¹ Siak se Pbalo, igkeleboso tepad kay negesilbi a ki Cristo pineokit te pengsanyaw nga kenyo menge kena Judio neapil heman te penelangin te Timanem. ² Sigorado gayed nga dinineg niyo nga pineokit te grasya te Timanem igseligan a din nga meinang megweweli alang te kenyo kepiyaan. ³ Gipadayag te Timanem kanak si kandin ineles nga pakang alang kenyo nga menge kena Judio, nekesolat a den te mebaba bahin kani. ⁴ Kon besahen niyo se kanak pegsolat, metegahan niyo nga nelebetan ko onto se plano te Timanem alang kenyo pineokit ki Cristo. ⁵ Kedengan weda yegyagi te Timanem doton te menge otw se bahin kani nga pakay, meneng siini igyagyag din den te kandin menge apostoles aw menge propeta pineokit te Ispirito Santo. ⁶ Aw siini se kandin pakay, nga pineokit te mepiya belita bahin ki Cristo, te menge kena Judio meinang menge menonod te menge pakang te Timanem doma te menge Judio aw minang dan sakop te sebad ke lawa tepad kay sikandin kidoen den heman ki Cristo Jesus. ⁷ Tepad te gasa te Timanem aw pineokit te kandin tolos neinang a megsesanggaw te mepiya belita. ⁸ Siak se onto obos te kelahat menge otaw te Timanem, meneng binegayan a te Timanem te kehigayonan te pegsangyan menge kena Judio te mepiya Belita tepad te eked ketogkad nga menge penelangin nga lekat ki Cristo. ⁹ Se Timanem nga neg-inang te medita menge kedu'nan weda peg-insan ki bisan sinu kon eden se kandin ineles nga pakay. Meneng siini igsogo a din te pegyagyag te kelahat kon eden nga pemeokit din igtolo sida nga pakay. ¹⁰ Amon pineokit te menge egpemenal mepekita din sini te menge pengolo aw te menge doen tolos te kelengitan kon eden gayed se kandin kaalam nga iyagyag din te negkelain-lain nga pemeokit. ¹¹ Sini den sini se kandin pakay bisan pa gebii, aw netoman din den ini pineokit ki Cristo Jesus nga kenitadon Timanem. ¹² Tepad te kenitadon pegtoo Cristo aw tepad kay sikita kidoen den kandin, mekedolod kidon den te Timanem nga wedad ketalaw pegagpas. ¹³ Nayan hengyoen ko sikiyo nga ika niyo egpelomay tepad te kanak menga peglumun kay sini alang man te kenyo kepiyaan. ¹⁴ Te kanak pagpamaladong te pakay te Timanem ¹⁵ nanglohod a te pegsimba kandin, sikandin se amay te kelahat nga dini te kelimotan aw doton te langit, nga kandin tinawal nga sakop te kandin pamilya. ¹⁶ Metolos onto sikandin, nayan eg-ampo a kandin nga begayan din te tolos aw kagsen te kenyo ispiritohanong pedowan pineokit te kandin Ispirito. ¹⁷ Amon si Cristo mogpu kidoen te kenyo posong tepad kay te kenyo pegtoo, ig-ampo ko heman nga domalid kaw melig-on te gogma te Timanem, ¹⁸ amon nga sekiyo aw se doma pa nga menge otaw te Timanem mekelabet kon eden kedakel se gogma i Cristo kenitadon. ¹⁹ Hinaut pa nga metegahan niyo se kandin gogma bisan aw eked ini kelebeti te hingpit amon kon eden se kidoen te Timanem komidoen heman kenyo. ²⁰ Ideyen tadon se Timanem, lepad kay pineokit te kandin tolos nga negeiwal dalem kinitadon, se kandin meinang labaw pa kay te kenitadon pemoyoen e aneng-aneng. ²¹ Ideyen te sikandin te kahangtoran tepad te menge kepiyaan nga ininang din kinitadon nga menge egpemenal nga kidoen kidoen ki Cristo Jesus. Amin.