¹ Koddi si Pablu no napirisu tongod ki Kristu Hisus. Kanak hoy si Timutiyu no sulod ta diyo ki Kristu nangumusta koykow Pilimun no pinanggo noy no sulod hoy duma to pogpangalagad. ² Nangumusta koy ki Apia no sulod ta, ki Arquipu kanta no duma no sundalu ni Kristu, hoy to tibo no tumutuu no niglimud diyo to baloy nu oyjow to pogsimba to Diyus. ³ Poron nogkarawat nu ka garasya hoy kaawang ligkat to Diyus no Amoy ta hoy ki Hisu-Kristu no Magbobayjo. ⁴ Mapasalamaton a kanunoy to Diyus to kara ampu ku para kaniyu. ⁵ Tongod su nadinog ko no maroson ka koykow no pogtuu ki Hisus no Magbobayjo hoy dakol ka goynawa nu to tibo no koot-otawan to Diyus. ⁶ In-ampu ku no ka koykow no mabinogayjun no unod to koykow no pogtuu, ogdakol ka koykow no pogsabut hoy kabayja-an to kara panalangin no nohimo nu kanta tongod su duon ki, Kristu. ⁷ Mo inulog ku no mo sulod, tongod to koykow no poggoynawa to mo kaot-otawan to Diyus nadaral kandin, hoy soini nakahulo hoy nakadaral koddi. ⁸ , ⁹ Nataga a no tongod to katongod no intalad koddi ni Kristu makasugu a koykow to angayjan noghimuwon nu. Di tongod su in-olog ku man koykow, ogholo ad on koykow. Iling nu sagboka no manigoon hoy pinirisu no alagad ni Kristu Hisus. ¹⁰ Ogholo a koykow para ki Unisimu, no kog kohimu pasayluwa nu kandin. In-ila ko kandin no anak ku tongod su naruma ko kandin to pogtuu ki Kristu tagood no kayi o pad to pirisuhan. ¹¹ Nohun-a waro pulus din to koykow, di kuntoon daruwa kid no ogmakapoymalus kandin. ¹² Kuntoon ogpaliboron ku diyo to koykow ka inulog ku no si Unisimu. ¹³ Kaliyag a poron no ogpo-ungkod kandin duma koddi oyjow pinabayjo kandin ogkabuligan a nu tagood to kayi o pad to pirisuhan tongod to pogpanggugud ko to maroyjow no lalagon. ¹⁴ Di kono ko soin oghimuwon no waro pogsugut ligkat koykow, oyjow kono no poglugoslugos ka pogbulig nu koddi. Kaliyag a nu kog bulig ka ogbulig ka no ligkat to pusung nu. ¹⁵ Pogbuut to Diyus nogpakapariyu pad si Unisimu koykow. Oyjow to poglibod din kono kow on iyan ogpokogsuwoy hantud to hantud. ¹⁶ Kuntoon kono on no uripon do kandin, ko kono koykow nu inolog no sulod. In-olog ko kandin, di labow nu pad kandin og-olog on tongod su kuntoon kono on kandin no uripon do, ko kono sulod nud duon to Magbobayjo. ¹⁷ Koy naan, ko in-ila a nu no koykow no duma to pogtuu, kinawa a nu kandin iling to pogkinawa nu koddi. ¹⁸ Ko nakasalo kandin hoy nokoutang koykow, koddi on kag bayjad koddi. ¹⁹ Koddi si Pablu, nig-unoy to pogsulat to soin, koddi kag bayjad ko duon utang din to koykow. Di nataga ka no duon dakol no utang nu koddi, su pinabayjo koddi nadawat nu ka kaluwasan. ²⁰ Koy naan Pilimun, tumana nu soin inholo ko koykow tongod su nigiiling ki no nigtuu to Magbobayjo. Ayjata a iling no sulod nu ki Kristu. ²¹ Dakol ka pogdaral nu nogtumanon nu ka koddi no inholo, iyan nu nigsulat a koykow. Hoy nigtuu a no labow pad iyan soin ka inholo ku no koykow noghimuwon kandin. ²² Duon pad igholo ko koykow, kog kohimu taganuhi a to koddi noglopawan, su nigdaral a nu pinabayjo to pog-ampu nu mohondiyo a to kaniyu. ²³ Nangumusta si Ipapras kaniyu no napirisu duma koddi tongod ki Kristu Hisus. ²⁴ Nangumusta dan ka mo kabulig ko no si Markus, si Aristarku, si Dimas hoy si Lukas. ²⁵ Ogduma poron kaniyu tibo ka garasya to Magbobayjo no si Hisu-Kristu.