¹ Nzara yanga yakawanda panyika. ² Pawakapedza kurya zvakabva nazvo kugipita, bhabha wawo wakati: Whiriraizve muti tengere zvokurya." ³ Djuda wakadhaira: "Munhu mukuru wekweneyo wati vunza kuti amundionizve hope yangu kana musina kuya ne hama yenyu mudhoko. ⁴ Mukati tuma ne hama yedhu idhoko , tinoenda uye tinotenga zvokurya tomu unzirai. ⁵ Asi, kana mukasati tuma naye, ati whiriri. Ngokuti munhu wativunza: Amuzoi onizve hope yangu, dhangani kuya nehama yenyu idhoko". ⁶ Iziraeri wakawati: "Ngei mandi itira zvakashata kudharo, metchimuvunza iyena munhu kuti tine hama idhoko?" ⁷ Aona akadhaira kuti: Munhuwo wakati vunzisa zvakawanda pamusoro pedhu uye pe hama dzedhu. Yena wakati: Bhabha enyu anorarama? Muno hama imweni? Isusu takadhaira se muvunzo dzakatipa. Tai zo ziya sei kuti atchatikumbira kudha kuona hama yedhu?" ⁸ Djuda wakati kuna Iziraeri, bhabha ake: Nditumei naye. Isusu tino simuka kuti tiende kuti tirarame uye kuti tisafe, isusu, imwimwi, ana enyu. ⁹ Inini nditchawe tchithembo kuna yena uye ndinomutungamirira. Kana inini ndikatama kumu unzisa uye ndodzi pangidzira pamberi penyu, ndinozogara ne mhoswa nekusingaperi. ¹⁰ Nokuti, dhai atizi kunonoka , dhai ta whirira pano ketchipira." ¹¹ Bhabha ake Iziraeri, akati: "Kana zvakadhai, itai zvenezvo. Torai zvimwe zviro zvakanaka zvekurya zvatinazvo mupe munhuwo: zvino nhuwhira, zvinorywa, utchi, mafuta, uye ne mandui. Torrai munyara dzenyu mare yaka pinduwa. ¹² Torraizve mare yaka whiridzuwa pakutanga yanga iri muma bhunduwa. Dhangana pakaitika kunganika. ¹³ Torai futi hama yenyu. Mukai uye endai kune munhuwo. ¹⁴ Uye Mwari Une Masimba ese ngaku pei ngoni Dzake pamberi pemunhuwo, kuitira kuti asunungure hama yenyu imweni uye na Benjamim. Ndika bvisirwa ana, hino nditchagara ndisina ana." ¹⁵ Hino anarumewo akatora zvese, mare yakawirikidzuwa uye nezvimweni zvoko pasa munhuwo, uye na Benjamim. Aona akamuka oenda kuGhipita , uye akadzipangidzira pambveri pa Djosefa. ¹⁶ Djosefa paaka ona Benjamim nawo, wakati kune mukuru we asenzi ake: "Torra anarume aya uye apinze mumba, uraya tchinyama tchimwe uye mobhika, kuitira kuti aswuswure neni". ¹⁷ Mukuru we asenzi wakaita se zvavunzuwa na Djosefa. Yena wakatora anarumeo kakuwa pinza mumba ma Djosefa. ¹⁸ Anarume aya aithiya ngokuti aka unziswa kumba kwa Djosefa. Aona akati: Izvi ngondaya ye mare yaka kanduwa muma bhunduwa medhu kuunzisweko kuno. Ngokuti munhu uyu urikutswaka mhoswa kwatiri. Yena kana kuti tora uye kutisunga se nhapuwa, uye kutora zvinyama zvedhu". ¹⁹ Aona akakwedhera kuno mukura pa asenzi aDjosefa, uye akabuya naye pamusuwo we nyumba, ²⁰ etchiti: Ndizuwei, ishe, isusu taka uya pakutanga kuzotenga zvokurya. ²¹ Zvakazoitika kuti, pataka guma kumba, takafungura mutoro dzedhu, uye takagumira mare yese yataka tenga nayo zvatanga tinazvo iri padhenga pe mutoro dzedhu. Isusu tai unzisa munyara medhu. ²² Uyezve taunzisa mare imweni munyara yekutenga kuti titenge zvokurya. Saka atizii waka kanda mare yedhu mu mabhunduwa edhu. ²³ "Musenzi mukuru wa Djosefa wakati: 2 Rugare ngariwe nemwi, musathiye. Mwari wenyu uye Mwari wa bhabha enyu ndiye dhangani waka kanda mareyo . Inini ndaka tambira mare yenyu," Hino yena mukuru we asenzi a Djosefa wakaa unzisira Simioni . ²⁴ Musenzi wa Djosefa wakapinza mukati me nyumba ya Djosefa. wakaa pasa mvura, uye aona akasuka murenje dzao. wakapasa tchokurya kune mbongoio dzao. ²⁵ Aona akagadziriri kuitira kuti Djosefa akauya amupase zviya zva anga amugatsirira, nokuti anga azuwa kuti anoswuswura naye. ²⁶ Djosefa paka guma, aona akaunzisa zvamu gatsirira ari mumba make uye akapfukama pasi pamberi pake. ²⁷ Yena waka vunzisa kuti muri sei uye wakvunzisa kuti: "Bhabha enyu ndota yamakabuya yokare, ari zvakanaka here? Atchiriku rarama here?" ²⁸ Aona akati: Musenzi wenyu, bhabha edhu, ari zvakanaka Uye atchirikurarama". Akamupfukamira . ²⁹ Paka simudza hope hake, Yena wakaona Benjamim, hama yake, mwana wa mai ake, uye akati Uyu ndiye hama yenyu idhoko yama kareketa?" Hino wakati: Mwari ngawe newe, wana wangu." ³⁰ Djosefa waka kasika kubhudha musara, ngokuti waizuwa kudhara mumwoyo wake ngondaya ya hama yake. Yena wakatswaka mbuto yokutchema, waka enda mukwartu uye menemo wakatchema. ³¹ Uye waka karawa hope uye wakauyazve. Yena wakdzi bhata, etchiti: "kandai zvokurya pathafura". ³² Wasenzi waka kanda zvokurya uye akapa Djosefa ega, uye hama dzake dzogao. uye waGhipita anga aripo akapuwawo pawo ega, ngokuti maghipita anga asikaiti kurya na maheburu, nokuti izvi zvairambuwa noma ghipita. ³³ Hama dzake dzaka gara pamutcheto naye pamwepo uye akakanduwa se ma bharirwe awo kubva wekutanga dzamara wekupedzesera. Aona akashamisika zvikuru. ³⁴ Djosefa wakaapa umwe ne umwe zvake zvokurya zvnga zviripo pamberi pake. Asi zvaakapa Benjamim zvanga zvakawanda uye zvaipethuwa kashano ne zvanga zvine amweni. Aona arya uye akadhakara naye.