¹ To sooyjo dod no aldow, miglihawang si Hisus diyo to baloy hoy migpinpinnuu diyo to ilis to lanow. ² No duon susuluhi no otow no miglibulung diyo to kandin, no sooyjo naan, mig-untud on kandin to balangoy hoy diyad on migpinnuu. No diyo nanasindeg ka mo otow to ilis to lanow. ³ Masulug ka impanulu ni Hisus diyo to mo otow no impabayo din to mo panunggilingan. Migkahi kandin, “Duon sagboka no otow no miggondiyo to kamot oyjow ogpamula. ⁴ To pogpanawod din on to boni, duon nakasawod diyo to dalan, no migginguma ka mo manuk-manuk hoy impanuktuk on sooyjo. ⁵ No ka duma no boni, diyo nakasawod to batuwon no waro amana tano. No mahaan do sooyjo migtubu su manipis ka tano. ⁶ Piru to naaldawan on, nahangu on sooyjo su waro nakaralid. ⁷ Duon doma boni no nakasawod diyo to duhiyen. Ne nanubu ka mo duhi hoy nasolung on ka mo pinamula. ⁸ Ka duma no boni, diyo nakasawod to maroyjow no tano. Intubu sooyjo hoy migbobogas, no duon duma no boni no migbobogas to sagboka no gatus (100), duon duma no mo koon-oman no pulu (60), hoy duon doma migbobogas to mo tatolu no pulu (30). ⁹ Purisu, ko ogkoupian ka no ogpakasabut, sumsuman nu ay-ayjari ko nokoy ka narinog nu!” ¹⁰ No migparani diyo to ki Hisus ka mo binasbas din hoy mig-inso kandin, "Maniya to oggamit ka to panunggilingan ko ogpanulu ka to mo otow? ¹¹ No migtabak si Hisus, “Impataho on diyo to kaniyu ka inggolos moyitongod to Poghari to Manama, piru waro sikan ipataha diyo to duma. ¹² Su sooyjo so duon katuonan, ogtimulan pad oyjow ogdakol ka katuonan; piru sooyjo so doisok do so katuonan, og-angayjan pad iya minsan ka doisok no kandin. ¹³ Sikan naan ka miggamit a to panunggilingan to pogpanulu ku kandan, su oyjow ko ogtongtong kandan, kono ogpakakita, hoy ko ogpamminog sikandan, kono ogpakarinog hoy ogpakasabut. ¹⁴ No natuman on diyo to kandan ka ingkahi to Magbobayjo pinaahi ki Purupita Isayas no migkagi, ‘Minsan ogmonuwon niyu to ogpamminog, kono kow iya ogpakasabut. Minsan ogmonuwon niyu to ogtongtong, kono kow iya ogpakakita. ¹⁵ Su momakohal ka ulu to soin no mo otow, insagpongan dan ka talinga ran, hoy impilong dan ka mata ran. Su koma ko ogpakakita sikandan, hoy ogpakarinog, hoy ogpakasabut, hoy oglibod kayi to koddi, no ogbawian ku sikandan.’ ¹⁶ Piru koupianan niyu su ogpakakita ka mata niyu hoy ogpakarinog ka talinga niyu. ¹⁷ Ognangenan ku sikaniyu to malohot: Masulug ka mo purupita hoy matularong no mo otow no ogoupian porom no ogkita to nakita niyu, piru waro sikandan nakakita. Ogkoupian doma sikandan no ogdinog to narinog niyu, piru waro sikandan nakarinog. ¹⁸ “Sikan naan, paminoha niyu ko nokoy ka kaluwasan to panunggilingan moyitongod to mo pogpamula. ¹⁹ Ka boni no nakasawod diyo to dalan, iyan sooyjo so otow no nakarinog to lalag moyitongod to Poghari to Magbobayjo piru waro sikandin nakasabut. To pogginguma ni Moibulan in-ahow on ka lalag to Magbobayjo no nakapamula diyo to pusung din. ²⁰ No ka boni no diyo nakasawod to batuwon, ogpokoiling to sooyjo so otow no nakarinog to lalag to Magbobayjo no duon-duon no migdawat kayi no nahalo. ²¹ Piru waro soin nakaroralid diyo to pusung din, purisu waro do naluhoy ka pogpalintutuu rin. Pogginguma to koyirapan hoy pogbayjad-bayjad tongod to pogdawat din to lalag to Magbobayjo, duon-duon