¹ Siak si Pablo, ininang a suguonon i Jesu-Crsito minikagi te kabubut-on te Timanem, impeibing a diya amon meg-insa tepad te pegkinabuhi nge kandan insaad nge dawaten te menge kidoen ki Cristo Jesus. ² Simolat a kamno, Timoteo, iling ka te onto bata tanda te pegpemena no. Mepiya pe medawat no sen grasya, kaido aw kelinaw lekat te Timanem nge Amay aw ki Cristo Jesus nga kenitadon Timanem. ³ Megpesiontong a te Timanem nge gialagaran te kanitadon kemonaan aw yan heman sen kanak gialagaran nge doen melini nge konsensya. Megpesiontong a kandin te kanak peg-aneng-aneng kamno gayed kidon egtawal-tawal kandin eldew aw delem. ⁴ Aw meaneng-anengan a nikaw te kanak pegkeleg te peglekat ko kidoenn, memingaw a kamno, ebig ko nge megkita kidon toda amon meluba a onto. ⁵ Weda ko kelibali se kamno pegpemenal, iling heman te pegpemenal nikaw te apo nge si Loida aw se inay nikaw nge si Eubice nge kedengan pa egpemenal kay kamo, aw netagahan ko nga kidoen heman kamno, sen pegpemenal iling kandin. ⁶ Yan se doun ibeg ko nge sikamno meg-aneng-aneng ka nge megkeaseb ka te peggamit te kebiyasa nge imbegey te Timanem diya kamno kedengan intedong nikaw sen kanak belad diya te olo no. ⁷ Sen Timanem weda pemegay kenitadon te kandin Espirito Santo amon mepiya ki se kenita te peg-atobang te menge otaw, aw kena amon megpekegsen kidon aw pegtabang nge megkedakel se pedowan tadon te doma aw meketameng kidon te kenita pegkeotawon. ⁸ Nayan ika egkeyaya te peg-indan no te doma tepad te Timanem tadon. Ika heman egkeyaya nge nekelaboso a dini tepad kandin, meneng pig-egda sikandin te menge otaw se nelimahan tepad te mepiya indan pineokit te tabang se gahom te Timanem. ⁹ Tinawal kidon aw impelowa amon inangen kidon sakop din weda din ini inangi kay mepiya sen inenang tadon. meneng tanda te kandin pegkeotawan nge ibeg aw tabang din se weda a sen kenayonan, imbegay din ini tabang kenitadon pineokit ki Cristo Jesus. ¹⁰ Meneng seini olo iyan impekita kenitadon te pegdateng i Cristo Jesus nge kenitadon mekelowa. Pigtalon din sen gahom te kematayon aw impekita kidon pineokit te mepiya indan nge meangkon tadon te pegkinabuhi nge wedad tomanen. ¹¹ Aw ininang a te Timanem nge suguonon aw megtolada amon meg-indan siyan te mepiya indan. ¹² Aw yan doun se piglikatan nge mig-antos a songkani, meneng weda a keyaya se kenako negemakan seini tepad kay nekilala ko si Cristo nge kanak pigseligan, aw nesiguro ko gayed nge mekeinang sikandin te pegtonggo diya inselig din kanak lamig te aldaw nge sikandin lomiko. ¹³ Sen kebenelan nge intolada nikaw netegahan heman iyan lekat kanak yan heman sen dapat nikaw itolada, nge doen kebenalan te Timanem aw doen pegkedakel te pedowan nikaw te doma otaw, aw yan sen dapat tadon inangen se kadi kidoen ki Cristo Jesus. ¹⁴ Pineokit te tebang te Espirito Santo nig-ugpa kidon imandagi sen mepiya nge pegtolada no te kebenalan nge insalig diya kamno. ¹⁵ Netegahan no beyi nge kedita te egpemenal te Probinsya te Asin tininggetanan a pengkey si Figelus aw se Hermogenes. ¹⁶ Meneng ibeg ko nge keidowan te Timanem se Onesifero aw sen pamilya din, gayed a din gipalig-on weda sikandin keyaya pengkey nekelaboso a. ¹⁷ Se pegdateng din te Roma, nengemaha sikandin din kanak lamig kinita a din. ¹⁸ Aw netegahan ko heman aw eden sen kandin pegtabang kanak doton pa te Efeso. Ibeg ko nge keidowan sikandin te Timanem aw domateng den sen aldaw te peghukom.