¹ Pwiya aahomwiirela Moises. ² Omuulumane Arao ni omwiirele: Mithuko tjoossaapa tjihaana tjimwaleelaka ohoolo wossaminin'nha waparihelakavale. ³ Arao haahopanka tjitjon'mo. Yena aahoparihela mithuko nssaminin'nhani wiira amwaleele, toko Pwiya tjaamwiirelalyaawe Moises. ⁴ Essaminin'yeeyo yaapankiye niiwooru yoophitiya npaka wiikaani, niikoopu tjoophitiya toko maluwa, toko Pwiya tjanthoonheralyaawe Moises, tjitjon'mo Moises aahopanka essaminin'nha. ⁵ Pwiya aahomwiirelatho moises: ⁶ Waakusse alevita n'hina mwaatthu owiisrael ni waareerihe. ⁷ Tjitjon'mo onaahala waareeriha: Waamwaresselatje maatji. Waakutthatje erutthu yooteene, akatthatje ekuwotjaya, weenan;na yeeyo anaahala okhalatja ssaawa. ⁸ Vano waavarihatje enama yankaani ni tjoovaha tjotthaka yonluwa niiphepa yoonhattiya nimakhura. Waahiye akussatje enama ekhwaawe avahe mwaha wotanpi. ⁹ Alevitaayo on'hala waarweeha oheemani wonthukumano, ni onaahala waathukumaniha atthu ooteene owiisrael. ¹⁰ Waarweehaka alevita ohoolo wa Pwiya, atthu owiisrael an'hala ohela matataaya mwaalevita. ¹¹ Arao naahala waavahenra alevita ohoolo waPwiya, avahenraka toko yoovahiya ekumihiye mwaatthu owiisrael wiira anvarele nteko Pwiya. ¹² Alevita anaahala weesenra matataaya nmuruni monama. Onaahala ovaha okuttho enama emotja mwaha wotanpi enama ekhwaawe on'hala okipahera, wowaakhuneela alevita. ¹³ Waawaane alevita ohoolo wa Arao ni ohoolo waassaanaawe, ni waavahenre toko yoovahenriyaaka. ¹⁴ Weenan'na yeeyo onaahala waakawaniha alevita waatthu owiisrael. Alevita an'hala okhala awaka. ¹⁵ Yaviraka eyo, alevita anaahala okela wiira avare nteko n'heemani wonthukumano. Onaahala waareeriha. Onaahala okivahenra toko yoovahiya. ¹⁶ Opanke yeeyo, maana ayenatja awaka mwaatthu owiisrael. Ayenatja anaahala okussa nipuro nokhula mwaana, owantjeriya oyariya nloko naIsrael. Kinawaakussaka alevita. ¹⁷ Owantjera oyariya ooteene naatthu owiisrael awaka, athhu niinama. Nihuku nikumihalyaaka ekumi tjaatthu owantjera oyariya elapo yowiigiipitu, yaari ooteene awaka. ¹⁸ Kihaakussa alevita eriyari waatthu owiisrael wonipuro naatthu owabtjera oyariya. ¹⁹ Alevita etthuvo yaArao naassaanaawe. Kihaakussatja, eriyari waatthu owiisrael, wiira awaane nteko waatthu, n'heemani wonthukumano. Kaahavahatjera wiira akhale mwaha waathu owiisrael, wowiira hikhale mwanttunttu n'hala waahuvihatja atthu owiisrael, yaattamenla nipuro ttakattiifu. ²⁰ Tjitjon'mo Moises, Arao, ninssovo wooteene waatthu owiisrael yaahopanka naalevita. Ayenatja yaahopanka tjooteene Pwiya tjaamwiirelalyaawe Moises mwaha waalevita. Tjitjon'mo yaahaapanka atthu owiisrael. ²¹ Alevita yaahiireeriha yaayoru mwaha wookattha ekuwotjaya, ni Arao aahiivahenra toko yoovahiya yaarweeheliye waPwiya ni aahaarapihatja wiira akhalatje ssaawa. ²² Waviralyaaya eyo, alevita yaahokela wiira avaratje ntekwaaya n'heemani wonthukumano ohoolo waArao naassaanaawe. Tjitjon'mo Pwiya phaamwiirelalyaawe Moises mwaha waalevita. Ayenatja yaahopankatja. ²³ Pwiya aahomwiirelatho Moises: ²⁴ Tjooteene tjinaatjeriya wiira alevita akhalane eyaakha ssiriini nathanu wala tjoovikana. An'hala okhala nkhayi wiira avare nteko n'heemani wonthukumano. ²⁵ Ayenatja ahaana weemessenra mitekotjaya yapiihaka eyaakha hanssiini tjeeyareelo. Khanphwanelatho ovara nteko nitjen'nha eyaakhan'nha. ²⁶ Ayenatja ahaana waakhavihera assun'naya an'hala ovara nteko n'heemani wonthukumano, massi ahivaretho nteko. Tjitjon'mo onaahala oweettihera alevita womiteko tjooteene.