¹ Omin Pol lemwót bè yó bè Atin, mógów ebè syudad Kurin. ² Bè yóm kkólen bè Kudin, bè yó gónó le mbut sdilô yóm sotu Ju boluyen Akila, tau tehe lemwót bè prubinsya Pontus. Lomi le kól gu bè benwu Itali lewu le Prisila, yóm tuha libunen, abay se wen udin lemwót bè Klodyus, yóm tau hol geta bè yó. Yó udinen, kdê yó kem Ju nô bè syudad Rom, gotu hdó le lu. Lemwót Pol, nauyen le Akila. ³ Na tódô hlós temnù bélê le Pol, abay se senged kul hulung mò nmò bè kulit ógóf. ⁴ Tódô ket bè yóm Kdaw Kehegnô, gel mógów Pol ebè yóm gónó le gel stifun yó kem Ju, lelen gel mit kul stulón. Tô gel hdilóen yó kem Ju ne yó kem Grik bè yó yóm ktahu yóm gel tulónen. ⁵ Timbow gdek le Silas lewu le Timuti gu bè prubinsya Masdunya, són yó ne nmò Pol, són hetngón bè yó kem Ju yóm tulón nwiten, duhen Jisas se yóm Misaya. ⁶ Okóm là dog mom hentahu le du, ne tey sidek gel kudel le ebéléen. Yó nmò Pol, kenfungen nesen, ne monen mò kul, “Laen dù dou du ne ke bang Dwata tmafak kuy. Tódô ebè yó ne kem tau là Ju le gónóhu e tmolok.” ⁷ Tahu se, kewót Pol bè yó, mili elem gónô Tirtyus Justus, sotu tau là Juhen deng hemtahu bè Dwata. Yóm gónô Tirtyus yó, mdà lohok yóm gónó le gel stifun yó kem Ju. ⁸ Ne yóm tau gel malak bè yóm gónó le gel stifun yó, boluyen Krispus, deng baling hemtahu bè Jisas ne kun, dalang se yó kem fes lówóhen. Tey dê dumu tau bè Kurin hmungol du yóm tolok Pol, ne baling le hemtahu, ne hbabtays le. ⁹ Sotu kifu bè yó, tódô hegfan bè Pol Jisas ne mudél ebéléen, monen mò du, “Béi abay hlikò, Pol. Hol henlelem tmolok bè ni, béi abay htakasem. ¹⁰ Yakà tendohe gel nô béléem, laen kô tau gembek hemsidek kóm. Tolo tey wen he yó kem tau angat hemtahu béléu bè nim syudad ni.” ¹¹ Tahu se. Botong sfalay sóól ktolok Pol Udél Dwata bè yó. ¹² Tikóng deng nmò le gubérnor bè yó bè yóm prubinsya Akiya yóm sotu tau Rom boluyen Galyu, yó nmò yó kem Ju, slomong le, na le e kenfo Pol anì nit le skukum bè yóm gubérnor yó. ¹³ Mon le mò du, “Nim tau ni, gel ngóyen yó kem tau anì hmungol le udél Dwata, okóm là loloendu bè yóm hlau tekuy.” ¹⁴ Hol deng tô mudél se Pol, hebkó se Galyu, monen mò yó kem Ju, “Ke yó nmò nim tau ni, ke wen sidek nmoen duhen ke nuléhen yóm udin bè benwu ni, là hyuhen ke là knukumu du bélê ye. ¹⁵ Okóm ke yó lewót gónó ye seglius bè kem kuy udél, ne bè boluy tau, ne ke bè kem kuy hlau yu kem tau Ju, laen dù muhu hmungol du dou. Tódô kuy knukum yóm yó.” ¹⁶ Ne gotu hdóhen lu bè yó. ¹⁷ Lemwót yó kem tau là Ju le mdà bè yó, gotu sensogot le Sustinis, yóm tau malak bè gónó le gel stifun yó kem Ju, ne gotu sensuntuk le bè yó bè lewà yóm gónô gónó le gel skukum. Ton Galyu se, okóm tódô bayaen lu. ¹⁸ Timbow deng malù bud legen knô Pol lem blóng yó kem tau hemtahu bè yó bè Kurin, ominen tmagak kul, tô bud mulék ebè prubinsya Sirya. Niten Prisila ne Akila, hlós le ebè Senkeriya. Okóm gu laan le là deng lemwót bè yó, nan na hatbungaw Pol mò ilô yóm deng kdeng yóm tehe fasaden ke Dwata. Kewót le bè yó, smakay le kafal. ¹⁹ Okóm na le slob dmuung bè syudad Ifisus, ne bè yó gónó Pol tmebel ke Prisila ne Akila. Tódô hlós Pol ebè yóm kul gónó gel stifun yó kem Ju, ne niten stulón yó kem tau bè yó. ²⁰ Tey kali le ke Pol yó kem tau bè yó, kóyô le ke nan na legen udì bélê le. Okóm là hen el Pol du, mom monen mò kul, ²¹ “Ke kun kóyô Dwata, angate bud mulek dini.” Ominen bud smakay kafal lemwót bè yó bè Ifisus. ²² Timbow le dmuung bè syudad Seseriya, tódô hlós subô ebè Jirusalim Pol. Olon mbal yó kem dumuhen hemtahu bè yó, ominen bud hlós mool ebè Antyok, yóm syudad tehe gónóhen gu lemwót. ²³ Malù nan legen knóen bè yó, ominen bud na a mauy bè prubinsya Glasya ne Frigya anì hol nan na e sengduf yó kem tau hemtahu bè yó anì baling mgemel yóm kehtahu le bè Jisas. ²⁴ Bè yóm kdaw yó, gdek bè Ifisus yóm sotu tau boluyen Apulus. Du se sotu Ju lemwót bè syudad Aliksandriya. Tey tau hulung tmolok se kun, ne tey mdengen ketngónen du yóm nô lem Sulat Dwata. ²⁵ Deng tehe wen se tmolok du du yóm kun kmò klan Jisas, yóm hol gónó mogot. Tey megduf nawahen tmolok du, ne là hlinganen se yóm gel ktoloken. Okóm són olo tngónen yóm tehe kun kmò kbabtays Jan. ²⁶ Timbow kól bè Ifisus, tódô mbut tmolok bè gónó le gel stifun yó kem Ju. Balù udì ke wen klikoen. Timbow gungol Prisila ne Akila yóm ktoloken, omin le mit du ebè gónô le, ne gotu tulón le du yóm kun kmò klan Dwata, yóm là deng tngónen du he. ²⁷ Sotu kdaw bè yó, tulón Apulus yóm kóyóen mógów ebè prubinsya Akiya. Tahu se. Glok le hemwit du sulat yó kem tau hemtahu bè Ifisus anì hnódó le Apulus yó kem tau hemtahu bè Akiya sok kól ditu. Bè yóm kgefeten bè yó, tey wen gónón temgel yó kem tau deng hemtahu bè yó. Yó hol buten yóm kehtahu le, tódô lemwót bè yóm tey któbóng Dwata kul. ²⁸ Yó gónón temgel kul Apulus, lemwót bè yóm khulungen malà yó kem Ju mit du skuya mon bè gónón wen. Laen dù gmò le béléen. Tey kehdilóen du bélê le lemwót bè Udél Dwata Jisas se yóm Misaya.