¹ Mo sulod ku, kono no kinangolan no masalig ka ogkayimu no talagpanulu su nataga kow no kanta so talagpanulu, amana no malogon ka poglogpad kanta du to duma. ² So kanta tibo ogmakasalo ka otow no kono ogkasayjop to poglalag-lalag din, waro naan sayjop diyo to kandin, hoy ogkabuutan din daan ka intiru no lawa rin. ³ Aman ko ogbukaruhan ta ka kuddo so oyjow ogtuu kanta, ogpakaruma-ruma kandin agad hondoi ta igpabayjo. ⁴ Tongtongi now daan ka mo barku, agad dorakol kandan no oghiyupon to mahagbot no kalamag, ogpakaruma iyan ko hondoi igpabayjo to kapitan, tungod to sikan so doisok no ogngaranan to timun. ⁵ Iling daan duon ka dilo, agad ko doisok sikan no baad to lawa di amana ogmakapangagi. Sum-sumana now kamonu kaluag ka puwalas no ogkasiban to doisok no hapuy. ⁶ No ka dilo, ogpokoiling to hapuy no niglibutan to opakaroroot. Ogpakaroroot sikan to intiru no pogkootow ta hoy ogpakasilab to kanta no pog-ugpo ka sikan no hapuy diyo ogligkat to linow no hapuy. ⁷ Ka tibo no kalasi to mo manguwanganon no mo ayjam, mo manuk-manuk mo uwod, hoy mo ngalap, ogkaayun no ogkasaparan to otow. ⁸ Di waro otow no ogmakasapad to dilo, dorooti soini no kono ogkahawiran, hoy naponu to oghilu no ogpakamatoy. ⁹ Ogkagamit ka dilo ta to pogpasalamat to Magbobayjo hoy Amoy ta, hoy ogkagamit dod man on to pogdilus to duma no mo otow no inhimu iling to ula-ula to Diyus. ¹⁰ . To sikan dod no bobu oglihawang ka pogdayan hoy pogdilus mo sulod ku, kono poron no iling duon. ¹¹ Kono ogkaayjun no sagboka ro no subsub ka ogligkatan to maroyjow no woyig hoy to maroot daan no woyig. ¹² Mo sulod ku, ka kayju no igira kono ogpangunud to ulibu, no ka paras, kono ogpangunud to igira. No ka mapoit no subsub kono ogpakabogoy to maroyjow no wohig. ¹³ Ko duon diyo to kaniyu no duon namaanan hoy magaan ogpakasabut, kinangolan no igpapitow rin soini duon to pog-ugpo din pinabayjo to mo maroyjow no himu no ogdumaan to pogpadiralom ligkat to kandin no namaanan. ¹⁴ Di ko duon diyo to pusung nu no amana ogkaayjat hoy lugod kono ogkaayjun no ogpangagi ka to dakol ka namaanan nu hoy kono ka uubat. ¹⁵ So sikan no kaalam, kono no diyo ogligkat to dibabow, ko kono kayi ro to ampow to tano, kono ogligkat diyo to Diyus ko kono, diyo to agalon to mo busow. ¹⁶ Ko hondoi ka pogkasukul hoy ka poghahan-han, duon daan ka kasamuk hoy ka tibo no maroot no mo himu. ¹⁷ Di ka kaalam no diyo ogligkat to dibabow, hun-a to tibo waro soini natagahi to maroot, igkarangob oggoynawa to kalinaw, maayad-ayjad to duma maparuma-ruma, hiid-uwon, maroyjow so oghimuwon, kono og-alam to ogtanuwon hoy kono ogpapitow-pitow ro. ¹⁸ Ogpakaani ka to pogkamatarong ka otow no oggoynawa to kalinaw no ogpamula to kaliyaganan.