¹ Duwa mendag ke aldaw dumateng den se pista te mge Judio nga egtawal te Pista te peg-okit te Angel aw Pista te pan nga weda puboi. Se mge kedekelan te menge pari aw se menge megtulada balaud negpalano nga imatayan si Jesus. Nayan nangaha dan te pamaagi aw menonen dan pegdakop ki Jesus nga eked katagahi te menge otaw. ² Minikagi dan, "Eked ta lang ulo inangi panahon te pista, kay basi nikaw meglinggaw se menge otaw." ³ So nayan doton si Jesus te Bitanya, se kemaen pa baguwa sikandin kidoen te balay i Simon nga kanhi doen mengisul nga mesakit te kindal, doen sibad ke baye nga dimateng, doen inibing din deitek tibod nga doen awop nga mahalon onto nga pehumot. Siini nga pehumut lekat te mehunot nga tinanum nga pigtawal te nardo. Pagpedapag din ki Jesus eg-abrihan din se tibod aw nayan egbubo din se pehumot te ulo i Jesus. ⁴ Doen menge otaw doton nga neopal aw minikagi, "Ngalay pigbatan-batan din se pehumot? ⁵ Ibeligya peden yan te kentedad nga beli sibad si omay nga sildo aw se halin ibegay doton te menge oada pegkeabat." meneng siak eked niyo gayed dumai. ⁶ Meneng minikagi si Jesus kandan, "Ngalay egsemuken niyo sikandin? Kebiyai din ulo sikandin. Mepiya ini se kandin ininang kanak. ⁷ Se mege wedad pagkeabat gayed niyo petekingen aw te bisan eden orasi ibeg niyo mehimo niyo talabanan, meneng siak eked niyo gayed dumai. ⁸ Se baye siini neg-inang taman te kandin meinang alang kanak. Pig-ulaan din te pehumot se kanak lawa antak pegegana te kanak lubeng. ⁹ Se benal, bisan kanan iwali se Mepiya Belita te tibuuk kelibotan, se kandin pig-inang kanak istorya heman anatak hendoman kandin." ¹⁰ Si Judas Iscariote nga sibad te sumpolo tegduwa ke menge Apostoles dimoton te kalangkawan te menge pari amon mekigsabot te pegtugyan ki Jesus doton kandan. ¹¹ Pegkedineg te kalangkawan te menge pari aw eden se tuyo ni Judas, nelipay dan onto te pegsaad te pegbegay kandin te kuwarta. Nayan lekat nidekeu, nangaha sikandin te higayon aw menonen din pegtugyan ki Jesus kandan. ¹² Dimateng se pirmiro nge aldaw te Pista te pan nga wedad petubo, yan ini se aldaw nga ihalad se menge karnero nga kanun alang te pista sa peg-ukit te Anghel. Naya neg-insa se menge tinuladaan i Jesus kandin, "Kanan man se kamno ibeg nga megtegilan kay te penihapon te Pista te peg-okit te Anghel?" ¹³ Egsugo din se kandin duwa ka tinuladaan, "Doton kaw te siyudad te Jerusalem. Pag niyo doton doen megsugat kenyo nga otaw nga nengibing te banga nga doen wayeg. Telokoni niyo sikandin. ¹⁴ Aw kanan nga balay mawop aw ikegihi niyo ini te tig-apo te balay, 'Neg-insa sa egtulada aw kanan se ibatanan nga kananan din duma te kandin emenge tinuludaan te pegsaulog te Pista te peg-okit te Anghel.' ¹⁵ Ipekita diritso din kenyo se dakel nga ibatanan ton diatas nga kompleto te kegemitan aw neandam din. Doton kaw tigilan te kenitadon panihapon." ¹⁶ Nasayo se duwa nga kandin egsugo, aw te pegdating dan. ¹⁷ Te pegsiklap din, dimating si Jesus aw se kandin sempulu teg duwa ke menge Apostoles. ¹⁸ Se kimaen dan una kidoen te lamisa, minikagi si Jesus, "Te benal niyan, kegihan ko sikenyo nga doen sibad kenyo nga duma ko dini kimaen traydor kanak. ¹⁹ Te pegdineg nidekey te menge Apostoles, nepelek dan gayed aw negpesellinay dan mig-insa kandin, "Kana kanak?" ²⁰ Minikagi si Jesus kandan, "Se migtraydor kanak sibad kenyo te sumpolo tegduwa se timogen te pan diya te lipong duma kanak. ²¹ Siak se bata te otaw imatayan so nayan se nesulat te kesulatan. Meneng alaot se otaw nga megtraydor kanak. mepiya pa kandin se weda ke otaw." ²² So nayan se kimaen dan pa, nengabat si