¹ Assinttuuttu anavirale apwiya phuulumalyaaya ni Moises ni Eleazar, mwaana anankuttho Arao. Yena aahiira: ² Waahimeerye atthu ootteene owiisrael, oyaakha siriini woorwaa ohoolo, mwaassimutjaawe aatthu okhalayi, ooteene ari saawa owana mwaha wa Israel. ³ Vano, Moises ni nankuttho Eleazar yaahowiirelatja wa Moabe ohoolo wa Jordao oJerico, ni yaahiiratja: ⁴ Mwiirele atthu, oyaakha siriini tjeeyareelo, phanka apwiya tjimwiirelalyaaya Moises naatthu owiisrael, yaale akhumale elapo yowiigipitu. ⁵ Ruben aari owantjera oyariya owiisrael. Amwaamwanawe Hanoque, a Palu. ⁶ Hezrom, aakhumale nihimo naherzonita, Carmi, aawaale nihimo naacarmita. ⁷ Ala phamahimo aRuben, yaahaalikeliya ekonto arupayini natthaaru niimiya saapa wotalaathiini atthweene. ⁸ Eliabe aari mwaana aPalu. ⁹ Assaanaawe Eliabe yaari Nemuel, Data ni Abirao. Data ni Abirao phayanttharatjale Core wanwananaaya Moises ni Arao ni yaahiitarumihatjela naapwiya. ¹⁰ Etthaya yaahohulyaa ni yaahaamiryatja vamotja ni Core awatthara ooteene wakhwatjalyaaya. Owakathi yoole, mooro waahaapaha atthu emiya piili wohansiini, yaakhanle nthoonhero. ¹¹ Phimaana, amutjyaawe Core khaakhwale. ¹² Mahimo aSimeao yaari phaala: Nemuel, nihimo naanemuelita, Jamim, nihimo naajaminita; Jaquim, nihimo naajaquinita; ¹³ Zera, nihimo naazeraita; Saul, nihimo naasaulita. ¹⁴ Ala yaari mahimo aSimeao, yaahaalikeliya atthu ekonto siriini napiili niimiya piili. ¹⁵ Mahimo aGade yaari phaala: Zefom, nihimo naazefonita; Hagui, nihimo naagita; Suni, nihimo naasunita; ¹⁶ Ozni, nihimo nooznita; Eri, nihimo neerita; ¹⁷ Arode, nihimo naarodita; Areli, nihimo naarelita. ¹⁸ Ala yaari mahimo aGade, yaahaalikeliya atthu ekonto arupayini niimiya thanu. ¹⁹ Assaana aJuda yaari Er ni Ona, massi yaala atthwaala yaahokhwa elapo yooCanaa. ²⁰ Mahimo makhwaawe aJuda yaari phaala: Sela, nihimo naaselanita; Perez, nihimo naaperezita; Zera, nihimo naazeraita. ²¹ Maloko aPerez yaari phaala: Hezrom, nihimo naahezronita; Hamul, nihimo naahamulita, ²² Ala yaari maloko aJuda, yaahaalikeliya atthu ekonto sita niimiya thanu. ²³ Mahimo aIssacar yaari phaala: Tola, nihimo naatolaita; Pua, nihimo naapunita; ²⁴ Jasube, nihimo naajasubita; Sinrom, nihimo naasinronita. ²⁵ Ala yaari mahimo aIssacar, yaahaalikeliya atthu ekonto suthwiini niimiya tthaaru. ²⁶ Mahimo aZebulom yaari phaala: Serede, nihimo naaseredita; Elom, nihimo neelonita; Jaleel, nihimo naajaleelita. ²⁷ Ala yaari mahimo aazebulonita, yaahaalikeliya atthu suthwiini niimiya thanu. ²⁸ Mahimo aJose yaari Manasses ni Efraim. ²⁹ Maloko aManasses yaari phaala: Maquir, nihimo naamaquirita Maquir yaari athumwaane Gileade; Gileade, nihimo naagileadita. ³⁰ Maloko aGileade yaari phaala: Lezer, nihimo naaiezerita; Heleque, nihimo naahelequita; ³¹ Asriel, nihimo naasrielita; Siquem, nihimo naasiquemita; ³² Semida, nihimo naasemidaita; Hefer, nihimo naaheferita. ³³ Zelofeade, mwaana Hefer, khaarina asaana alopwana, arina athiyana. Matjina aasaanaawe yaari phaala: Macla, Noa, Hogla, Micla ni Tirza. ³⁴ Ala yaari mahimo aManasses, yaahaalikeliya atthu ekonto hanssiini napiili niimiya sita. ³⁵ Mahimo aEfraim yaari phaala: Sutela, nihimo naasutelaita; Bequer, nihimo naabequerita; Taa, nihimo naataanita. ³⁶ Maloko aSutela yaari, Era, nihimo naaeranita. ³⁷ Ala yaari maloko aEfraim, yaahaalikeliya atthu ekonto talaathiini napiili niimiya thanu. Ala yaari maloko aJose, yaalikeliye wakhula nihimo. ³⁸ Mahimo aBenjamim yaari phaala: Bela, nihimo naabelaita; Asbel, nihimo naasbelita; Aira, nihimo nairamita; ³⁹ Sufa, nihimo naasufamita; Hufa, nihimo naahufamita. ⁴⁰ Assaana aBela yaari Arde ni Naama. Arde, nihimo naardita, ni, Naama, nihimo naamanita. ⁴¹ Ala yaari maloko aBenjamim. Yaahaalikeliya atthu ekonto arupayini nathanu niimiyasita. ⁴² Mahimo aDa yaari, Suao, nihimo naasuamita. ⁴³ Mahimo ooteene aasuamita yaahaalikeliya ekonto suthwiini natjesse. ⁴⁴ Mahimo aAser yaari phaala: Imna, nihimo naaimnaita; Isvi, nihimo naaisvita; Berias, nihimo naaberiaita. ⁴⁵ Maloko aBerias yaari phaala: Heber, nihimo naaheberita; Malquiel, nihimo naamalquielita. ⁴⁶ Ntjina namwaamwanawe Aser naari Sera. ⁴⁷ Ala yaari mahimo aAser, yaahaalikeliya atthu ekonto hanssiini natthaaru niimiya tjesse. ⁴⁸ Mahimo aNaftali yaari phaala: Jazeel, nihimo naajazeelita; Guni, nihimo naagunita; ