¹ Kinaahala waavaha mahala Apwiya ninrimaaka wooteene! Kinaahala ottonka mitekotjawe tjooteene tjooreera. ² Kinaahala otteeliya, kinaahala woottottopelani; kinaahala wiipa mwantjinaninhu, owiirimu! ³ Awananyaaka yatthawa, anaamora, ni anaarimeela ohoolowinhu. ⁴ Kontha n'naakaakihaka; Nhu n'nookoma weehitjeniwinhu, nphuki ossariya! ⁵ Nhu n'hokhwitiri elapo nookhuwelawinhu wokhotto; Nhu n'haakwanhulatja atthu onpiphini ni n'hofutja muupuwelelotjaya woomalela. ⁶ Awanani ahomora phanka ookwanhuliya, wamorihaleenhu epoomatjaya. Muupuwelelotjaya tjooteene tjihorimeela. ⁷ Massi Apwiya anaakhala woohimala; Ayena yunpenle ehitjyaaya woopheela olamula. ⁸ Ayena anlamula olumwenku weenan'na wossariya. Ayena anpanka miruku tjossariya nlaponi. ⁹ Apwiya an'hala okhala nlipihero waatthu an'huvihiya, nlipihero woowakathi womikatjamiho. ¹⁰ Yaale antjuwela ntjinaninhu an'nookhuluvelani, kontha Nhu, Apwiya, khan'naahiya yaale anoopheelatjani. ¹¹ Mwaavuwihe Apwiya, an'hoolela oSiao; nlalyee nlaponi enpankakaaya. ¹² Kontha Nluku, nrukunussa ephome emwaressiye, naawuupuwelatja ni khanliyala wunla waatthu oohuvihiya. ¹³ Nkoonele ekiriri, Apwiya; nkiwehe enan'na en'huvihiyaaka naale ahinkitthuna, phinhu oopheela okivussa nmikhorani mwonookhwe. ¹⁴ Wiira kikhuwele ntjiponinhu nooteene! Nmikhorani mwamwaana aSiao, kinaahala otteeliya woopolawinhu! ¹⁵ Atthu ahotjama nmalikittini yaathipalyaaya; mettotjaya tjihovarihiya nmiryankhoni tjaavithalyaaya. ¹⁶ Apwiya ahiitjuweliha; Ayena anaakumihera malamulwaaya; atthu ootakhala mirima an'morela nmiryankhoni mwatjoopakatjaya. ¹⁷ Yaayo nkaatthwaayo an'hokoleela ottuli, anrweehiya nkhapure; n'no phuumalela waatthu ooteene anonliyala Nluku. ¹⁸ Massi yaale athanliye khan'hala oliyaliya, wala wanriiha waatthu oohuvihiya khun'hala oliyaliya. ¹⁹ N'vuwe, Apwiya; n'hin'hiye pinaatamu anitthemaka; wiira atthu alamuliye ohoolowinhu. ²⁰ Mwaamwaressatje, Apwiya; wiira atthu atjuwele wiira an'hala okhala ookhwatja.