe kihod ni, ne yóm kmò kekóhen, ¹⁰ hyu se ke tngón ye, ne hyu snéen ke tengón yó kem kdéen tau Israél. Yó gónón baling hyu nim tau tehe kihod medà bè solu ye ni, tódô lemwót bè kefasang yóm kun boluy Jisas Krays lemwót bè Nasarit. Du se yóm deng tehe hetutuk ye bè kros ne matay, okóm deng bud hlowil Dwata. ¹¹ Du se yóm gónón e gebak yóm tehe mon Dwata bè sulaten, yóm monen, ‘Wen botu deng senkebê yó kem tau hemdà gónô, ofo kul ke laen dù muhen. Anì monem tek sónen yó se yóm botu mò hembegel du yóm gónô hedà le.’ ¹² Duhen yó,” mon Pitér, “Tek són Jisas gembek lemwà tekuy gu lem hatay. Laen kô dù dumu tau talak tonok ke gónó Dwata helan du yóm kegewà tekuy, tek són Jisas.” ¹³ Ya tey ketenga yó kem tau hol geta mogot kukum yóm keton le laen dù klikò le Pitér ne Jan, ne yóm ketengón le du olo le kem tau hekawang, laen dù hennagì le. Bud getulón bè nawa le yó kem lewu tau yó, lu se yóm tehe gel slomong ke Jisas. ¹⁴ Tô senkebê le yóm tulón le, okóm laen dù gemò le, abay se eles medà bè yó lohok Pitér ne Jan yóm tau tehe kihod. ¹⁵ Ne le ne hefewà le Pitér bè yóm defél gónó le kemukum kul yó anì ne le stulón són lu yó kem tau mogot kukum. ¹⁶ Yó mon le, “Kemò atul tekuy kul ni kem tau ni? Là kô gebek tekuy hemkéng du yóm hentaw ton deng nemò le, abay se tódô kdéen tau bè ni bè Jirusalim gotu temngón du. ¹⁷ Yake olo tekuy tódô hedelà mólów ku anì là bud tulón le du yóm boluy Jisas balù kihu tau, anì là senflósen meból yóm ge tolok le ni.” ¹⁸ Timbow deng kestulón le, omin le bud hetaba kul le Pitér elemen. Yó mon le mò kul, “Tódô henotok ye ne ni yóm ktolok ye du yóm boluy Jisas.” ¹⁹ Okóm benalà Pitér ne Jan lu, mon le, “Bè kuy kemò kehedem du, mahi du hyu bè keton Dwata kum, ke nimón me yu duhen ke Dwata? ²⁰ Là kô gbek me du hemotok temulón du yóm deng ton me ne yóm deng gungol me.” ²¹ Okóm yó kem tau mogot kukum, mem temnu kebólów le kul bè yóm ketolok le, omin le tódô hefewà kul. Là melos le temafak kul, abay se tey dê tau dmóyón ke Dwata lemwót bè yóm deng kehyu yóm tau kihod. ²² Yóm tau kihod yó, deng mukas fat folò halayen ne kegenen tau. ²³ Bè yóm deng kegewà le Pitér bè yó lewu le Jan, mulék le ebè yó kem dumu le hemtahu. Gotu tulón le kul yóm udél le ebélê le yó kem geta ge demsù ebè Dwata ne yó kem tuha gónó le ge galak. ²⁴ Timbow deng gungol yó kem tau hemtahu, omin le gotu meni bè Dwata, mon le, “Ó Dwata, uu se tehe demimun yóm longit ne tonok ne mohin ne kedéen ton. ²⁵ Deng wen tehe hemonem yóm fù me Dabid teganay, yóm sotu tehe tauhem, tehe hlanem bè yóm Tulusem, yóm monen, ‘Moen de ke kat sidek kebut yó kem tau là Ju le? Moen de ke kat dê gel natul le,yóm atul laen dù gónón e gefet? ²⁶ Gotu le setifun yó kem tau hol geta mogot benwu, ne deng gotu sogot atul le. Tô natù le Dwata, ne tô natù le senéen yóm Misaya. ²⁷ Yó tendoken yóm tehe udél Dabid yó, duhen yóm lomi kestifun le bè nim benwu ni le Hirod ne Puntyus Paylét, mung ku yó kem tau là ju le dalang se yó kem yu. Ku atul yóm kehatay le ke Jisas, yóm tau tóbóng lówóhem laen kô belenen deng hógówem elem belóng me, yóm Misaya tehe nélékem. ²⁸ Bè yóm kesesatu le du yóm yó, Dwata, ne yóm kedê nemò le bè Jisas, yó se deng gónón dohò yóm deng tehe oluhem du, deng helanem bè kóm kóyô ne kóm kefasang. ²⁹ Ne ni, Dwata, hol henungolem yóm tey kifis le kum. Hol ten gelem mi kem kóm tau, anì là likò me temulón du yóm kóm tulón. ³⁰ Hol hegefanem bélê le yóm kóm kefagang hekó des, ne hol nomoem yó kem dumu hentaw ton gel nomoem helanem bè boluy Jisas, yóm tóbóng lówóhem, yóm laen dù belenen.” ³¹ Kogo yóm keni le, tódô hesinsig Dwata yóm gónô gónó le nô, ne ominen bud hemsù du bè kedê le yóm Tulusen. Ne tódô nbut le bè yó temulón du yóm deng tulón Dwata ku, ne laen dù bud kelikò le mò du. ³² Tey tilob kessotu nawa le yó kem tau hemtahu bè Jisas. Balù yó kem kimu le, laen kô metuku mefun du bélê le. Ke wen bélê le wen gónón élé, tódô sentóbóng le. ³³ Ne tey wen kefasang blay Dwata ku yó kem hógów Jisas bè yóm ge ketulón le du yóm deng bud klowil Jisas yóm gónó le mogot. Ne tódô seflós yóm tey ketóbóng Dwata ku yóm kedéen tau hemtahu bè Jisas. ³⁴ Balù sotu bélê le ke wen gónó le élé. Abay se wen bélê le, gelok le hembalù tonok le duhen ke gónô le. Lemwót yóm belihen, ³⁵ belay le yó kem hógów Jisas anì lu fen gel móló du ke wen bélê le wen gónón élé. ³⁶ Duhen yó, wen sotu tau lemwót bè Siprus boluyen Jusif, tau semfu gu bè yóm tehe Libay. Yó iba le du yó kem hógów Jisas, Barnabas (yó lanen yóm boluy yó, hulung semgduf). ³⁷ Yó nmò nim Barnabas ni, hbaluen tonoken. Lemwót yóm belihen, tódô hensulék belayen bè yó kem hógów Jisas