¹ Dili ba gawasnon a man? Dili ba Apostol a? Dili ba negpekita man kanak mismo si Jesus nga kenita Timanem aw sikenyo neinang man mge soguenen i Cristo tepad kanak? ² Bisan aw alang te doma kana a sibad ka Apostol, Apostol a onto alang kenyo tepad te kenyo mismo kimita te mge neinang ko kay peneokit kanak sikeyo kidoen te Timanem. ³ Yan ini se kanak ikelubag te mge otaw nga weda pemenal nga siak Apostol. ⁴ Te kenami pegke Apostol, wedad kay lay ketungod te pegdawat te mekaen aw inimenem lekat te mge otaw nga nekedawat te kenami pegtulada? ⁵ Aw wedad kay bag lay ketungod te pegpetaking te esawa nga memenal te kenami mge pegkesayo iling te ininang te mge kedowa te Timanem, i Pedro aw te doma mge suguenen? ⁶ Eden lay bag kedi, sikami olo ni Barnabas se keilangan meghago amon doen penginabuhian? ⁷ Doen lay lay sundalo nga sikandin olo se nenildo te kandin pegkeotawen serbisyo doen lay menanem nga eked din kepuli se pongo te kandin pigtanom? Aw doen lay mig-ipat te ayam-ayam nga wedad kandin bahin? ⁸ Se mge inikagi ko seini kana ini otawen nga peg-aneng-aneng, aw kana yan peman ini se egtulada te punu. ⁹ So nayan se nesulat te punu i Moises," ekag pogas te baka nangagiok. ¹⁰ Kay apil kay heman te kandin buot ipesabot se mge otaw megdaro aw meglagani, so nayan negtagad dan te mekedawat te bahin te abit niini. ¹¹ Nenanem kay kidoen kenyo te Espiritohanon mge beni, mebegat lay ba alang kenyo aw megtagad kay begayan kay mge kedunan nga kenami keilangan te meteg aldaw? ¹² Aw se duma mge migtulada doen ketungod te pegtagad nini lekat kenyo, labaw kay onto. Meneng bisan aw doen ketungod day te pegtagad te tabang lekat kenyo, weda day pehimosli se ketongod. Pinelabi day meg-antos se kelahat amon eked kebabagi se pegpekaylap te mepiya indan tepad ki Cristo. ¹³ Netagahan niyo man nga se mge nenemba kidoen te Simbahan kidoen peman pengabat te kandan mekaen? aw se mge nag-alagad kidoen te halaran mengabat dan peman te bahin te mge eghalad kidoen te halaran. ¹⁴ Te iling kenyan pemeokit simogo se Timanem nga se mge nekedawat te mepiya indan angay megtabang te pegbegay te mge keilangan te mge megtulada te mepiya indan amon mebuhi dan. ¹⁵ Meneng weda ko pehimosli se ketungod aw weda a peman sulat siini te pagpamasin nga bagayan a niyo. Mepiya pa mga mamatay aden beling kay te inangen ko ini. Siguradohen ko nga wedad bisan sine nekeabat te egpegarbo ko seini. ¹⁶ Weda ko pegerbohi se kanak pegtulada te mepiya indan, kay yan ini se kenak ketungdanan eked kepakay aw eked ko ini inangi kay alaot a aw eked ko tuladai se mepiya indan. ¹⁷ Negtulada a kay yan ini se kanak pinemalli nga trebaho, megtagad a peden te sildo. Meneng se benal, tinuman ko olo se kanak ketungdanan nga megtulada kay yan ini se egtugyan kanak te Timanem. ¹⁸ Eden man ini se balos kanak tagadan? Se eg-aneng-aneng ko nga balos yan se keleba te kanak pegtulada te mepiya indan weda a pegpesildo bisan aw doen ketungod ko nga megpesildo te kanak peghago te pegsangyaw te mepiya indan. ¹⁹ Pengkey weda nagaulipon kanak nagapaulipon a te kelahat amon medita pa onto se kanak meibing doton ki Cristo. ²⁰ Yan iyan aw dumaen ko se mge Judio migkenabuhi a iling te Judio, amon meibing ko dan doton ki Cristo. Nayan pengkey eked a sakop te belaud te mge Judio, sinonod ko ini amon meibing ko dan te kenita pegpemenal. ²¹ Aw yan peman aw domaen ko se kana Judio. Weda ko sunodi se punu nga alang te mge Judio aw kana sinonod ko se pegkinabuhi te mge kana Judio amon meibing ko dan doton ki Ginoong Jesus. Wed ini pegpesabot nga weda ko sunodi se mege insogo te Timanem, kay se benal sinonod ko se mge insogo i Cristo. ²² Nakig-angay a te kelahat pengkey eden se kandan kehimtang, amon pengkey se pemeokit meluwas ko se doma dan. ²³ Ininang ko se kelahat so amon ibeg ko mekeambit te mge penelangin duma te mge nekadawat te mepiya indan. ²⁴ Te kenita pegsunod te Timanem iling kid te komagnan te lumba. Pengkey medita man se mapil meneng sebad olo kandan se mekedawat te ganti? So nayan imandayi niyo se kenyo pegkagnan amon mekedawat kaw te ganti. ²⁵ Se komagnanay negbansay onto te mepiya tinekingan te disiplina te kandin pegkeotawen amon mekedawat sikandin te ganti, meneng se ganti nga kandin medawat lumabay yan olo. Sikita mge memenal neningkamot teman te kinita pegsunod te TImanem amon mekedawat te ganti. Meneng se ganti nga kinita medawat eked ketalon. ²⁶ Yan iyan se kanak peg-alagad te Timanem dimeleg onto se kanak pegkagnan pesalo te dag-anan. Aw kon te baksing pa wed a penembag te kalamag. ²⁷ .So nayan aw doen e kana mepiya nga pangandoyen se kanak lawa. Pigpeningkamotan ko onto nga pogongan ini kay penkey aw mepenga ko metoledai se doma, siak pa kwani se eked pekedawat te ganti lekat te TImanem.