no mig-ongkod kandin to pogpalintutuu din. ²² No ka boni no nakasawod iyo to duhiyon, iyan sooyjo so mo otow no nakarinog to lalag to Manama, piru ka pogkalaggow rin moyitongod to pog-ugpo din, hoy ka poggoyinawa to mo karatuan din iyan nokoumos to lalag to Magbobayjo, hoy waro sikandan nakabobogas. ²³ Piru ka boni no nakasawod diyo to maroyjow no tano, iyan sooyjo so otow no nakarinog to lalag to Magbobayjo hoy nakasabut kayi. No migbobogas sikandan: Duon bogas din no sagbokan no gatus (100), ka duma hon-om no pulu (60), hoy ka duma tatolu no pulu (30). ²⁴ Mig-aboy on man-o migpanulu si Hisus to mo otow pinaagi to panunggilingan no migkagi, “Ka Poghari to Magbobayjo ogpokoiling to pangguguron moyitongod to otow no migsawod to maroyjow no boni diyo to kamot din. ²⁵ Piru to nonowulop on ka mo otow, migginguma on ka kuntoro din hoy insowuhan on sawori to bohas diyo to kamot hoy pogkaponga, mig-awo on kandin. ²⁶ Hongkayi to migtubu on ka mo pinamula hoy to migbobogas on, human pad noiloyi ka mo hilamunon. ²⁷ No nangondiyo to kamunoy to kamot ka mo uripon din hoy migkagi, 'Agalon, hondoi ogpuun ka mo hilamunon no nanubu diyo to kamot no maroyjow man ka mo boni na insawod nu? ²⁸ Migtabak ka ahalen diyo to kandan, '‘Hinimuwan sika to kuntoro ku.’ No mig-inso ka mo uripon din, ‘Na, ogkoupian ko naan no oggondiyo koy oyjow ogpamurut to mo hilamunon?' ²⁹ No migtabak sikandin, ‘Kono kow, su koma ko ogkalagkos niyu to ogbarut ka mo pinamula. ³⁰ Balahara niyu ro duo taman to tinggaani on su igpowun-a ku igpabarut to mo talaggaani ka mo hilamunon, hoy igpabagkos kandan oyjow ogsilaban. Pogkaponga, igpalimud ku diyo to lolapong ku ka ogkahaani ran. ' " ³¹ Nataman, migpanulu o man-o si Hisus to mo otow to loin mo otow to loin no panunggilingan no migkagi, "Ka Poghari to Magbobayjo ogpokoiling to guguron moyitongod to boni to mustasa no inpamula to otow diyo to kamot din. ³² Ka boni to mustasa ka mallilintok to langun no mo boni, piru ogkoyimu no pinakadakol to mo pinamula diyo to kamot ko ogdakol on soin. No ogkataman, ogpokoiling o to mo kayu hoy ogsosalahan on to mo manuk-manuk ka mo sugpang din. ³³ No mig-aboy o man-o si Hisus migpanulu kandan to panunggilingan no migkagi, "Ka Poghari to Magbobayjo ogpokoiling to igpatulin to paan no in-angoy to sagboka no malitan hoy insowug din to harina no ogliwaro to saku, taman to migtulin ka langun no innimu rin. ³⁴ Impabayo ni Hisus to mo panunggilingan sooyjo so langun no impanulu din to masulug no mo otow. No waro inlalag din diyo to kandan no waro din ipabayo to sampitanan. ³⁵ Noyitabu soin oyjow ogkatuman ka inkagi to Magbobayjo pinaagi to Purupita no migkagi, "Oggamit a to mo sampitanan ko ogkagi a, igguhud ku ka waro pad nanongnongi puun to poggimu to kalibutan.” ³⁶ Nataman, mig-ongkoran on ni Hisus ka masulug no mo otow hoy migsolod kandin diyo to baloy. No migparani diyo to kandin ka hibatoon din hoy migkagi, "No la, ipasabut nu kanami ko nokoy ka kaluwasan to panunggilingan moyitongod to hilamunon diyo to kamot." ³⁷ No migtabak si Hisus, “Ka otow no migsawod to maroyjow no boni, iyan sika ka Anak to Otow. ³⁸ No ka kamot, iyan sika ka kalibutan, no ka moupiya no boni iyan ka mo otow no sakup to Poghari to Magbobayjo. Piru ka mo