¹ Apwiya, mwaha wonfento wa Davi, muupuwele mahuvihwaawe ooteene. ² Muupuwele yene tjaaluphenlyaawe Apwiya, phanka tjanthanlalyaawe ooweryessa oJaco. ³ Yena aahiira: Akin'hala okela npaanimwaka wala akin'hala orupa wakoriniwaka, ⁴ akin'hala orupa wala akin'hala omumula ⁵ npaka wanphwanhaaka nipuro naApwiya, enuupa yaApwiya wa ooweryessa wa Jaco. ⁶ Nihiiwa yiiriyaka wiira nivuku niri oEfrata. ⁷ Niphwanhale nmattani mwa Jaar. Ninaahala orwaa npaani mwa Nluku; ninaahala waakokhorela nhaanimwaya. ⁸ Nvuwe Apwiya. N'mwe nipuroninhu noomumula, Nhu ninivukunenhu nonlipiherweenhu! ⁹ Anankutthweenhu aware woophwanela; amwaamineenhu akhale wootteeliya. ¹⁰ Mwaha wonantekweenhu Davi, n'hitthawe mweneenhu ntthapenleenhu. ¹¹ Apwiya yaaholuphela wa Davi; Yena khan'hokoleelatho ottuli: Nipuronawe kinaahala omweessa nmutjaawe n'motja. ¹² Assaanaayo yassunka waataanawaka waassomihalyaaka, assaanaayaayo anaahala wookoma weehitjeni womahuku ooteene. ¹³ Weekhweeli khweeli, Apwiya ahonthala Siao; Ayena ahontthunihera ehitjaaya. ¹⁴ N'na nipuronaka noomumula mahuku ooteene; kin'hala okhala vaava, kontha kinoothanla. ¹⁵ Kinaahala oreeriha ventji; ¹⁶ Kinaahala waavoniha amassikhini niiphaawu. Anankutthwaaya kinaahala waawariha woopwaa; amwaaminyaaya anaahala otteeliya. ¹⁷ Vaavale, kinaahala wuunuwiha ekuru ya Davi; ni kinaahala omweessera nthuko ntthapenlyaaka. ¹⁸ Kinaahala owoonihatja ehaaya awananyaawe, massi etthuvwaawe enaahala waarya.