¹ Ó Ngau, Timuti, hol hgelem nawam bè yóm gel któbóng Krays Jisas kut lemwót bè yóm deng kessotu te béléen. ² Deng hónô gungolem ne yóm tehe gel toloku bè gónón wen, ne bud yó se hol sigangem ta yó kem tau genléd nawam anì duhe kóm, lu he fen hból du ebè kem dumu tau. ³ Béem hentaw yóm gel keglayamem lemwót bè yóm kloloem ke Krays Jisas, yakà uu du yóm sotu sendaluen. ⁴ Yóm sendalù mung bè sfatay, hol kóyóen ke hegsengelen nawa yóm tau gónón galak. Yó gónóm mon, laen dù bud dumu nmoen eddoli, tek són yóm deng sigangen tahen yóm tau malak du. ⁵ Ne sotuhen, yóm tau sanggan mlóy, balù menteg du matù, ke là gloloen yóm hlolò le kul bè kbuten, là kô gutahen du yóm ofolen. ⁶ Ne bud sotuhen, yóm tau alì glayam tmiba, bong knóón ke kninien yóm kun leniteg. ⁷  Hol hendemem ni kem monu mò kóm ni, ne Dwata he hol fen heglileb du kóm. ⁸ Gel hentulónem nawa Jisas Krays, yóm deng hlowil Dwata, yóm semfu gu bè yóm tehe Dabid. Ni se yóm Tulón Hyu gel tendo hbólu ebè yó kem tau. ⁹ Ne yó se lewóten nim gfau ni. Lómón kfét le dou tau monok. Ya mo kegfét le dou du, okóm là kô gfét le du kun yóm Udél Dwata. ¹⁰ Kem kunen ne, kihu kem kmò le dou, syan ke gtóbóngu yó kem tau deng nélék Dwata anì gewà le gu lem hatay se kul lan le hemtahu bè Krays Jisas, ne anì guta le yóm klowil laen dù sónen. ¹¹ Tey tahu se yóm gel mon le, yóm monen, “Ke deng te gomong matay bè Jisas, bud te gomong mowil béléen snéen. ¹² Ke hulung te hbala, angat te gomong mogot benwu béléen. Okóm ke hnalà te yóm ketngón te du, angat hnalaen tu se kun. ¹³ Anien ke monol yóm nawa te ebéléen, sana yó ne yóm kun nawa ebélê te, là kóen monol, abay se là kóen megetles yóm kun kmò.” ¹⁴ Nim ni koni, bud gel hegtulónem bè nawa yó kem tau bè yó, ne hol hetgamahem kul, ne Dwata fen mungol du. Bê le abay skuya mon bè kmò klan yó kem udél. Yakem wen se muhen, olo mom gónón lana kehtahu yó kem tau hmungol kul. ¹⁵ Hol hotuhem gelem mò du yóm hmò Dwata kóm anì hol gsengel nawahen kóm, ne anì laen bang gónóm myak bè yóm gel nmoem. Yake hol gulit ktolokem du yóm ktahuhen lemwót bè Dwata. ¹⁶ Hlayuki du kóm yóm kestulón là madat ke Dwata, kestulón laen dù lemen. Dalil mom gónó le glayuk bè Dwata yó kem tau móyô mung du. ¹⁷ Yóm gel tolok le yó, lómón kegnóm te du, lómón des bkukang, són moen minut lembét efet smabak. Lómón ni se yóm kul gel ktolok le Himinyus ne Filitus. ¹⁸ Deng mom senyat le yóm ktahuhen, ne senbeweg le yóm kul kehtahu yó kem dumu tau lan le gel mon du deng deng ne yóm klowil tau gu lem hatay. ¹⁹ Okóm yóm ktahuhen lemwót bè Dwata, là kóen na a monol. Wen deng hsulat Dwata, yó monen, “Tngón yóm gónó tekuy mogot yó kem kun tau.” a Ne sotuhen, “Ke yó udél yóm sotu tau, ke monen, Tauhe yóm gónó tekuy mogot dou, yake hol hlayuk du sen yóm sidek.” ²⁰  Bè yóm gónô bong, tey dê kay ngom ken nô lemen. Wen se ngom nmò le gu bè blówón bukay, ne wen se nmò le gu bè blówón mélél. Wen se nmò le gu bè koyu, ne wen se nifil le gu bè tonok. Yó kem ngom alì mebtes yó, yó he kwen mu le kul ke deng wen mò ken bong. Bong yó du kem dumu ngom ken là mebtesen, mò ngom bè kohù. ²¹ Senged se ke bè tau. Ke hol hlayuk bè yó kem sidek, tey wen mu Dwata du yóm tau yó, abay se deng hogoten ke Dwata klowilen, ne wen muhen du yóm gónón mogot, yakà dengen eles htifes balù kihu hmoen du. ²² Holi hlayuk bè yóm dô tngónem gónóm gemsalà, yakà hanai lomi lemnok. Hol sen‑galuhem yóm nawa btol, ne yóm ketnù yóm kehtahuhem bè Dwata, ne yóm kbong nawam kem dumuhem. Hol nmoem yóm gónón menek nawahem bè kem dumum tau, yakà ni du kul kmò yó kem tau gel htóbóng bè yóm gónó tekuy mogot, yó kem tau laen dù belenen yóm kehedem le. ²³  Okóm béi abay mung du kóm yó kem skuya mon, yakem wen se muhen. Yó olo nefeten, són mit sgés bè kem dumu. ²⁴ Yóm tau mò nmò bè yóm gónó tekuy mogot, béen abay mit sgés bè kem dumuhen. Du dé yóm hol ganag nawahen lem blóng kdéen tau, yóm fen hulung tmolok kul, ne hulung hanay nawa lem blóng le. ²⁵ Ne ke wen tau semkuya du yóm kun tulón, hol hen‑ganagen nawahen tmulón du kul yóm gónó le là segtud. Déke fen tenles Dwata he yóm hendem le, ne dilô le yóm hol ktahuhen, ²⁶ ne bud mulék he yó nawa le, ne gewà le se kul gu lem yóm holot Seitan. Yakà deng gekfóen kul, ne hloloen kul yóm kun kóyô.