¹ Bè yóm syudad Seseriya, wen sotu tau boluyen Kurnilyus. Kfitan se kun, ne hono sendalù Rom nogoten. Yó kboluy le kul, “Sendalù lemwót bè Itali.” ² Hemtahu bè Dwata nim kefitan ni, dalang se yó kem fes lówóhen. Tey bong tódô gel blayen yó kem Ju wen gónó le élél, ne senmoen gel mni ebè Dwata snéen. ³ Sotu kdaw bè yó, deng dô tlu uras kimel, wen hógów Dwata gu bè longit tódô hegfan béléen, tey medengen ktonen du. Mudél ebéléen yóm hógów Dwata yó, monen, “Ó Kurnilyus.” ⁴ Ya tey sidek klikò Kurnilyus, tódô henunuhen, monen, “Moem kut de, Amo?” Ominen bud mudél yóm hógów Dwata, monen, “Tey heyu nawa Dwata bè yóm gel kenihem, ne tonen snéen yóm kat kbasahem yó kem tau wen gónó le élél. Ne ni se yóm kebalaen kóm. ⁵ Duhen ni,” monen, “medóki kem tau ebè Jupa nem e hangay yóm sotu tau mauy bè yó boluyen Simun Pitér. ⁶ Nô bè gónô adénen Simun, yóm tau wen kenhulung nmoen lemwót bè kulit ógóf. Nô bè kilil mohin yóm gónóen.” ⁷ Tódô bud lemwót yóm hógów Dwata yó koni, ne omin Kurnilyus tmaba lewu bè yó kem tau gel mò nmò lem gónóen, getelu le yóm sotu sendalù tey snaligen, deng hemtahu bè Dwata snéen kun. ⁸ Gotu tulón Kurnilyus kul kdéen, ominen hewót kul ebè Jupa. ⁹ Hayahen bè yó, deng móyónen getungu kdaw, deng le moni ne bè Jupa. Bè yóm uras yó, lemwót Pitér mógów ebè gónó henos ditu ta ne e meni bè Dwata. ¹⁰ Bè yóm igò Pitér mni, gonómen ne kebitilen, ne móyô ke wen tô kenen. Yóm igoen tolo hematan ken, wen tódô hegefan Dwata béléen. ¹¹ Ton Pitér longit tódô hnas. Ne tonen yóm lómón ke kumù bong hloyol le elaan, hol lómón ke wen mogot du bè sfatà kililen. ¹² Tey dê klasi ógóf nô lemen, wen se yó kem ógóf mógów te tonok, ne wen se yó kem mulu te tonok, ne wen se yó kem onuk koyu. ¹³ Ne wen yóm gungol Pitér, monen, “Ni Pitér, na i madu mò utónem.” ¹⁴ Okóm mom yó balà Pitér du, monen, “Bê. Bè klawihu tau, là kô deng glemegu du yó kem yó, abay se là hyuhen bè kum hlau.” ¹⁵ Bud monen se mò du yóm mudél ebéléen yó koni, “Béem fen tô mon là hyuhen yóm deng mon Dwata hyu mken du.” ¹⁶ Botong tlu duléken mudél ebè Pitér yóm mudél yó koni, ominen tódô bud heway ebè longit se yóm hloyol yó koni. ¹⁷ Bè yóm igò Pitér tolo hemdem du lanen yóm deng tonen yó koni, gdofì le se bè bak tikeb yó kem tau dók Kurnilyus, abay se deng wen gónó le temngón du yóm gónô Simun nó. ¹⁸ Omin le smólók du ke nô bè yó yóm Simun bnoluy le Pitér. ¹⁹ Bè yóm igò Pitér tolo hemdem du lanen yóm deng hegfan Dwata béléen yó, tódô bud mudél ebéléen se yóm Tulus Dwata, monen mò du, “Ngem wen kem tlu tau nô laan, hnebel le u. ²⁰ Kmoni ebélê le, ne béem hegewu nawam mung kul, yakà ou du yóm hógów kul edini.”  Tahu se, kmo ebélê le Pitér, monen mò kul, “Ou se yóm hnebel ye. Nógów ye kut ni du?” ²¹ Tahu se, kmo ebélê le Pitér, monen mò kul, “Ou se yóm hnebel ye. Nógów ye kut ni du?” ²² Mon le se, “Hógów Kfitan Kurnilyus mi edini. Tey hyu kmoen yóm kfitan tu, tau hemtahu bè Dwata, ne tey kadat le du kdê yó kem Ju. Deng wen hógów Dwata gu bè longit sut béléen, hfangayen uu ne anì gungolen yóm tulón gel nwitem.” ²³ Omin Pitér hfusek kul elem gónô, monen mò kul, “Na ye na tungô he. Haya he kewót tekuy.” Tahu se, hayahen bè yó lemwót le, mung kul Pitér, ne wen bè yó kem dumu tau hemtahu bè yó bè Jupa mung kul snéen. ²⁴ Song gefet le bè Seseriya deng bud hayahen bè yó. Deng eles nangat Kurnilyus Pitér, eles gotu senbungen se yó kem fes lówóhen, dalang se yó kem hol ween. ²⁵ Timbow sut Pitér, ominen semlong du, ne tódô hegdungul bè tihen. ²⁶ Omin Pitér mon du, “Bê, mdai. Olohu tau se dou, senged kut.” ²⁷ Kewót le bè yó, husek le elem gónô, stulón