hilamunon, iyan ka mo sakup to ahalon to mo busow, ³⁹ ka kuntoro no iyan migsawod to mo hilamunon. Ka tinggaani, iyan sika ka katammanan to timpu, no ka talaggaani, iyan ka mo panalihan to Magbobayjo. ⁴⁰ No ogbaruton hoy ogsilaban ka hilamunon, iling naan dod duon ka ogkoyitabu to katammanan to timpu. ⁴¹ Ogpouyan ka Anak to Otow to mo panalihan din oyjow igmaawo diyo to Migharian din ka langun no iyan ogpuunan no ogpakasalo ka duma hoy ka langun no oggimu to maroot. ⁴² No igdogpak dan sikandan diyo to hapuy no ogkanlabkanlab. No diyo, ogmandalawit kandan hoy ogkihot to ngipon dan. ⁴³ No sooyjo so mo matularong, oglayjag iling to aldow diyo Migharian to Amoy ran. Purisu, ko ogkoupian ka no ogpakasabut, sumsumana nu ay-ayjari ka ogkarinog nu! ⁴⁴ “Ka Poghari to Manama ogpokoiling doma to guguron moyitongod to karatuon no inggolos diyo to kamot no nakita to sagboka no otow. Migwoil-woil ka otow, imbunbunan din dod man-o sooyjo. No puun to kahalo din, mig-uyan on kandin ka migbologyo to langun no diyo to kandin hoy inboli rin on sooyo so kamot. ⁴⁵ “Ka Poghari to Magbobayjo ogpokoiling man-o to guguron moyitongod to sagboka no nigusyanti no ogpammitow to matolos hoy mahal no baliog no ogngaranan to pirlas. ⁴⁶ To nakakito o sikandin to amana no mahal no pirlas, imbologyo din on ka langun no diyo to kandin hoy imboli o sooyjo so pirlas. ⁴⁷ “Ka Poghari to Magbobayjo ogpokoiling doma to guguron moyitongod to pukut no in-antug diyo lanow no migsaharan to naloin-loin no mo ngalap. ⁴⁸ No omun ko ogkaponu on to ngalap ka biyalo, ogganuyen on sika to mangngongalap diyo to ilis. Ogkataman, ogpaminnuu on kandan oyjow to pogpangalam to mo ngalap. No igtahu dan diyo to solaan ka maroyjow no mo ngalap, piru igpandogpak dan mulo ka maddoot. ⁴⁹ Iling naan dod doma kayi ka ogkoyitabu to katammanan to timpu. Oggondini ka panalihan to Magbobayjo hoy igpasuwoy ran ka mo maddoot no mo otow puun to mo matularong. ⁵⁰ No sooyjo so mo otow no maddoot, igdogpak diyo to hapuy no ogkanlabkanlab. No diyo, ogmandalawit kandan hoy ogkihot to ngipon dan.” ⁵¹ No mig-insaan ni Hisus kandan, “Nasabut niyu rod ka langun no impangguhud ku?” Migtabak sikandan, “Uya.” ⁵² Migkahiyan ni Hisus kandan, “Purisu ka langun no mo talagpanulu to Balaud to Magbobayjo, ogpokoiling to kamunoy to baloy no mig-angoy to iyam hoy tapoy no mo kasangkapan din no mahal.” ⁵³ To pogkaponga ni Hisus to pogpangguhud to sikan no mo sampitanan, mig-awo o kandin to sooyjo no ingod, ⁵⁴ hoy mig-uli on diyo to lungsud no intulinan din. No migpanulu sikandin diyo to simbaan to mo Hudiyu, hoy noinu-inu ka nakarinog kandin hoy migkahi, “Hondoi buwa nakakuwa kandin to katuonan hoy gohom to poggimu to koin-inuwan? ⁵⁵ Kono naan no anak to talagbobaloy sika? Kono naan no si Mariya ka inoy rin, hoy kono naan no onsi Santiyagu, si Husi, si Simun hoy si Hudas ka mo sulod din? ⁵⁶ Kayi ma mulo nangugpo ka mo atoboy rin? Purisu hondoi rin naa nakuwa ka langun?” ⁵⁷ Sikan naan natamonong on kandan kandin. Piru migkahiyan kandan ni Hisus, “Ogtahuron ka sagboka no purupita to minsan hondoi gawas to ingod no intulinan din hoy to pamilya rin.” ⁵⁸ Purisu kono no masulug ka mo koin-inuwan no innimu ni Hisus to sooyjo no ingod tongod su waro kandan migpalintutuu kandin.