¹ Ne ni wen udélu ebélê ye, yu kem tuha gónó le gel galak yó kem tau hemtahu. Ou se sotu dumu ye tuha gel malak snéen. Lelen yó he deng tonu se dou yóm tehe keglayam Krays bélê tekuy, ne gomonge snéen dou bè yóm kdaw angat kegfan yóm kegetahen. Ni se yóm hlauhu kuy. ² Hol sen‑gyok ye yó kem tau deng hesegyok Dwata kuy. Hol lómón ke ubiha le, ne yu yóm tau fen gel semgyok kul. Yó kun kóyô Dwata ke hol ye hligal bè yóm gel kesegyok ye kul. Hol bê ye abay nmò ke là lemwóten bè nawa ye. Hol bê ye abay nmò ke són hendem ye bè kguta ye filak. Song nmò ye ke lemwót bè yóm hol óyô ye tmóbóng kul bè kehtahu le. ³ Hol bê ye fen hdatù lem blóng le. Yu dé gónó le dmalang yóm hyu yó kem tau galak bélê ye. ⁴ Ne ke bud semfulék edini Jisas, yóm semgyok ubiha hol geta bè kdéen, wen tey ofol blayen kuy, yóm ofol là kóen monol yóm alì kehyuhen. ⁵ Ne yu kem tau lomi lemnok, hol nimón ye yó kem tau tuha senta ye. Ni hlauhu kuy yóm kdê ye, hol dnalang ye yóm keheglaan bè kem dumu ye. Abay se wen monen bè Sulat Dwata, yóm monen, “Tey kekbê Dwata kul yó kem tau hegmón, bede tnóbóngen yó kem tau hulung heglaan.” ⁶ Duhen yó, hol ye heglaan bè tum Dwata alì mfasang bè kdéen. Ke ni se nmò ye, tey kehegetahen kuy sok hto yóm kun buteng mò du. ⁷  Hbô ye ke Dwata dé yóm gel hemblat kuy, abay se tey nô bè nawahen yóm któbóngen kuy. ⁸ Bê kuy abay gel hlingay, hol ye eles htigel. Abay se wen Seitan yóm hohon ye, sónmoen mebel yóm tau mò hensideken, lómón yóm liyun, sónmoen mebel kenfóen mò nséken. ⁹ Hol hbegel ye yóm kehtahu ye bè Dwata ne hol natù ye Seitan. Abay se yóm keglayam ye ni, là kô són du yu gemnóm du. Gotu gnóm le snéen yó kem tau hemtahu bè klamangen benwu. ¹⁰ Okóm ke deng legen udì yóm keglayam ye, tey któbóng Dwata kuy. Du se hol hbegel kuy ne tendo ten‑gelen yu efet là buden sliwo yóm kehtahu ye. Yó gónón tehe tmaba kuy anì gbót ye bè yóm tey kegetahen ditu bè longit hlanen bè yóm deng kessotu ye bè Krays. Ne yóm kegetahen yó, laen kô dù nan e són. ¹¹ Ne laen kô dù sónen snéen yóm kfasangen mogot tau. ¹² Yó fen hsulatu du nim sulat ukol nii Silas. Du se sotu dumu kuy hemtahu gel genléd nawahu. Yó gónóhu smulat ebélê ye mò gónóhu gemduf kuy bè kehtahu ye, ne mò gónóhu hetngón du kuy yóm hol tahu nawa Dwata ebélê ye. Bê ye abay klifót yóm nawahen yó. ¹³ Tey gel kólóm le kuy ni kem kuy dumu hemtahu bè ni bè Babilun. Deng nélék Dwata lu snéen kul. Tey kólóm Mark kuy snéen kun, yóm logi hol lómón ke dou ngà. ¹⁴ Yó ne kóó. Hol gel hton ye bè yó kem dumu ye hemtahu yóm hol tahu kesbong nawa. Dwata he hol henek nawa ye yóm kdê ye deng hemtahu bè Krays.