Jesus te pan, egpasalamatandin ini te Timanem aw nayan pigbela-bela. Pegkepenga binegayan din se kandin menge tinuladaan aw minikagi, "Pangabat kaw aw kani niyo. So nayan se lawa ko." ²³ Nayan nengabat dan te inemenen, negpeselamat te Timanem, aw inbegay din kandan te kedita dan mininem. ²⁴ Minikagi si Jesus, "Siini se kanak dipanag nga pig-ula alang te keita menge otaw. Yan se negpemenal nga doen kaling nga kesobatan te Timanem doton te menge otaw. ²⁵ Se benal niyan, eked a din inem peman te inemenen likat te uabs taman te aldaw nga minem a te kaling nga inemenem doton te gingharian te Timanem." ²⁶ Nayan kimanta dan te menge pegdayeg te Timanem aw pegkepenga dimoton dan te bontod te menge Olibo. ²⁷ Minikagi si Jesus kandin, "Kelahat niyo tomanan, kay se Timanem minikagi kidoen te kesebotan, 'Imatayan ko se migbantay aw megketibulaag se menge karnero.' ²⁸ Meneng penga ko meantay, muna a kenyo doton te Galilea." ²⁹ Minikagi si Pedro ki Jesus, "Bisan pa te kelahat dan tumanan kamno, siak eked a.' " ³⁰ Minikagi si Jesus kandin, "Se benal, kwani delem, te eked pa pegkolaak se manok te mekeduwa, boloni a te meketelu." ³¹ Meneng onto minikagi si Jesus, "Eked kepakay ibolon ta bisan pa imatayan a pa dan duma no." Iling peman kenyan se inikagi te kelahat din menge tinuladaan. ³² Nayan dimoton dan te ogpaanan nga engadanan Getsemane, te pegdateng dan doton, minikagi si Jesus te kandin menge tinuladaan, "Pennuu kaw una dini so megtwala-tawal a una." ³³ Inibing dan si Pedro, Santiyago, aw si Juan te muna, nepelek onto si Jesus. ³⁴ Aw minikagi sikandin kandin, "Iling a din te mepedong so onto nepelek. Petanan kaw dini aw pegtukaw." ³⁵ Nayan dimotan pa onto sikandin te muna, limemlem sikandin te tana aw negtawal-tawal nga kon meinang eked dan bag onto pe-antosi. ³⁶ Negtawal-tawal sikandin, "Amay, se kelahat nga butang meinang no. Nayan eka bag egpadayon te dumating nga pag-antos ko. Meneng kana kanak pegbuot se angay metuman aw kena se kamno kebubut-on." ³⁷ Te pegliko din doton te kandin telu ka tinuladaan nasaban din dan timadugi. Minikagi sikandin ki Pedro, "Simon, timedugi ka? Eked ka bag kedi peketayod bisan din sibad ulo si oras?" ³⁸ Aw minikagi sikandin kandan, "Kaluka kaw aw pegtawal-tawal amon eked kaw kiibing te pegsulay, ebeg te kenyo Ispirito megtawal-tawal meneng melumay se kenyo lawa." ³⁹ Nesayo toda si Jesus doton te muna, aw negtawal-tawal te unawa heman te pegtawal-tawal. ⁴⁰ 40 Pegkepenga limiko sikandin heman te kandin menge tinuladaan aw nasaban din heman dan timadugi, kay ketedugihen dan onto aw weda dan katagahi aw eden se kandan egtubag kandin. ⁴¹ Te iketelo te pegliko din kandan minikagi sikandin, "Timedugi kaw pa gayed aw mig-etud? Tama den yan! Siini den se penahon nga siak nga bata te otaw itugyan doton te menge mekesasala. ⁴² Na! Tengtengi, siini den se otaw migluib kanak." ⁴³ Telopo minikagi pa si Jesus, dimateng si Judas nga sebad ka menge Apostoles, timaking kandin se medita menge otaw nga nengibing te menge podok aw menge bebunal. Egsugo din se menge kalangkawan te menge pari menge megtulada te punu aw menge pengolo te menge Hudiyo. ⁴⁴ Tapay den dan migsabot aw eden se inangeni Judas te pegdakep ki Jesus aw menonen se kandin inangen nga pengilalalan, "Te otaw nga kanak edekan yan se kenyo egpamaha. Dekepi niyo sikandin aw ibingi te pigtonggoan gayed te onto mepiya. ⁴⁵ Nayan te pegdateng i Judas, demeleg sikandin doton ki Jesus aw minikagi, "Egtulada!" Aw pig-edekan din sikandin. ⁴⁶ Aw pigdakep dan si Hesus. ⁴⁷ Meneng doen sebad te menge dumai Hesus nga mig-ugot te