1
Talahuron no Tiyupilu: Panungan ka nigguram nigsulatt to guhuron no noyitabu kayi to kanta moyitongod ki Hisu-Kristu.
2
Ka insulat dan, iyan ka inpanggugud kanta to sooyjo so nakakita kayi puun pad to bunsuranan hoy iyan nigpanggugud to lalag to Magbabayjo.
3
Natantanuran ku dodma sikan tibo agad ka bunsuranan kayi. Sikan naa ka maroyjow buwa dodma no og-ay-ayjaran ku sikan to ogsulat para koykow tahurun no Tiyupilu,
4
su oyjow ogkanongnongan nu iya ka kamalogotan to libu no inpanulu koykow.
5
To timpu nu si Hirudis ka nighari to Hudiya, duon sagboka no talagpanubad no ogngaranan ki Sakariyas no puun to kabuwaran ni Abyas no talagpanubad. No duon asawa rin no ogngaranan ki Ilisabit no puun dod dodma to kabuwaran to mo talagpanubad.
6
Sikandan so alunggun, matularong diyo to tangkaan to Magbabayjo hoy mapahotpot no nigtuman to tibo no sugu hoy balaud to Magbabayjo.
7
No waro anak din su kono ogpakaanak si Ilisabit, hoy nabuyag on sikandin su alunggun.
8
No nighinguma ka aldow no iyan ogpamakoy diyo to timpulu ka punduk onni Sakariyas to mo talagpanubad.
9
Ka batasan to mo talagpanubad, ogbabalo sikandan ko nokoy ka oghimuwon dan, hoy si Sakariyas ka natinuru no iyan ogsolod diyo to timpulu to Magbabayjo no Magbobayjo oyjow ogtutung to insinsu.
10
To uras no intutung o ka insinsu, nig-ampu ka songo panungan no otow diyo to lihawangan to timpulu.
11
No dutu, duon diwata to Magbabayjo no nigpakita kandin no diyo nigsasindog to dapit to igkakawanan to altar no ogtutungan to insinsu.
12
Natingkomod si Sakariyas to pogkakita rin to diwata, hoy nahaldok kandin.
13
Nokoy naan ingkagiyan sikandin to diwata, "Kono ka kahaldok Sakariyas, indinog to Magbabayjo ka pog-ampu nu, no kuntoon og-anak to lukos ka asawa nu no si Ilisabit. No ngarani nu sikandin ki Huwan.
14
Ogkaliyag-liyag kow tibo ko oglusot o sikandin.
15
Su ogkoyimo sikandin no mabantug diyo to tangkaan to Magbabajo no Magbabayjo. No kinangolan no kono sikandin og-inum to binu hoy ko ogpokohubug no og-inumon hoy ogkaponu sikandin to Ispiritu to Magbabayjo agad ko diyo pad sikandin to gotok to inoy rin.
16
No igpalibod din ka panungan no kabuwaran ni Israil diyo to Magbabayjo no Magbabayjo ran.
17
Ighun-a sikandin to Magbabajo, hoy ogpakaangkon sikandin to Ispiritu to Magbabayjo ho gohom no ogpokoiling to ki Purupita Ilyas mando. Ogpog-ulion din ka nonokog-ogot no mo amoy hoy mo anak, hoy ogpaliboron din diyo to magotong no dalan ka masinupakon no mo otow. Puun duo, ogkaandam din ka mo otow para to poghinguma to Magbabajo.
18
No nigkagiyan ni Sakariyas ka diwata, "Ogmonuwon ku to pogkanongnong no malogot ka inlalag nu? Su buyjag ad ma soini hoy buyjag o dodma ka asawa ku."
19
No nigtabak ka diwata, "Sikoddi si Gabriil ka sinaligan to Magbabayjo. Inpoondini a nikandin oyjow to poglalag hoy pogpanugtul koykow to soini no maroyjow no panugtulon.
20
No puun su waro ka nigpalintutuu to ingkagi ku, ogkoummow ka taman to aldow no ogkatuman o ka ingkagi ku koykow. Su ogkatuman iya sooyjo to olog no timpu."
21
No dutu, nigtatagaran to mo otow si Sakariyas hoy noinu-inu sikandin to nalugoy sikandin diyo to solod to timpulu.
22
To poglihawang din o, konad sikandin ogpakalalag hoy nig-alatihan din naan do sikandin. Puun duo, nasabut dan no duo inpakita kandin diyo to solod to timpulu. No noummow on iya sikandin.
