¹ Nataman, in-uyan on to Panisingan te Magbobayjo si Hisus diyo to mammara no ingod no kono ogkougpaan oyjow ogtintalon ni Moibulan. ² No dutu, migpuasa sikandin to hop-at no pulu (40) no aldow hoy marusilom, no nataman, miggutasan on kandin. ³ No miggondiyo to kandin si Moibulan no migkahi, “Ko Anak ko ma to Magbobayjo, himuwa nu no paan soin so mo batu.” ⁴ Piru migtabak si Hisus, “Nasulat on diyo to Kasulatan no migkagi, ‘Kono ogkouyjag ka otow to koonon do, ko kono, to tagso lalag no iglalag to Magbobayjo.’ ” ⁵ Nataman, in-uyan on to agalon to mo busow si Hisus diyo to Hirusalim, ka Matulus no Suwidad, hoy diyo itahu kandin to kinaribabawan to timpulu, ⁶ hoy migkahiyan kandin, “Ko Anak ko ma to Magbobayjo, tinugpu ka sooyjo to diralom. Su nasulat on diyo to Kasulatan, ‘Ogsuhu ka Magbobayjo to mo panalihan din to pogbantoy koykow, hoy ogtapayoon ka kandan, oyjow kono ogpakabaras to batu ka paa nu.’ ” ⁷ Piru migkagiyan kandin ni Hisus, “Nasulat on doma diyo to Kasulatan no migkagi, ‘Kono nu tintala ka Magbobayjo no Diyus nu.’ ” ⁸ Nataman, in-uyan on man-o to ahalon to mo busow si Hisus diyo to titikangi no bubungan, hoy impapitow kandin ka katolosan to langun no ingod kayi to ampow to tano. ⁹ No migkahiyan kandin ni Moibulan, “Igbogoy ku soin so langun diyo to koykow ko ogpanimbuol ka hoy ogsimba koddi.” ¹⁰ Ne migkahiyan ni Hisus kandin, “Awo ka Moibulan! Su nasulat on diyo to Kasulatan, ‘Simbaa niyu ka Magbobayjo no Diyus niyu hoy kandin do pamakaya niyu!’ ” ¹¹ Nataman, mig-ongkoran on kandin to ahalon to mo busow, no dutu, nangingumo on ka mo panalihan to Magbobayjo oyjow ogtanggu kandin. ¹² No nakarinog si Hisus to narakop on si Huwan no Tigbowutismu, sikan naan ka miglibod kandin diyo to Galiliya. ¹³ No waro kandin naluhoy diyo to Nasarit, hoy miggalin on mig-ugpo diyo to Kapirnaum no marani to lanow no sakup to Sabulun hoy Naptali. ¹⁴ Noyitabu sika oyjow ogkatuman ka ingkahi ni purupita Isayas: ¹⁵ “Ka ingod to Sabulun hoy ka ingod to Naptali, bayaanan poondiyo to dahat, no doyipag to woyig no Hurdan, no sakup to Galiliya no ogngaranan to ingod to kono no mo Hudiyu. ¹⁶ Minsan nangugpo duon to marusilom ka mo otow to sika no mo ingod, piru ogpakakita rod kandan to dakol no kalayag. No ka nangugpo duon to marusilom no ogkaaldok no ogkongammatoy, ogkalayahan dod.” ¹⁷ Puun to sooyjo no timpu, migbunsud on migwali si Hisus no migkahi, “Inniyuhi niyu ka mo salo niyu, su mahaan on ka Poghari to Magbobayjo.” ¹⁸ Tagood to miggiphipanow si Hisus diyo to ilis to Lanow to Galiliya, nakakita kandin to talaari no ogpamiyalo no si Simun no og-immuan ki Pidru hoy ka sulod din no si Andris. Mangngongalap kandan so daruwa. ¹⁹ No migkahiyan ni Hisus kandan, “Ikul kow Kanak hoy oggimuwon ku kaniyu no mangngongalap to mo otow.” ²⁰ To duon no mig-ongkoran dan ka mo biyalo dan hoy mig-ikul on kandin. ²¹ To migpabulus on si Hisus ka miggipanow, duon nakita rin no lahi on talaari no si Santiyagu hoy si Huwan no mo anak ni Sibidiyu. Diyo kandan to balangoy ran duma to amoy ran no ogpanupak to mo biyalo dan. No dutu, in-umow on sikandan ni Hisus, ²² no duon no in-ongkoran dan on ka balangoy ran hoy ka amoy ran hoy mig-ikul on kandan ki Hisus. ²³ Nataman, in-ompot ni Hisus to ogloug-loug ka tibuok no purubinsiya to Galiliya, hoy migpanulu kandin diyo to mo simbaan to mo Hudiyu. Inwaliyan din kandan to Moupiya no Panugtulon mohitongod to Poghari to Magbobayjo, hoy imbawian din ka langun no oggoramon hoy dalu to mo otow. ²⁴ Nokoompot to intiru no Sirya ka guguron mohitongod kandin, purisu impanguyan to mo otow diyo to kandin ka langun no ogmandoralu to naloin-loin no mo dalu, ka sooyjo so ogkabadbayjaran to masakit, ka ogsoloran to busow, ka ogbabuyon, hoy ka migpatoy on so mo lawa. No imbawian kandan ni Hisus. ²⁵ Masulug amana ka mo otow no migsinundul ki Hisus no diyo ogpuun to Galiliya, Dikapulis, Hirusalim, Hudiya, hoy diyo to doyipag to Hurdan.