¹ Mwiipele Apwiya. Mwiipele ntjina naApwiya. Arumeyi, mwiipele Apwiya, ² nhu n'naakokhorela Apwiya npaanimwaya, n'mapuwani monupa yaNlukweehu. ³ Mwiipele Apwiya, kontha Ayena phooreera; mwiipe etjipo wontjinanaya kontha phiyooreera opanka tjon'mo. ⁴ Kontha Apwiya ahiithanlela Jaco ni Israel phin'halan'nyaaya. ⁵ Kinaatjuwela wiira Apwiya phoolupale, Apwiyeehu phavirihenle waanluku ooteene. ⁶ Enpheelaaya Apwiya yooteene, Ayena anaapanka wiirimu, vathi, n'maatjini ni mapuro ootepa winssa. ⁷ Ayena anaawaana mahutte oottayi, wiira erupe epula, ni awaanaka ephyoo womapuro yaaryaaya. ⁸ Ayena yaahomwiiva owantjera oyariya owiigiipitu, atthu niinama. ⁹ Ayena yaaahokurussa mithoonhero nimiiriirya wiigiipitu, wa Farawo naanantekwaawe ooteene. ¹⁰ Ayena yaahokwanhula elapo tjintji ni yaahowiiva mamwene entji: ¹¹ Siom, mwene omamorreu, ni Ogue, mwene oBasa, nimapuro yaahooleliya ooteene oCanaa. ¹² Ayena yaahovaha elapwaaya phanka yoohalaniya, yoohalaniya wiisrael. ¹³ Ntjinanaya, Apwiya, khanin'malatho; Otjivelawaya, Apwiya, onkhala womakhoto ooteene. ¹⁴ Kontha Apwiya anawaakiha atthwaaya ni anawaafenta arumeyaaya. ¹⁵ Anluku eethiru owooru niiparatha, nteko won'matatani waatthu. ¹⁶ Yaayo attonttwaayo ahaana malaku, massi khaanuulumatja; ahaana meetho, massi khaanoona; ¹⁷ ahaana maaru, massi khaaniiwa, wala khan'mumulela mwaanomwaya. ¹⁸ Yaayo anaapanka ai phanka yaayo, ni yaale anaakhuluvela ooteene ari tjitjon'mo. ¹⁹ Anonttharenla Davi, mwaattittimihe Apwiya; anonttharenla Arao, mwaattittimhe Apwiya. ²⁰ Anonttharenla Levi, mwaattittimihe Apwiya; nhu n'naavuwiha Apwiya, mwaattittimihe Apwiya. ²¹ Oottopeliya akhale Apwiya oSiao, Ayena ankhala oJerusalem. Mwiipele Apwiya.