23
To napongo on ka pogpamakoy ni Sakariyas diyo to timpulu, nig-uli o sikandin.
24
To waro nalugoy, naboros o ka asawa rin no si Ilisabit hoy nig-uugpo do iya sikandin solod to lalimma no bulan.
25
No nigkagi si Ilisabit diyo to goyinawa rin, "Kuntoo noyid-u o ka Magbabayjo kanak. In-awo din o ka kasipuran ku diyo to tangkaan to mo otow."
26
To hon-om o no bulan ka gotok ni Ilisabit, insugu to magbabayjo ka diwata no Gabriil diyo to lungsud to Nasarit no sakup to Galiliya.
27
Ogpoondiyaan din ka sagboka no boyi pad no ogngaran ki Mariya no kanakan no ogngaranan ki Husi no kabuwaran ni Hari Dabid.
28
No nighondiyad ka diwata to kandin hoy nigkagi, " Kahalo ka, Mariya! Nigpalanginan ka to Magbabajo hoy ogdumahan ka nikandin!"
29
Nalibog amana si Mariya moyitongod to narinog din hoy indoromdom din ko nokoy ka kaluwasan dutu.
30
No nigkagiyan sikandinh to diwata, "Kono ka kahaldok, Maria, su ingkaroyjow ka to Magbabayjo.
31
Ogkaburos ka hoy og-anak to lukos, hoy ngarani nu sikandin ki Hisus.
32
Ogkoyimo sikandin no mabantug hoy og-umawon sikandin no Anak to Amana no Magbantug no Magbabayjo. No ogpahiron sikandin to Magbabajo no Magbabayjo iling to kaapuan din no si Hari Dabid.
33
No ogharian din ka mo kabuwaran ni Hakub to waro ogtumanan to kandin no poghari."
34
No nig-insaan ni Mariya ka diwata, "Ogmonuwon ku naa to og-anak to buyi pad?"
35
No nigtabak ka diwata, "Oghondini to koykow ka Ispiritu to Magbabayjo hoy nig-upo ka to gohom din. Puun duo, ka matulus no bato no ig-anak no ogngaranan to Anak to Magbabayjo.
36
Sumsumana nu ka sulod nu no si Ilisabit. Kagiyon no kono din og-anak. Nokoy naan kuntoo ogkaburos o sikandin su hon-om o no bulan ka gotok din, agad buyjag o sikandin.
37
Su ka Magbabayjo ogpokoyimu to tibo."
38
No nigkagi si Mariya, "Suluguanon a to Magbabayjo. Ogkoyitabu poron kayi to kanak ka inlalag nu." No nig-awo o ka diwata to Magbabayjo.
39
To pogligad to pila no mo aldow, nigpanagana si Mariya hoy nig-agpas-agpas nighondiyo to sgaboka no lungsud no diyo to mo bubungan to Hudiya.
40
Nighondiyo kandin to baloy ni Sakariyas hoy nakigsima ki Ilisabit.
41
To pogkadinog ni Ilisabit ti pangumusta ni Mariya, nigwoil ka bato diyo to gotok din. Insuluran si Ilisabit to Ispiritu Santu.
42
Hoy to mahagbot no lagong nigkagi kandin, "To tibo no malitan koykow no ka inpanalanginan to Diyus to iling to soini. Inpanalanginan din daan ka inkaburos nu.
43
Dakol iyan ka kabantug ko su inlouy a to inoy nu Magbabayjo ku.
44
Su agad pad ka bato to gutok ko naholo no nigwoil to nadinog din ka koykow no pangumusta.
45
Iyan mampo koykow no nigtuu natuman iyan ka koykow no inlalag to Magbabayjo."
46
No nigkagi si Mariya, "Nigdayjan to Magbabayjo ka gimukud ko,
47
hoy naholo a amana duon to Diyus no kanak no Manluluwas.
48
Tongod su nakasumansuman kandin kanak no kandin no sulugoon! Hoy ligkat ka tibo no otow ogngaran kanak to iyan a mampo.
49
Tongod to mo dakol no mo koin-inuwan no inhimu kanak to gamhanan no Diyus: Balaan ka ngaran din:
50
Nigpakita kandin to kohoy-u to tibo no duon kahaldok kandin ligkat to sagboka no kabuwaran diyo to tibo no kabuwaran.
