1
Su, mo pinalanggo kow man no anak to Magbobayjo, iling kaniyu sikandin.
2
Batasana now ka poggoynawa to duma tamanan to poggoynawa ni Kristu kanta hoy to pogbogoy rin kanta to kinabuwi rin ogpokoiling to mohomut no halad diya to Magbobayjo.
3
No ligkat to koot-otawan ki to Magbobayjo, kono ogpoghilhilabotoy ka kono no alunggun hoy oggimu naan to agad nokoy no malaw-ay hoy kow ogpolologud naan. Koilingan no waro ogkagugud doun to kaniyu no iling duon ka pogbabatasan.
4
Kono no olog no oglalag kow to makasisipod hoy ka waro ogkaruan no mo lalag hoy malawoy no kawalian, ko kono, sikan so no lalag no pogpasalamat to Magbobayjo.
5
Su nakanongnog kow on iyan no waro ogpokougpo nigharian ni Kristu hoy to Magbobayjo no ogpahilabotoy su kono no alunggon, oggimu to mala-ay hoy pogsimba (to diyus-diyusan ka iling duon no otow.)
6
Su ligkat duon nalangotan ka Magbobayjo to sooyo so masinupakon hoy oglagparan din sikandin. Di kono kow palimbong to agad hontow no ogkagi no kono kun no sala ka iling dutun no oghimuwon.
7
Kono kow duma kandin.
8
Su dangan duon kow pad to marusilom, di kuntoon duon kow on to maawang su nihimu kow man on no mo kootawan to Magbobayjo. Sikan naan, ipakita now ka pog-ugpo now no duon kow to maawang.
9
(Su ka otow no duon to maawang, og-uyun ta tino no kalasi to kaliyag, hoy katularang, hoy kamaroyjowan.)
10
Pamitawa now ko nokoy ka igkapaholo to Magbobayjo.
11
Kono kow amut-amut to waro karuan no oghimowon to mo otow no diyo pad to marusilom, ko kono, ipanongnong now sikan.
12
Su makasisipod iyan agad ka pogpanggugud do moyitongod to inilis do no oggimuwon ta.
13
Di ka tibo no maroot no oghimuwon ka tibo no botang, ogkanongnongan, su ligkat to maawang.
14
Ogkanongnogan iyan ka tibo. Di duon no nakagi no nighohonduon: “Gimata ka, koykow so nakahirogo, onow ka ligkat to kamatayon no hoy oglalagon ka ni Kristu!”
15
Sikan naan, ay-ayari now ka pog-ugpo now no kono no iling to pog-ugpo to mo otow no langgo, no kono iling to mo matuligkan.
16
Kannokal kow no ogkahimu no layjun ka maroyjow tongod su maroot ka oghimuwon to mo otow to soini no timpu.
17
Di kono kow palango-lango, ko kono, sabuta now ko nokoy ka igkaliyag to Magbobayjo.
18
Kono kow pahubug-hubug su ogparoot sika to pog-ugpo now, ko kono, pahipanow kow to Ispiritu to Magbobayjo.
19
Omun ko ogpalagoy kow, iyan now gamita ka mo lalag no Ispirituhanon no kantiun. Ullaginon now hoy ligligian now no ogligkat to pusung now ka Magbobayjo.
20
To ngaran to Magbabayjo ta no si Hisu-Kristu, layjun now pasalamati ka Diyus, no Amoy to tibo do iya.
21
Pagdumaduma kow to sagboka diyo to duma now tongod su ituhod now si Kristu.
22
Sikaniyu so mo asawa no mo malitan, padumaduma kow to mo asawa now iliing to pogpadumaduma now to Magbobayjo.
23
Su ka lukos ka pangulu to asawa rin iling to si Kristu ka pangulu to nigpalintutuu no iyan sikan ka lawa rin, hay sikandin ka ogluwas duon.
24
No, ligkat su niggpaduma-duma ki Kristu ka nigpalintutuu, koilangan no ogpadumaduma to mo asawa dan ka mo malitan agad nokoy.
25
Sikaniyu su mo asawa on no mo lukos, kailangan no oghimowon now ka mo asawa now iling to poggoynawa ni Kristu to pogpalintutuu hoy to pogbogoy rin to kandin no kinabuwi para kandin.
26
Innimo rin sikan oyjow to poghalad din ka nigpalintutuu. Nighugasann din sikandin pinabayjo to woyig hoy to lalag din.
27
Su oyjow ogkarawat din sikandin isip duroysawbo nagpanggasawoon din, no waro bilo, hoy agad nokoy no maroot, no kono no maroyjow do iyan hoy waro ogkarow-oy.
28
To iling no paagi, koilangan no oggoynawaan to mo lukos ka mo asawa ran, iling to poggoynawa ran to kandan mismu no lawba. Ka otow no oggoynawa to asawa rin, oggoynawa to pogkootow rin.
29
Su waro otow no ogdumut to kandin mismu no lawba, ko kono, ogpakounan din soini hoy hawbiran din.
30
Tongod su ogpokoiling ki to mo baad to lawba rin.
31
Sumalo to nasulat to kasulatan no nighohonduon, “Sikan ka ogligkatan no og-ongkod on ka lukag to amoy hoy inoy rin hoy ogsaboka on to asawarin, no kandin su doruwa, ogkoyimu on no sagboka.”
32
Duon dakol no karoyjowan no nokoilis kayi, di ko ogkagiyan ku, no panampitan sikan to sagboka ni Kristu to nigpalintutuu.
33
Sikan naan, kaylangan no ka tagsagboka kaniyu oggoynawaan iyan to asawa rin no malitan iling to poggoynawaan rin to kandin mismu no pagkootow. No ka sagboka no malitan kaylangan no ogtahuron din ka asawa rin.