¹ Kanak si Huwan ka igbuyag to nigtuu no pig–uyjonana to soin no sulat. Ogpangumusta a koykow gayo niggoynawa ku no sulod to malugot. ² Niggoynawaan ku no sulod, nig–ampu a no maroyjow ka pog–ugpo nu hoy maroyjow no panglawa inat maroyjow ka to Ispirituhanon no kinabuyi. ³ Inkaholo ku amana ka pogginguma to pila no mo sulod no nanlalag kanak to kinabiyu sumalo to tutu-u inat to naanaran. ⁴ Warad labow no ogmokoholo kanak ogpakarinog a no nigtuman to malugot ka mo anak to pogtuu. ⁵ Niggoynawaan ku no mo sulod, ogkasaligan to pogdayjon to mo sulod agad to waro no kandan na ilahi. ⁶ Nigpalalag kandan diyo to tangkaan to simbaan kani moyitongod to piggoynawaan. No ko oglibod kandan duon, maroyjow poron ko ogkaholo ka Diyus ka pogbulig ku kandan pinabayjo to pogbogoy nu to igkinangolan to pogligkat dan. ⁷ Su nangipanow kandan oyjow to pogpanulu moyitongod ki Kristu hoy waro kandan nigdawat to agad nokoy no diyo ogpuun to mo otow no waro nigtuu to Diyus. ⁸ Koy naan, kinangolan no ogbuligan ta ka inat duon no mo otow, su oyjow ogkoyimu ki no taag duma to tutu-u. ⁹ Nig–uyjonan ku to sulat ka ni tuu duon, di tongod su kono ogkaholo si Diyutripis no kandin ka ogpalabow-labow. ¹⁰ Koy naan ko oghondiyo a oghisgutan ko nokoy ka innimu rin no pog–uubat kanak. Di kono sikan do. Kono mando kandin ogpakigsima-sima ko duon ogmokouma no mo sulod. Kono din ogdawaton to maroyjow hoy ogbabagan din pad no nigdodolan diyo to punduk to nigtuu. ¹¹ Niggoynawaan ku no sulod, kono nu unuga ka maroot no hinimuwan ko kono, ka maroyjow no hinimuwan. To kadootan waro nakakita to Diyus. ¹² Si Dimitriyu pigsayjo to tibo: Agad ka tutu-u iyan nigtitigus to soin no tutu-u ka pigkagi ku. ¹³ Dakol pad poron ka iglalag ku koykow, Di kono ku igpaagi to sulat. ¹⁴ Ogpakigkita a poron to magaan oyjow ogpakiglalag a koykow. ¹⁵ Ka Diyus ka ogbogoy koykow to karoyjow. Ipangumusta a koykow hoy ka mo alukuy nu kayi, hoy ipangumusta a ro mando to tibo no mo alukuy ta duon.