¹ Koddi si Hudas ka nigpaalap to sulat. Uripon a ni Hisu-Kristu, hari a ni Santiyagu, ogpangumusta a du to nig-alam to Magbabayjo no Amoy, no niggoynawaan hoy nigdiyalan a din taman to poglibod ni Hisu-Kristu. ² Ka Magbabayjo ogbogoy pad kaniyu to timul pad no kooy-u, karoyjawan hoy goyinawa. ³ Ig-olong ku no mo sulod, agad kabaggot ad iyan no ogsulat kaniyu to kaluwasan no nasagboka ta, di na sumansuman ku no kinangolan no iyan ku igsulat ka pogdaral kaniyu to kanokal now to oggon-gon ka karoyjowan no kasagboka ro igbogoy to Magbabayjo to koot-otowan din. ⁴ Iyan nigpuunan no inlalag sikan, tongod su duo mo otow no nigholos-holos do nigpasowog-sowog kaniyu. Ka sikan no mo otow, tahan o nasulat ka poglogpad kandan. Kono kandan og- ikul to Magbabayjo hoy inpasuwoy ran ka pogpanulu moyitongod to karoyjow hoy ka kooy-u to Magbabayjo ta su ogkaayjun kun noghimo ki to maroot hoy igkaroyjow to kawwa ta. To iling duon no paagi, nig-inniyugan dan ka sagboka no Agalon to hoy Magbabayjo no si Hisu-Kristu. ⁵ Agad ko nakanong-nong kow ttibo no iglalag ku, koibog a pad iyan no ogpasuman-suman kaniyu to pogluwas to koot-otawan to Israil poiling to Ihiptu. No nataman, niggulo din ka waro nigpalintutu-u kandin. ⁶ To ka, sumana no ka mo panaligan no duon katungdanan no nasi on nig angawwo diyo to ugpaan dan. Inbaku kandan to Magbabayjo to karina no dorosoni hoy inpirisu diyo to durusilomi no bitu su iglogpad kandan to dakul no aldow to poghukum. ⁷ Kono now kalingawi ka suwirad to Suduma hoy Gumura hoy ka nakalingut no mo ingod dutun. Mo agkoy ka mo otow diyo hoy mo bantut koy naan ka nigsilaban kandan to hapuy no kono ogkoobukan, su sabot to mo otow ka pakasalo oglogparan iyan. ⁸ Iling dod ka mo otow no nigsuwoy kaniyu, duo no palinouwan dan no iyan ogpuunan to maligsom to lawa ran to pogparuma-ruma ran, hoy nig ang-angaan dan ka katongod to Magbabayjo hoy nigbaloy-baloy ran ka maddoson diyo to langit. ⁹ Di agad si Mikail, no pangulu to mo panaligan to Magbabayjo, waro nighimu iling to pogpakig-ogot din to mo Agalon to mo busow. Di waro poron kandin nigbayyung to Agalon to mo busow to poglalag to maroot kandan moyitongod to minatoy no lawwa ni Muwisis. Nigkagi ro si Mikail, ”Ogsaparan ka to Magbabayjo!” ¹⁰ Di inbaloy-baloy to soin no mo otow ka tibo no waro nasulat, iyan dan noilingan ka magintalunan no ogpanuwal do duon no kono ogsuman-suman pad sikan nigsalap pad iya kandan. ¹¹ Mokohoy-u hoy-u kandan! Su nig-ikul to nighimu ni Kain, hoy ilingan dan si Balaam no nighagam-hagam to salappi, koy naan ka nokoyimu on to maroot. No ogkoholo kandan no og-atu to Magbabayjo iling ki Kura. ¹² Ka sikan no mo otow, ogkaamong-among kow ko og-amut kaniyu to ogkoon. Ogmakaligsom kandan tongod su iyan dan do ogsuman-sumanon ka pogkaotow ran hoy waro igkoyilow ran. Iyan dan noilingan ka salagapun no waro nig-alap to uran. No nig-alap to kalamag. Hoy iyan dan mando noilingan ka kayu no tigpamohas o poron di waro nigpamohas. ¹³ Iling mando kandan to makosog no balod to dahat no ogkitoon ka mokoyilow-yilow no himu ran iling to bulo. Koiling mando kandan to nakasuwoy no bituon poondiyo to ingod no durusilomi no intagana to Magbabayjo no pougpaan kandan to waro ogtamanan. ¹⁴ Si inuk, ka igkoon-on no kabularan ni Adan, ka migtagno moyitongod kandan. Si inuk nigkagi, ”pamminog kow! Oghondini ka Magbabayjo duma to pila no luyuran no panaligan din no Diwata. ¹⁵ Su oghukum to tibo. Inhitagoon ka tibo no waro nig-ikul kandin no mo makasasalo tongod to dorooti ka tibo no oghimuwon dan. ¹⁶ Sikan no mo otow, mamaumpalit hoy waro igkabunali. Su ogtumanon ka maroot no igkoupii ran. ¹⁷ Mo pinalanggo ku no mo sulod, kinangolan no ogsumansuman now ka tagno to mo Apustulis to Diyus ta no si Hisu-Kristu. ¹⁸ Nigkagiyan kow kandan to uromo no aldow, ogpokouma ka mo otow no ogdoog-doog kaniyu, mo otow no oghimu to igkoupii no maroot. ¹⁹ Kandan ka nakabaad-baad kaniyu. Waro kandan ka Ispiritu to Magbabayjo, su iyan dan inpaumalag ka igkaupii to lawa ran. ²⁰ Di kaniyu ka pinalanggo ku no mo sulod, kinangolan no igpatulin now ka pogpalintutu-u to Magbabayjo, hoy ampu kow sumalo to inpanulu to Ispiritu to Magbabayjo. ²¹ Palinggaat kow to ginawa to Magbabayjo tagood to ogtagad kow to kooy-u to Magbabayjo ta no si Hisu–Kristu no ogbogoy to untong no waro katamanan. ²² Kooy-u now ro ka waro nigpalintutu-u to pogduwa-ruwa ran. ²³ Koy luwasa now ka duma to pogsakolow kandan puun to hapuy. Ikooy-u now man do ka duma na makasasalo, di bantoy ko no pakapariyo kow to agad ka kinabo dan nabiluwan to maroot no igkaupii ran. ²⁴ No ogdayjanon ka Magbabayjo no ogpokoyimu no ogbantoy kaniyu oyjow kono kow ogkasaligkat to salo. Kadin uromo ka og–alap kaniyu no waro igdow-oy diyo to tangkaan din. ²⁵ Ogdayyanon nigpasagsagbuka no Magbabayjo no Manluluwas ta pinabayjo, ki Kristu no Magbabayjo ta. Ka karoyjawan, ka kabantog, ka karoson, hoy ka katongod, kandin do iyan ligkat pad dongan hoy to waro ogtamanan. Litos iyan.