¹ Ou se Pol gónóhen lemwót nim sulat ni. Ou se sotu tau fen gel hógów Krays Jisas. Nim kógówu ni, hol lemwót bè Dwata, yóm deng lemwà kut gu lem hatay, ne Krays Jisas, yóm tendo hendón nangat te. ² Smulate ebéléem, Timuti. Lómón ke deng hol ngau uu lemwót bè yóm kehtahu te. Yó hem Dwata, yóm Mà tekuy, dalang se yóm gónó tekuy mogot Jisas Krays tendo tmóbóng kóm, ne tendo kmodu kóm, ne tendo henek nawahem. ³ Yó hol nóyóu béléem ke nam na tódô henek nô bè Ifisus, hol lómón yóm tehe tulónu kóm ekni bè yóm tehe kewótu ebè Masdunya. Yakà wen yó kem dumu tau tmolok sekban bè yó. Hol bnólówem lu anì bê le abay henfu yóm ktolok le yó. ⁴ Hol tulónem kul bê le abay bud tulón yó kem tutul lenbù nmò yó kem tau gnan, ne yó kem tey dê boluy yó kem tehe fù le gónó le gu semfu. Yóm nmò le yó, olo mom dalil gónó le skaf mon. Là kô hetngónen du kut yóm kun kóyô bélê tekuy Dwata. Són bè kehtahu te gónó te temngón du yóm yó. ⁵ Yó hol muhen nim hlolou kóm ni anì wen yóm kesbong le nawa lemwót bè yóm klaen dù belenen yóm nawa le, ne yóm klaen dù blóng le ebè Dwata, ne hol tahu duhen yóm kehtahu le. ⁶ Deng wen se kem tau bè yó kmogol du nim monu ni, ne deng le hetlas elem yó kem sentulón laen dù mtukul nefeten. ⁷ Kóyô le ke lu tmolok du yóm tehe hlau Dwata, okóm là kô tngón le du lanen yóm gel tolok le, tódô óyô le gel mon du yóm mon le. ⁸ Deng tngón tekuy se yóm tey kehyuhen yóm hlau yó ke lolò te yóm kun kóyô kehlan du Dwata. ⁹ Bè ktahuhen, sundu yó du tendoken ke yó kem tau gel mimón du, okóm yó dé tendoken, yó kem tau gel mulé du ne yó kem tau gel mò sidek, yó kem tau kembê ke Dwata ne yó kem gemsalà, yó kem tau là hemtahuhen ne là madat ke Dwata, yó kem tau glef le hmatay kem tuha le, yó kem tau monok, ¹⁰ ne yó kem tau smamuk, yó kem logi sefdóyón honon lu, dalang se kem libun sefdóyón honon lu, yó kem tau kemfô dumuhen tau, yó kem tau mò kéng, ne yó kem tau tmifù kéng, ne yó kem tau mò du yóm dumu nmò là segtónen ebè yóm tahu tolok. ¹¹ Yóm monu tahu tolok ni, yó sem Tulón Hyu deng sigang Dwata tahu mò hetngónu ebè yó kem tau. Nim Tulón Hyu ni, lemwót bè Dwata, yóm hol hyu bè kdéen, yóm knóón dmóyón du. ¹² Tey kdóyónu du dou yóm gónó tekuy mogot Krays Jisas, abay se deng hekgisen ou mò du yóm nmou. Sotu gónóhu dmóyón du snéen, abay se deng snaligen ou ne néléken o mò sotu kun tóbóng lówó. ¹³ Anam yó ne ekni, tey gel sidek kebkóhu ebéléen, ne gel hensideku yó kem gel lemolò du, ne tey gel kehnéu du. Ewenem yó, sana tey kkoduhen dou Dwata, abay se monem tolo là denge hemtahu he ekni, ne tódô óyóu gel mò kul yó kem tehe gel nmou. ¹⁴ Okóm tey któbóngen dou yóm gónó tekuy mogot, tódô henbalingen ou tau hemtahu, ne blayen do yóm kbong nawahu kem dumuhu. Yó se nefeten yóm deng kessotu tekuy bè Krays Jisas. ¹⁵ Là kô olo ulóben du se nim monu mò kóm ni, Timuti, hol béen tlek wen tau hmingay du. Yó hol henduf Krays Jisas edini elem benwu anì wen lanen lemwà yóm tau gemsalà. Ne bè kdéen tau gemsalà, ou yóm tau alì gedlug salà nmoen, ¹⁶ okóm tey kkodu Dwata dou mò gónón hegfan du ebè yó kem dumu tau yóm hol kun kanay nawa Krays Jisas, igoen ou yóm tau alì gedlug kmoen salà. Yó gónó Krays Jisas mò du nim ni anì mgel nawa yó kem tau hemtahu béléen bè hulin kdaw, yó kem tau angat gmuta du yóm klowil laen dù sónen. ¹⁷ Hol bê te abay lensón yóm kadat te ke Dwata ne yóm kdóyón te du. Du se yóm tahu geta mogot yóm klamangen. Laen dù sónen yóm kun kogot. Tek són du yóm hol tahu Dwata laen kô tul katayen, ne là kô deng hnikót ton mata du. ¹⁸ Ó Timuti, uu se yóm ngau, ni wen hlolou kóm. Hentulónem nawa yóm tehe deng olu le kóm yó kem tau tugod Dwata ekni. Béem kó bè nawam nim ni mò temgel kóm bè yóm kmoem nmò bè Dwata. ¹⁹ Hol hgemelem kehtahuhem, ne béem abay nmò blóngem ebè Dwata. Nim monu ni, deng wen se kem tau gmafang du, ne yó gónón hlós lana kehtahu le. ²⁰ Ni se deng nmò le Hayminus lewu le Aliksandér. Yó but gónóhu tmafak kul, tódô bayau lu ebè yóm kun kfasang Seitan anì wen mò kendlà le, anì là bud nmò le du yóm ksidek kebkó le ebè Dwata.