kandin, ispada aw egtigbas din se suguenen te pengolo nga pari aw netepo se tilinga nini. ⁴⁸ Minikagi si Hesus te menge negdakep kandin, "Tulisan a lay keilangan gayed mengibing kaw te menge podok aw menge bebonal te pegdakep kanak? ⁴⁹ Aldaw-aldaw doton a te simbahan migtulada aw doton kaw peman weda a niyo dekepi. Meneng keilangan nga mehitabo ini amon metuman se menge nesulat te punu te kagi tepad kanak." ⁵⁰ Nayan egtahanan sikandin te kandin menge tinuladaan aw kimadas se kelahat dan. ⁵¹ Doen sebad ke telaki nga maama doton nga simunod ki Hesus, olo migdiping sikandin egdakep heman te menge sundalo. ⁵² Meneng kimadas sikandin nga wedad kelawasen, kay nesagmit dan man se kandin lalapid. ⁵³ Inibing dan si Jesus te balay te pengulo nga pari doton negtipon se kedekelan te menge pari, se menge pengulo te menge Judio, aw se menge megtulada te kagi. ⁵⁴ Simunod heman si Pedro meneng mediyo sikandin ki Hesus. Minawop sikandin te duwangen te balay te pengolo te pari aw minonsad duma te menge egbantay dapag te apoy amon meinitan. ⁵⁵ Se kedekelan te menge pari aw se kelahat menge sakop te hukamana te meneg Judio nengaha dan te ibidinsya tepad ki Jesus amon ipaimatay dan sikandin, meneng wedad palos kinita dan. ⁵⁶ Medita se migtistigo aw menge migkebolalaw tepad kandin meneng weda peg-unawa se kandan menge inikagi. ⁵⁷ Doen menge otaw pa gayed doton nge tinistigo tepad ki Jesus, minikagi dan, " ⁵⁸ Dinineg day sikandin nga minikagi, gobalen ko siini simbahan nga pig-inang te otaw, aw awop te telo si aldaw petindegen ko se lain nga simbahan." ⁵⁹ Meneng se kandan menge inikagi weda peg-unawa. ⁶⁰ Timindeg ton te tenge-tenga se pengolo te pari aw mig-insa ki Jesus, "Wedad ka lay itaba te menge indan tepad kamno?" ⁶¹ Weda taba si Hesus. Nayan pig-insa sikandin heman toda te pangolo te pari, "Sikona gaw se Cristo bata te dalaygon nga Timanem?" ⁶² imaba si Hesus kandin, "Ee, siak, aw kitaen niyo yan nga siak se bata te otaw nga munsad te bibang te metolos nga Timanem, aw komi ta kaw heman kanak kidoen te menge labon te kelengitan nga siak kwani limiko dini te keneyonan." ⁶³ Te pegdineg nidekey te pengulo te pari, eglisi din se kandin saol te keopal aw minikagi, "Kana den keilangan se menge tigtigos! ⁶⁴ Dinineg niyo se kanin pegtempeyuyu dan te Timanem. Eden se kenyo inangen kandin?" Pighukman sikandin nga imatayan. ⁶⁵ Tigteptepan si Jesus te kedita dan. Sinempengan dan se mata din aw sinumbag, aw minikagi dan, "Na antuki akon aw sine nenombog kamno?" Inabat din ayas sikandin te menge megtonggo aw gayed dan pigsampak. ⁶⁶ Telobo pa doton si Pedro te duwangen, minokit se sebad te menge baye nga suguenen te kagi te pari. ⁶⁷ Te pegkita din ki Pedro nga mig-ingadang dapag te apoy, enenoet din onto sikandin aw minikagi, "Sikona gaw se egduma i Jesus nga tege-Nazareth." ⁶⁸ Meneng migbolon sikandin nge minikagi, "Weda a ketagataga aw eden kamno inikagi." So nayan domotan sikandin te lubangan peluwa te oras migkulaak se manok. ⁶⁹ Doton kinita din heman sikandin te suguenen nga baye aw minikagi sikandin heman te menge otaw doton, "Se otaw sibad te menge pigduma i Jesus." ⁷⁰ Meneng eglimod den peman e Pedro. Pegkekwani-kwani pa mikagi se menge otaw doton, "Duma ka din gaw kay tege- Galilea ka man heman." ⁷¹ Maneng onto beling megsapa si Pedro nga eg-ikagi, "Bisan mamatay a pa. weda a palos kilala te otaw nga kenyo egkegihen siyan." ⁷² Nayan negkolaak din peman se manok, aw neaneng-anengen i Pedro se inikagi kandin i Jesus, "Te eked pa pegkolaak se manok te mekeduwa, boloni a heman te mekeleb." Aw migkelag sikandin onto.