¹ Ou se yóm tuha logi gónóhen lemwót nim sulat ni. Smulate ebè yóm sotu libun deng nélék Dwata, dalang se ebè yó kem ngaen. Tey kbong nawahu kuy yóm kdê ye. Là sónen du ou yóm wen nawahen ebélê ye, okóm kdê yó kem tau deng temngón du yóm hol ktahuhen lemwót bè Dwata. ² Yó gónó tekuy sbong nawa, abay se deng nô bè nawa tekuy yóm tahu tolok, ne là kô wen tul keskóhen bélê tekuy. ³ Yó hem Dwata, yóm Mà tekuy ne Jisas Krays yóm Ngaen, hol tendo gel tmóbóng ne kmodu ne tendo henek nawa tekuy. Ni se uléken yóm gel klolò tekuy du yóm ktahuhen ne yóm gel kesbong tekuy nawa. ⁴ Tey kligalu bè yóm kungolu du deng wen bè yó kem ngaem deng gel mimón du yóm ktahuhen. Ni se deng hloloen tekuy yóm Mà tekuy. ⁵ Duhen yó, Lenibun, yó nóyô nawahu bélê ye ke hol tekuy sbong nawa. Sundu hlau lomi du nim hlolou kuy ni, okóm sana kem hlau labi deng hónô gungol tekuy lemwót bè kbut yóm kehtahu tekuy. ⁶ Ke sbong tekuy nawa, gotu nimón tekuy sen yó kem kun hlau Dwata. Nim hlauhen tekuy ni, deng tenbut gungol tekuy lemwót bè kbut yóm kehtahu tekuy, duhen yóm hol kesbong tekuy nawa. ⁷ Deng tey dê ne yóm tmolok sekban deng sekla bè klamangen benwu. Yó kesekban le, gel henkéng le yóm tehe kehbalingen tau Jisas Krays. Yóm tau tmolok yó, olon tmundug kuy, du se yóm hohon Jisas. ⁸ Yó gónóm mon, hol ten‑gama ye anì là lanahen bélê ye yó kem deng gel tolok me kuy. Kóyóu ke hol guta ye yóm ofol fan Dwata kuy. ⁹ Ke wen tau là gmulit du yóm kun tolok Krays, ne deng mom wen gel tnuen du, là kóen nô béléen Dwata yóm tau yó. Okóm ke tendo nuliten yóm kun tolok Krays, deng nô béléen ne yóm Mà tekuy lewu le yóm Ngaen. ¹⁰ Duhen yó, ke wen tau sut bélê ye, okóm là nuliten du yóm kun tolok Krays, bê ye hotun bè gónô ye, ne bê ye abay hnódó. ¹¹ Abay se ke hnódó ye lu, deng ye gbót ne bè yó kem sidek gel nmò le. ¹² Tolo tey wen he duen yóm tô tulónu kuy, okóm là móyóe hemnô du lem sulat. Kóyóu ke géhél wen lan tekuy bud ston anì tódô tekuy stulón, ne anì hol gsengel yóm kligal tekuy. ¹³ Yó ne kóó. Tey gel kólóm le kuy yó kem ngà yóm twolihem bè ni, yóm tehe nélék Dwata.