¹ Essiyani, Apwiya okhalaka ottayi? Essiyani wiipithaka owakathi womikatjamiho? ² Atthu ootakhala mirima an'nomoomolaniha massikhini; akhale oovarihiya nmiryankhoni tjipankalyaaya. ³ Ntthu ootakhala nrima nawiikurumatjela wa tjootthuna wanrimaniwawe; yena nuulumatja niwaaruwana Apwiya. ⁴ Ntthu ootakhala nrima wiikukhuliha; yena khanonrweela Nluku; yena khan'muupuwela Nluku kontha khanon'hela efaita. ⁵ Tjoovaratjawe tjinhala tjonreerela, massi tjoophukatjawe tjinkhala ottayi wameethwaawe. Ayena anawaahuluwa awananyaawe. ⁶ Ni n'nuulumatja, wanrimaniwawe: Akin'moratho! Khatjin'niphwanhatho mikatjamiho. ⁷ Otakhalihiya ohotjara mwaanomwawe, wootha ni moolumo ootakhala ni owoopiha; nliminawe ninaarakaliha nookwanhula. ⁸ Yena niipitha mowaattamenla mwaatthuni; mapuro owiipithyaa, yena naamwiiva ntthu oohikhala; meethwaawe anonrweela ntthu oohikhala. ⁹ Phanka kharamu niipithela enama, yena nawanriiha wiira anvare oohuva. Yena nanvara amorela muntthaviniwawe. ¹⁰ Tjoopheelatjawe tjinkhala tjowuuputthiya noossiliya; an'morelatja nmatthaviniwaya oolipa. ¹¹ Yena n'nuulumatja, wanrimaniwawe: Nluku holiyala; Yena hovitha ekhovyaawe ni khanpheela woona. ¹² N'vuwe, Apwiya; ntaphule ntataninhu, Nluku! N'haaliyale oohuva. ¹³ Kontha atthu ootakhala mirima anan'hiiriha Nluku, wanrimaniwaya, yiiraka: Akinakhala awinhu? ¹⁴ N'hotjuwela, kontha n'naamoonessaka nvara tjoohikhala; oorimeela nookhuluvelani Nhu; Nhu n'naakhavihera ekhwaatjuni. ¹⁵ Ntankanhe moona wantthu ootakhala nrima ni owoopiha; munphukele milattu watjitthu tjootakhala tjooteene tjivaralyaawe, tjoonalyaawe wiira khan'nohala woonenla. ¹⁶ Apwiya amwene omahuku ooteene, atthu anawoomoliya nlaponiwaya. ¹⁷ Apwiya, Nhu n'nawiiwaka mwaha waatthu oohuva; Nhu n'naalipihera nrimaawe, Nhu n'namwiiwa mavekelwaaya; ¹⁸ Nhu n'nawaakiha ekhwaatjuni ni oohuva, wowiira hikhale n'hala omwiirihela etthu.