¹ Kanak si Huwan ka igbuyjag to migmalintutu-u ka migligkatan to soyni no sulat. Ogpangumusta a to boyi no in–alam to Magbabayjo hoy diyo to mo anak din. Ka tibo do no nakataga to kamalogotan, ² Tongod to ka kohoy-o to pusung ta ka kamalogotan hoy konad ogkaawo to inggad kagan-u. ³ Ka karoyjow, kahoy-u, dow ka karoyjow no ligkat to Magbabayjo no Amoy dow to Anak din no si Hisu–Kristu, ogkaangkon now, igbogoy sikan to Magbabayjo to sooyjo no ogdawat to kamalogotan dow to goyinawa. ⁴ Amana noholo to pogkanongnongi ku no duo mo anak nu no mig–ikul to kamalogotan, sumalo to insuhu kanta to Amoy. ⁵ Koy kuntoon oghangyoon ku koykow atoboy, no pagoynawooy ki ka matag–sagbuka soyni insulat ku koykow, kono no iya suhu, ko kono, taahan on sikan ligkat pad to bunsuran. ⁶ Ogkakita goynawa no ogkagiyon ku pinabayjo to pogtuman ta to mo suhu din. Taahan now on narinog ka sikan nu suhu ligkat pad to bunsuranan, no kinangolan no ogpabatasanon now ka poggoynawa. ⁷ Masulug ka nanginguma kayi to ingod no oghinggat to mo otow. Kono ogpalintutu-u kandan no migpokootow si Hisu– Kristu. Ka mo otow no iling duon, talaghinggat dow kuntoro ni Kristu! ⁸ Bantoy kow kono ogkalaag ka inko un agta no oyjow kono ogkasalinan ka giyoy no ogkarawat now. ⁹ Ka inggad hontow no waro mig–ikul to impanulu ni Kristu di no si migtumul kayi, waro diyo to kandin ka Magbabayjo di ka inggad hontow no nig–ikul to impanulo ni Kristu, duon to kandin ka Amoy dow ka Anak din. ¹⁰ Ko duon oghundoon to kaniyu no kono ogpanulu to impanulu ni Kristu, kono now kandin pasolora diyo to kaniyu no baloy hoy ko kow ogkagi, “Ka kalinaw ogduma poron kaniyu.” ¹¹ Hoy sooyjo no ogbanasal kandin, ogmakaruma to maroot no himu rin. ¹² Mohon-in pad poron ka iglalag ku kaniyu, di kono a ogkaliyag no igsulat ku pad soyni. Igkaliyag ku no ogpakahimoloy apad kaniyu hoy ogpakiglalag kaniyu no oyjow amana ki ogkoholo. ¹³ Ogpangumusta man do koykow ka mo anak to sulod nu no in–alam daan to Magbabayjo.