le igò le mógów. Tódô glo Pitér se yó kem tey tau wen deng senbung Kurnilyus bè yó. ²⁸ Ne mon Pitér mò kul, monen, “Deng hónô tngón ye se kuy, là hyuhen bè kum hlau kem Ju ke mauy me duhen ke slomong me bè yó kem tau là Ju le. Okóm deng hetngón Dwata dou là hyuhen ke tô kenhisiku yó kem dumu tau, ke tô monu là hyu le. ²⁹ Yó gónóm mon bè yóm khangayem dou, là kô kenbéu du, tódóe mung. Duhen ni, tô snólóku béléem, boluyen de gónóm hógów dou edini ni?” ³⁰ Mon Kurnilyus se, “Deng tlu kdawu ni ne nô ta na a mni bè Dwata. Deng dô tlu uras kimel tum tu, lómón ni se yóm kmò kdaw. Bè yóm gou tolo mni, tódô hegfan béléu yóm tau mnes sminang mdà bè soluhu, ³¹ monen mò dou, ‘Ó Kurnilyus, deng gungol Dwata yóm gel knihem, ne deng tonen se yó kem gel blayem bè yó kem élél. ³² Mdóki tau ebè Jupa nam e hangay yóm sotu tau boluyen Simun Pitér. Mauy bè gónô yóm adénen Simun, yóm tau wen kenhulung nmoen lemwót bè kulit ógóf. Nô bè kilil mohin yóm gónóen.’ ³³ Yó gónón wen tau kendel hógówu edyó,” mon Kurnilyus, “mò na a mangay kóm, ne tey hyu nim ksutem dini ni. Ne ton Dwata se yóm kestifun me mangat kóm ni anì hnungol me yóm tulón hwiten kóm elem blóng me.” ³⁴ Ne mon Pitér se, “Tey, ni he hol kdengen ketngónu du yóm Dwata, laen kô dù knihuhen. ³⁵ Balù kihu tau, ke wen klikoen ke Dwata, ne ke hol nmoen yóm hyu bè Dwata, là kô knogol Dwata du se kun, nô kihu se kun gónó gu mbut. ³⁶ Deng tngón ye yóm tulón hwit Dwata ebè yó kem tau Israél, duhen yóm Tulón Hyu mò lan tau mit sefyu ebéléen hlanen bè Jisas Krays, yóm hol gónó le mogot yóm kdéen tau. ³⁷ Deng tngón ye se yóm deng nmò Dwata lem blóng yó kem tau bè klamangen benwu Israél, mbut bè Galili lan Jan tmolok yóm kmò klan yóm gel kbabtaysen yó kem tau. ³⁸ Deng tngón ye se Jisas, tau lemwót bè Nasarit. Tódô sù Dwata béléen yóm kun Tulus, ne tey tulus blayen du. Tódô keten benwu bélê me gónón e solu, ne hono hyu yóm gel nmoen. Gotu kóhen bè yó kem tau yóm kfasang Seitan malak kul. Yó gónón gembek mò du yóm nmoen yó, abay se eles nô béléen Dwata. ³⁹ Deng hónô gebentey me se kum yóm gel nmoen bè klamangen benwu Israél ne bè yóm syudad Jirusalim. Omin le hfatay du, tnutuk le bè kros. ⁴⁰ Okóm bè yóm getluhen kdaw, bud hlowil Dwata, ne tey dê he tau gónón na bud hegfan. ⁴¹ Okóm là tódô kdeen du tao gónón hegfan, són bè yó kem tau deng eles nélék Dwata yóm deng gembeley du, duhen mi se kem tau deng seyón du mken kogol yóm deng bud klowilen. ⁴² Yó hol dóken kum,” mon Pitér, “fen hetngón me elem blóng yó kem tau yó kem Tulón Hyu, ne yóm deng kélék Dwata du mò angat hkukumen kdéen tau ke sok bud semfulék edini. Angat gotu knukumen kdéen tau tolo mowil, dalang se kdéen tau deng matay. ⁴³ Yóm Jisas ni,” mon Pitér, “du se gónón e gbak yóm tehe gel tulón yó kem tehe tugod Dwata teganay. Yó gel mon le, nô kihu tau hemtahu béléen, gbek Dwata hmifót salà le hlanen bè yóm tey kfasang yóm boluy Jisas.” ⁴⁴ Bè yóm igò Pitér tolo mudél, tódô sù Dwata bè kdê yó kem tau hmungol du yóm Tulusen. ⁴⁵ Ya tey ketnga yó kem Ju dumu Pitér lemwót bè Jupa yóm keblay Dwata du yó kem tau là Ju le yóm Tulusen. ⁴⁶ Tódô gungol le lu mudél bè yóm udél là deng kul dnalang du, ne gungol le snéen yóm tey kdóyón le ke Dwata. Omin Pitér mon du mò yó kem dumuhen, monen, ⁴⁷ “Ni kem tau là Ju le ni, deng blay Dwata kul yóm kun Tulus, hol lómón yóm deng keblayen du tekuy. Là kô gekbê te du bélê le ke hbabtays le.” ⁴⁸ Omin Pitér mon du mò kul le Kurnilyus, monen, “Hbabtays ye ne, hlan ye bè boluy Jisas Krays.” Tahu se. Kogol yóm kehbabtays le yó, tey kngali le ke Pitér anì nan na hegen udì bélê le.