¹ Yó Sér Tyufilus, Bè yóm tanay sulatu ebéléem, tulónu kóm yóm kdê tehe gel nmò Jisas ne yóm gel toloken lemwót bè kbuten ² efet kól bè yóm kdaw kehogowen ebè longit. Okóm yóm gu laanen là deng mogow ebè longit, wen hloloen yó kem tau tehe néléken mò mit yóm kun tulón. Yóm hloloen kul yó hlanen bè yóm Tulus Dwata mò fen hetngón du kul. ³ Kogol yóm deng katay Jisas, botong fat folò kdawen tendo hton bélê le anì là buden megewu nawa le du yóm deng klowilen. Hol tógó mata le mton du, ne gel tulónen kul yóm kmò kogot Dwata tau. ⁴ Bè yóm kestifun le, wen hloloen kul, monen, “Bê ye tagad mdó bè Jirusalim. Ne ye ne nangat ksuten bélê ye yóm deng tehe fasad Mà kuy, duhen yóm tódô blayen deng tehe gel tulónu kuy. ⁵ Bong ke Jan kun, él yóm gel babtaysen kem tau. Okóm tek hilu kdaw ne duen bnabtays Dwata yu bè Tulus Dwata.” ⁶ Bè yóm kestifun le ebè Jisas yó kem gel hógówen, wen snólók le béléen, mon le, “Ó Sér, ni ne kô yóm khulékem du ebélê me kem tau Israél yóm kegebek me mogot du yóm kum benwu?” ⁷ Bnalà Jisas lu, monen, “Deng eles tngón Mà yóm kdawen mò du bélê ye yóm snólók ye yó, abay se tek sónen du yóm wen kegebeken mò du. Laen dù tagad kuy hentngón du he. ⁸  Okóm ke deng sut bélê ye yóm Tulus Dwata, enget wen se kuy kfasang, ne enget sensból ye bè Jirusalim yóm deng nmou, bud senged se bè klamang prubinsya Judiya efet kól etu bè klamang prubinsya Samarya, ngangen efet lenngeben klamang benwu.” ⁹ Timbow deng kudél Jisas, ominen tódô ganag mogow eta efet tódô lana lem mata le elem tum lobun. ¹⁰ Yóm igò le tolo hmunu temngel ebè longit, tódô ton le yó kem lewu tau mnes bukay mdà klohok le, ¹¹ ne mudél le ebélê le, mon le, “Yu kem tau lemwót bè Galili, moen de ke tlek ye mom temngel ebè longit? Tum Jisas deng mogow eta tu koni, angat bud semfulék edini he. Hol lómón sem tu ne koni yóm angat kehtuntunen edini bè yóm angat bud kesfuléken.” ¹² Kewót le bè yó bè Bulul Ulib yó kem tehe hógów Jisas, mulék le ebè Jirusalim, tek sotu kilumitru klayuken bè yóm bulul yó. ¹³ Timbow le kól bè Jirusalim, tódô le hlós ebè yóm dfél tofi ta bè yóm gónô gónó le gel mefet. Yó kwen le, Pitér, Jan, Jim, Andru, Filip, Tumas, Bartulumyu ne Matyu. Mung Jim ngà Alfiyus, ne yóm Simun tehe gel mung mofin yóm kul benwu, ne yóm Judas, ngà yóm sotu Jim. ¹⁴ Ket kiwól le gel sbung bè yó ne e mni bè Dwata. Wen se kem libun gel mung bélê le, dalang se ke Midi, Yê Jisas. Ne yó kem twoli Jisas, gel le mung snéen kul ¹⁵ Bud sotu kdaw bè yó, gotu le stifun yó kem tau hemtahu, wen dô lematu bud lewu folò kwen le. ¹⁶ Mdà Pitér lem belóng le, ne monen mò ku, “Ó kem dumuhu setwoli, wen udél tehe eles htugod Dwata ke Dabid teganay, hlanen bè yóm Tulusen. Yóm udél Dwata yó, deng dohò eta Judas ne, yóm tau fen malak yó kem tau kemifô ke Jisas. ¹⁷ Du se sotu tehe gel dumu me lemolò ke Jisas, tódô senged kum mò du yóm hmoen kum.” ¹⁸ (Wen filak blay le ke Judas mò sukéyen bè yóm sidek nmoen yó. Ne lemwót yóm filak blay le du yó, hlós blihen tonok. Yó se yóm tonok gónón matay, ne tódô gotu msut tnahihen lanen hebtang. ¹⁹ Tódô kdéen tau bè Jirusalim gotu mungol du nim ni. Yó boluy le du yóm tonok gónó Judas matay yó, Akéldama. Yó lanen, “Tonok Bli Litô.”) ²⁰ Bud mon Pitér, “Yóm udél tehe htugod Dwata ke Dabid yó, deng snulaten bè bok Lingón, yó monen, ‘Enget tódô hnas lem gónóen. Hol béen abay wen tau bud nô lemen.’ Bud sotu snulaten, monen, ‘Yake tólóng tau bud teles mò du yóm tehe kun nmò.’ ²¹ - ²² Duhen yó,” mon Pitér, “yake wen nélék tekuy mò bud tles ke Judas mò dumu tekuy hetengón du yóm deng bud klowil Jisas gu lem hatay, yóm gónó tekuy mogot. Yóm tau nélék tekuy ni, hyu ke yóm tau sana gel kut dumu slomong lemolò ke Jisas nbuten bè yóm tehe kbabtays Jan ke Jisas efet kól bè yóm khaway Jisas ebè longit. Yóm tau deng dumu tekuy gemtanud du yóm deng bud klowil Jisas gu lem hatay.” ²³ Tahu se, wen lewu tau nélék le duhen Jusif ne Matiyas. Nim Jusif ni, gel bnoluy le Barsabas (yó sotu boluyen, Justus). ²⁴ Omin le ne mni bè Dwata, mon le, “Ó Dwata, deng gotu tngónem yóm nô lem hendem ket tau. Tolokem kum yóm deng nélékem bè ni kem lewu tau ni ²⁵ mò hógówem, mò tles Judas, yóm tau deng tebelen yóm tehe gel nmoen, ne hlós ebè yóm benwu hol knóón béléen.” ²⁶ Timbow deng kni le, omin le mò atù. Ne fen matù ke Matiyas, ne du tnù yó kem sfolò sotu tehe dù