¹ Vano ori wohilevenliya we, on'hukhumu, kontha, wa yeeyo enohukhumwaa nkhwaa, onithukela omwaneene. Kontha we, on'hukhumu, onaapanka tjithu tjen'nho. ² Massi hivani ninaatjuwela wiir ohukhumu wa Muluku eri wonayeeli ni khweeli aawananaka yaale anpanka wa tjithu tjen'nha. ³ Massi nvarele nteko elaa, wakhala we, onahukhumu yaale ampanka tjithu tjen'nha, nen'na tjoo n'napank tjen'nha, onkokufia tjani nihukhumu na Muluku? ⁴ Walaani onaatanhifu mihakhu tjomaana, nuulemia wawe ni nuuvilela, n'hitjuwelaka wiira orera wawe nrima ori wiira wurwaane wo wituthuwa? ⁵ Massi nlatto wolipa nuwuuhalela wituthuwa wanrimaniwaa tjikhalaa wintjenrihelaka waweyova omwaneene oviruwiya wo nihuku nooviruwiya, nihuku ninkothonheriya nihukhumu nosariya na Muluku. ⁶ Yena nkovaha kuta nthu wo manan'na mamotja ephimelo tjomiteko tjawe. ⁷ Wo yaale, ankowisunka wo miteko tjooreera, anrweela waaria, nttittimiho ni wohitheka, Yena nkowava ekumi yo himala. ⁸ Massi onaawa oviruwa ni woopopihiya wa yaale anawikupali, ahininwelela ekhweeli, massi yinwelelaka yohisariya. ⁹ Muluku naawaana mahuviho ni ohaawatja wa eroho yapinaatamu epankale yoonhala, wopatjera majudeu ni hata magrego. ¹⁰ Massi waaria, nttittimiho ni nrettele onawaaweela otene yle apankale tjithu tjoreera, okhuma majudeu mpaka magrego. ¹¹ Kontha khuuvo othanliya wa Muluku, ¹² kontha otene yaale athekale wohi Nlamulo nkorimeela wohi Nlamulo tjitjam'mo, ni otene yaale athekale ninlamulo anahala ohukhumuiya ni nlamulo. ¹³ Kontha khanakhala owinwa Nlamulo ari anasariya wariyari wa Muluku, massi aneettela Nlamulo ankokhala ohimiakatjiya. ¹⁴ Kontha, owakathi amalaponi, ahirina Nlamulo, ampanka welamaleloaaya tjithu tjoo Nlamulo, ayenatja akhanle Nlamulo asineniaaya, poti ohikhalana Nlamulo. ¹⁵ Ayenatja an'nothonhera miteko tjimpheliya ni Nlamulo tjiri tjowantikhia wa nrimaniwaya. Mupuweleloaya hata tjin'novahera osahiti yeeyo nayenatja, ni muupuweleloaaya on'nahimeria ni on'nowakiha. ¹⁶ Eyo enkowirania nihuku Muluku ninkohukhumuaawe esiiri ya athu ooteene, wo nayeli ni hapariaaka, mwaha wa Yesu Kristo. ¹⁷ Wakhala wiira we onitjihana Judeu ni omumulaka mwi Nlamuloni, ni on'nikukhuliha mwa Muluku, ¹⁸ ni on'notjuwela Othuna wawe, ni on'nokupali tjithu tjiri tjoorera, kontha ohinthutjihiya ni Nlamulo, ¹⁹ ni wakhala ohotjiviheriya wiira we onawahoola ohoona, nthuko wa yaaleari mwiipiphini, ²⁰ mwinthutjihi m'motja wa yaale ankhotta, mwinthutjihi aanamwane, ni ohaana mwi Nlamuloni wo manan'na wotjuwelatja ni wekhweeli, vano wo yeeyo onawuphuanha manan'na okhala waa. ²¹ We onaasomiha akhwaa, khuniisomiha omwaneenia? We onlalia wiira ohin'nhiye, onawin'nha? ²² We oneera wiira niheetteke oluva, on'noluva? We onkhottela anluku ohikhala, onawin'nha enupa yo mavekelo? ²³ We onittittimiha mwi Nlamuloni, khunon'hisimu Muluku nlatto wo hinwelela Nlamulo? ²⁴ Ntoko tjilepiyaaya: "Ntjina na Muluku khaninttittimihiya eriyari wa malaponi nlatto wa winhu". ²⁵ Wuulihiya, wekhweeli, on'novaha efaiita winwelelaru Nlamulo, massi, wahinweleleke Nlamulo, onkhala ntoko khawuulihiye. ²⁶ Vano, ohuulihiya asunkaka Nlamulo, khankhalihiya nthu owuula? ²⁷ Nthu ohuula eyareliyoaawe, asunka Nlamulo, khanuthukela, wiira, hata tjolepiya ni wowuulihiya, ori ohinwelela Nlamulo. ²⁸ Kontha khanakhala judeu paahi ri ota, wala kahi owuula ri watjulu wo ruthu. ²⁹ Massi ri judeu yoole ri n'hina wawe, ni wuulihiya ori wo wanrimani mwi N'nepani, kahi wo nayeli yowantikhiya. Ntjipo wa yoola nthuulakhaninwa mwa pinaatamu, massi wa Muluku.