¹ Sotu kdaw bè yó, wen kem Ju lemwót bè prubinsya Judiya na le e temolok bè yó kem tau hemtahu bè syudad Antyok. Yó sotu gel tolok le, men le, “Ke là lolò ye du yóm sana hlau Musis bè kehetulì, là kô ye ne e gewà gu lem hatay.” ² Bè yóm kungol le Pol ne Barnabas du yóm kul tolok yó, ya tey kekbê le du. Tey keskuya le mon le Pol ne yó kem tau tmolok yó. Bè yóm tey keskuya le mon yó, yó atul nmò yó kem tau hemtahu bè Antyok, hógów le Pol lewu le Barnabas ebè Jirusalim, ne wen se kem dumu tau hemtahu lemwót bè yó mung kul anì snólók le nim tolok senkuya le ni bè yó kem tau tehe hógów Jisas dalang se bè yó kem tuha gónó le gel galak yó kem tau hemtahu bè yó. ³ Tahu se, hewót le lu le Pol yó kem tau hemtahu bè Antyok. Bè yóm kógów le, melan le bè prubinsya Funisya ne Samarya. Ket benwu gónó le selob, gel tulón le yóm deng kehtahu le bè Dwata yó kem tau là Ju le. Ya tey kligal le yó kem tau hemtahu bè yóm kungol le du yóm tulón le ni. ⁴ Timbow le kól bè Jirusalim, tey kehódó le kul yó kem tau hemtahu bè yó, dalang se yó kem tehe hógów Jisas, kekólen bè yó kem tuha malak kul bè yó. Gotu tulón le Pol kul se yóm kdê deng nmò Dwata helanen bélê le. ⁵ Okóm wen se kem Farisi deng hemtahu bè Jisas mung bélê le. Hebkó le mdà lem blóng le, ne mon le mò kul, “Yó kem tau là Ju le deng hemtahu yó, là heyuhen ke là htulì le, ne ke là hlolò du kul yóm hlau Musis.” ⁶ Bè yóm kemon yó kem Farisi du yóm yó, gelok le gotu stifun yó kem tau tehe hógów Jisas ne yó kem dumu tuha gel malak bè yó anì sentulón le yóm mon le yó. ⁷ Timbow deng legen yóm tey kestulón le du, omin Pitér hebekó mdà lem blóng le, monen, “Ó kem dumuhu setwoli, deng tengón ye se yóm tehe kélék Dwata do lem blóng ye mò heglalag du bè yó kem tau là duhen yóm Tulón hyu anì gungol le, ne hentahu le se kul. ⁸ Tódô gotu tngón Dwata se yóm kmò kehedem tau,” men Pitér, “ne hegefanen se yóm tey kehemóyóen kul, ngem yó dém Tulusen tódô belayen kul, hol lómón se yó nem keblayen du tekuy. ⁹ Laen kô gónó Dwata semtólóng tekuy bélê le. Deng hnifóten salà le lemwót bè yóm deng kehtahu le bè Jisas. ¹⁰ Duhen yó, moen de ke tô tilów ye Dwata bè yóm belat tô hbô ye kul ni? Yóm tô hlolò ye kul, balù yó kem tehe teme tekuy tganay, là kô gbek le lemolò du kul, sélét mem tekuy ne. ¹¹ Hol bê tekuy abay bud hlolò kul yóm yó,” men Pitér. “Yó gónó tekuy gewà gu lem hatay, tódô lemwót bè yóm tey ketóbóng Jisas tekuy helanen bè yóm kehetahu tekuy béléen. Senged se yóm kul kegewà yó kem tau là Juhen.” ¹² Tódô le geteg yó kem tau hemungol du yóm udél Pitér yó. Omin le mudél se kul le Barnabas lewu le Pol. Gotu tulón le yó kem tey dê hentaw ton nmò Dwata hlanen bélê le bè yóm ktolok le lem blóng yó kem tau là Ju le. ¹³ Kogol yóm kudél le, omin Jim mudél se kun, monen, “Kem dumuhu setwoli, henungol ye yóm dou tulón kuy. ¹⁴ Deng tulón Simun tekuy koni yóm tanay kehegfan Dwata du yóm tey nawahen ebè yó kem tau là Ju le, deng wen se bélê le henbalingen kem kun tau. ¹⁵ Kaem ni se gónón e temnef yóm tehe men Dwata bè sulaten, hlanen bè yó kem gena tugoden tganay, yóm monen, ¹⁶ ‘Kogol nim ni, men Dwata, engete bud semfulék, ne angat bud henomihu yóm tehe kun kogot Dabid anì bud hol mbegel. ¹⁷ Enget gotu henebel le ou snéen kdê yó kem dumu tau te tonok, yó kem tau là Ju le,abay se deng tnabahu lu se kul mò dou tau. ¹⁸ Ni se udél Dwata. Tehe yu ne teganay eles kehetngónen du nim ni.’ ¹⁹ Duhen yó,” men Jim, “bè dou kmò kehedem du, béen dê tô hlolò tekuy kul yó kem tau là Juhen deng hemtahu bè Dwata. ²⁰ Olo tekuy tódô semulat ebélê le ne. Tulón tekuy kul heyu ke hol bê le abay ken yóm deng dsù ebè dwata kéng, yóm là mólósen bè helau tekuy. Hol bê le abay mò samuk. Hol bê le abay ken yóm utón là deng kó le du litóen, dalang se yóm litô, hol bê le abay ken. ²¹ Yakà ni du se yó kem hlau Musis tendo gel senfala le bè ket benwu lemwót bè kebuten efet nim kmoen ni. Tódô ket kestifun le bè Kdaw Kehegnô, sel gel wen temolok du ni kem hlau monu ni.” ²² Tahu se, tódô gotu kemotuk yó kem tehe hógów Jisas yóm mon Jim yó, dalang se yó kem tuha gel malak bè yó, kekólen bè kdéen tau hemtahu bè Jisas bè yóm benwu yó. Gloken wen lewu tau nélék le mò mung kul le Pol ne Barnabas ebè Antyok, hono kem tau nadat yó kem dumu le hemtahu bè yó. Yó nélék le Judas, yóm gel bnoluy le Barsabas, ne Silas. ²³ Ne wen sulat hwit le kul etu. Yó monen lem yóm sulat, monen, “Nim sulat ni, lemwót bélê me kem tau tehe nélék Jisas, ne bélê me kem tuha gel malak bè ni, hono kem kuy dumu setwoli. Hwit me ebélê ye yu kem tau là Ju le bè syudad Antyok ne bè prubinsya Sirya ne Silisya, deng tekuy baling setwoli lemwót bè kehtahu tekuy. ²⁴ Gungol me yóm tey kesbeweg ye bè yó lanen wen tau tmolok bélê ye lemwót dini bélê me, okóm là kô tngón me du yóm kul nmò yó. ²⁵ Yó gónóm mon, deng me gotu stifun, ne deng wen lewu tau nélék me mò hógów me edyó bélê ye. Hmung me kul le Barnabas ne Pol, kem tau dumu me sogot nawa. ²⁶ Là kô nali le du ne yóm kul klowil lan le hetotol du boluy Jisas Krays yóm gónó tekuy mogot. ²⁷ Yó gónó me hógów ke Judas ne Silas edyó bélê ye mò fen mulit du bélê ye yóm deng mon me mò kuy lem sulat. ²⁸ Bong bè yóm snólók ye bélê me, ni se deng kessotu kestulón me du mlan bè yóm Tulus Dwata. Hendem me là hyuhen ke alì dê hlolò me kuy. Olon ni dii mò lolò ye. ²⁹ Bê ye abay ken yóm deng dsù ebè dwata kéng. Bê ye abay ken yóm litô. Ne yóm utón là deng kó du litóen, bê ye abay ken. Ne bê ye abay mò samuk. Tey bong kehyuhen bélê ye ke lolò ye ni kem ni. Sónen ni ne tulón me kuy.” ³⁰ Timbow deng ksulat le, omin le hewót kul le Pol. Bè yóm kgefet le bè Antyok, gotu sentifun le yó kem tau hemtahu bè yó, ne blay le kul yóm sulat. ³¹ Bè yóm kesfala le du, tey kehligal le bè yóm udél nô lemen, hono kem udél gemduf kul bè kehtahu le. ³² Tey kegen le Judas lewu le Silas mudél ebélê le. Tey wen gónó le gemtobong kul ne temgel kul bè kehtahu le. Yóm Judas lewu le Silas, tau le tugod Dwata se kul. Timbow le deng malù legen udì bè yó, omin le bud mulék ebè yó kem tau tehe hógów kul. Bè yóm kewót le, ya tey kenek nawa le yóm kdê le. ³³ Okóm yó kun hendem Silas, hyu ke nen tebel. ³⁴ - ³⁵ Bong ke Pol lewu le Barnabas, malù le legen bè Antyok se kul, na le e tnóbóng yó kem dumu tau tmolok bè yó. Tey le wen yó kem tau tmolok yóm udél Dwata. ³⁶ Sotu kdaw bè yó, mon Pol mò ke Barnabas, “Yake na te bud nauy lu yó kem dumu te setwoli bè ket benwu tehe gónó te tmolok yóm udél Dwata anì na te bud tenngel lu ke tedu mò kmoen yóm kehtahu le.” ³⁷ Ne yó kun kóyô Barnabas ke bud mung kul Jan Mark. ³⁸ Okóm là móyóen Pol, abay se lemwót bè yóm tehe le ktagak Mark kul bè Pamfilya igoen là deng deng yóm nmò le. ³⁹ Botong le sewis Pol Barnabas, hlós là bud le slomong. Lemwót Barnabas, niten Mark, smakay le kafal ebè Siprus. ⁴⁰ Lemwót ke Pol, niten Silas. Bè yóm kewót le, yó kem tau hemtahu bè yó fen mni bélê le bè Dwata anì du fen semgyok kul bè yóm kógów le. ⁴¹ Tahu se, lemwót le, mógów le ebè prubinsya Sirya ne Silisya, ten gel le kehtahu yó kem tau hemtahu bè Jisas bè yó.