¹ Apwiya, Nlukwaaka, kinootthawenlani Nhu! Nkoopole waale ankoomolaniha, nkikusse! ² Weenan'na ekhwaawe, ayenatja anaahala okikhumenla phanka kharamu, akaahulatjaka nphantte ninnphantte, ni khaavo nkookoopola. ³ Apwiya, Nlukwaaka, wakhala wiira ehaavo evaralyaaka yoohissariya, ⁴ wakhala wiira ehaavo evaralyaaka yootakhala wayoole aakiwiihera nrettele wala kinonttarussa n'wananyaaka woohinlattu, ⁵ vano, n'wananyaaka oomolanihe ekumyaaka ni akwanhulatje; yena akithipele vathi niitthaya. ⁶ Nvuwe, Apwiya, moorussiyaniwinhu! Mwaaweheehe awananyaaka! Npanke etthu weessonttyaaka ni nmalihere ekettelotjinhu tjossariya! ⁷ Elapo tjooteene tjithukumane wowoorukureeryani; mwaakhatje nipuroninhu. ⁸ Nhu, Apwiya, n'nophuka milattu nmalaponi, nkaakihere kontha kinassariya ni khiivo entjuwelaaka, Nluku owiirimu! ⁹ Miteko tjaatthu ootakhala tjiphiye woomaleloni, massi mooneehe anassariya, Nluku ossariya, Nhu, n'noona mirima ni muupuwelelo. ¹⁰ Mwinkitthwaaka onkhuma waNluku, Yoole noopola ninrima. ¹¹ Nluku namaphuka okhweeli. Khula nihuku, niithoonha vakina. ¹² Akhala ntthu oohiituthuwa, Yena naahala othonkola nttheerenawe nontthonkomanihera okhottoni. ¹³ Nluku nawiitthonkomaniha wiira an'wanane; naapanka mattheeryaawe ohassara. ¹⁴ Ntthu oohiloka nfenta yootakhala, nrupala moolumo ootakhala phuyaraka tjootakhala. ¹⁵ Yena naathipa nlikitti, nowinssa, noomorela mwaneene aathipa. ¹⁶ Mitekotjawe tjookwanhula tjin'mwaakulela mwaneene, kontha tjoovaratjawe tjootakhala tjin'hala omorela vamuruwawe. ¹⁷ Kinaahala waavaha mahala Apwiya mwaha wossariyaaya; kinaahala owiipela etjipo Apwiya Owiirimu!