51
Inkayjowan ka mo bulad din no gamhanan hoy inpakasuwoy-suwoy ka mo otow no mapaampawon duma to tibo dan no mo in-isip.
52
Inpaawo din ka mo hari no gamahan ligkat to kandan no mo turunu hoy intuun ka mo mohoy-u-hoy-u.
53
Inhantoy din to mo maroyjow no butang ka mo ingutasan, hoy inpaawo din no waro in-alap to mo dapian.
54
-
55
Intuman din ka mo saad to kamanigoon ta. Nigbulig kandin ki Israil no suguonon din hoy nakasumansuman kandin to pogpakita to kohoy-u ki Abraham hoy to tibo din no mo kabuwaran poiling to katammanan.
56
Nig-ugpo si Mariya to mo tatolu no bulan suma ki Ilisabit hoy nigpouli to kandin.
57
Nig-uma ka panahon no si Ilisabit nig-anak to bata no lukos.
58
Nakadinog ka mo sugkod hoy ka mo karumahan to karoyjow no inhimu to Magbabayjo diyo to kandin hoy naholo kandin tibo.
59
To sagboka on on siman ka bato, inhimu dan ka sirimunyas to pogtuli. Ogngaranan dan poron to Sakariyas iling to Amoy rin.
60
Di nigkagi ka inoy. "Kono! Huwan ka igngaran kan!"
61
Nigkagi kandan, "Di waro man kabuwaran now no nig-alab to sikan no ngaran!"
62
No pinabayjo to alati inpanginsoan dan ka AMoy ko nokoy kag kaliyagan din no ngaran to bato.
63
Namuyjo to sulatan si Sakariyas hoy migsulat, "Huwan ka ngaran din." Hoy nabolong-bolong amana kandan.
64
Duon-ruon nakakagi si Sakariyas ogdayjan din ka Diyus.
65
Noinu-inu amana ka no sugkod dan hoy niglugod to tibo no kabubungan to Hudiya ka balita moyitongod to soin.
66
Nigsuman-suman ka tibo no nakadinog to soin hoy nanginso, "Ogkamonu buwa soin bato ko ogdakol on?" Su nakita ran no ka gohom to Magbabayjo nigduma kandin.
67
Naponu to Ispiritu Santu ka Amoy ni Huwan no si Sakariyas hoy nanlalag,
68
"Sayjaon ta ka Magbabayjo, ka Diyus to Israil! Su nighondini kandin oyjow pogbulig to koot-otawan din hoy pogbogoy kandan to kalibwasan.
69
Inpohondini dan kanta ka sagboka no gamhanan no Manluluwas ka kabuwaran to suguonon no si Dabid.
70
Nigkagi kandin dongan pinabayjo to kandin no balaan no purupita.
71
No luwason ki kandin ligkat to mo kablang ta, hoy ligkat to gohom to sooyjo tibo no no nigduma kanta.
72
Nigkagi kandin no ogpapitow kandin to kohoy-u to kanta no mo kamanigoonan hoy makadomdom to balaan no kasabutan.
73
-
74
Nigtugon kandin to Amoy ta no si Abraham hoy namumpo no ogluwaon ki rin ligkat to kanta no mo kablang. Nig-uyjon kandin, kanta no og-alagad kandin to waro kahaldok,
75
pinabayjo to pogkinabuwi no balaan hoy matularong to tangkaan din to tibo no panahun.
76
Hoy koykow, anak ko, umowon no purupita to Diyus no Labow no Halangdon: Oghun-a ka to Magbabayjo oyjow pog-andam to kandin no dalan,
77
hoy pognangon to mo kaotawan no ogluwas kandan pinabayjo to pogpasaylo to kandan mo salo.
78
Su ka kanta no Diyus mohoy-on hoy malumo inpalayjag din kayo to kanta ka Manluluwas no anat to ogsilat no aldow.
79
No ogbogoy to kalayjag to mo otow no duon to karusiluman hoy nahaldok to kamatayhun. Panuluan ki rin ko ogmonuwon to poghimu no maroyjow ka kanta no poggoynawa to Diyus hoy to kanta no isig ka otow.
80
No, ka bato no si Huwan ogdakol hoy nahiroson to Ispiritu. Nig-ugpo kandin to kaawangan poiling to aldow no ogsugud kandin to kandin pogpanulu to mo Israilinhon.