¹ Kanak si Pablo neinang sugunon i Cristo Jesus lekat te ibeg te Timanem nengomusta a kenyo menge otaw te Timanem kidoen te Efeso, sikeyo menge egtoman te pegsonod ki Cristo Jesus. ² Hinaut medawat niyo se tabang aw kelinaw likat te Timanem kenitadon amay aw ki Ginoong Jesu-Cristo. ³ Iduyun onto se Timanem aw amay te kenitadon Ginoong Jesu-Cristo tanda te sikita kidoen ki Cristo, bigayan din kidon te kelahat menge tabang espiritohanon. ⁴ Seini menge tapay te Timanem meinang balaan aw wedad ikelindo te kandin etobangan pineokit te kenitadon pegsebad ki Cristo. Tanda te kedakel te pedowan te Timanem kenitadon, ⁵ pig-aneng-aneng den din tapay sikita meinang kandin menge bata pineokit ki Jesu-Cristo. Seini pineokit te kandin ibeg aw kebobot-on. ⁶ Iduyun tedon se Timanem tanda te kandin kepelahan tabang imbegay kenitadon pineokit te kandin kedekelan te pedowan bata! ⁷ So pineokit te dipanog i Cristo impelowa kidon, te kenita pa, pigwedad den se kenitadon menge sala. Pegkedakel te tabang te Timanem kenitado. ⁸ Pigbegayan kidon din te kebiyasa aw ketaga-taga ⁹ amon metegahan tedon se kandin ineles plano ibeg din inangen pineokit ki Cristo. ¹⁰ Aw domateng den se aldaw te kandin itagal, pineokit te kandin aneng-aneng, ibeg din pegsebadenn se kelahat kidoen te langit aw te tana aw ipesakop te pegpengibing i Cristo. ¹¹ Se kelahat menge sawol-sawol ininang te Timanem pineokit te kandin aneng-aneng aw kabubut-on aw pineokit te kandin aneng-aneng lekat pa kedengan, pinemalli kaw din den tapay meinang kandin pineokit te kenami pegsebad ki Cristo, ¹² amon kenami mona neglaom Cristo megduyun kandin. ¹³ Aw sikeyi heman meinang kidoen ki Cristo te siyan dinineg niyo se kebenalan, se mepiya indan si Cristo kedi yan se megpelowa kenyo lekat te sala, te siyan nemenal kaw kandin, pigbegayan kaw te Timanem te Ispirito Santo kandin impakang pengilala sikeyo kandin den. ¹⁴ Seini Ispirito Santo yan se kesigorohan mekinawa tedon isip kandin menge bata se impeakang te Timanem. Medawat tedon se benal kelowasan, tanda nini iduyun sikandin. ¹⁵ Nayan te dinineg ko se tepad te kandin pegpemenal ki Ginoong Jesus aw te kandin kedakel te pedowan te kelahat inenge otaw te Timanem, ¹⁶ dakel onto se kenak pegpesiotono te Timanem tanda kandin aw egtawal-tawal aw egpesiontong diya te Timanem tepad kenyo. ¹⁷ Egtawal-tawal ko doton te Timanem te kenitadon Ginoon Jesu-Cristo, se amay makagagahom se Ispirito Santo memegay kenyo te kaalam aw meindan kenyo se kebenalan tepad te Timanem amon kilalaen onto niyo sikandin. ¹⁸ Intawal-tawal ko heman megayan kaw te mepiya aneng-aneng amon metegahan niyo aw eden se kenitadon poglaom te kandin pegtawal kenitadon meinang kandin menge bata, aw amon metegahan heman heman niyo aw eden kedakel aw kepiya te panulundon kandin impakang diya te kandin menge otaw. ¹⁹ Intawal-tawal ko heman metegahan niyo te eked matupngan tolos te Timanem iya kenitadon egpemenal kandin. Seini tolos ²⁰ yan heman se tolos kandin ginamit te pegkeantay aw pegpeonsad ki Cristo kidoen te kandin kowanan dapit doton te langit. ²¹ Nayan kidoen te ongan te tolos i Cristo se kelahat doen tolos te pegdumala aw te pegpengolo. Se ketongdanan imbegay ki Cristo eked gayod matupngan seini o pengkey pa te domateng. ²² Impesalad te Timanem se kelahat tetolis i Cristo, aw ininang din sikandin pengolo te kelahat amon metebangan din se meng egpemenal, ²³ yan se kandin lawa, se kahingpitan din yan heman se naghingpit te kelahat.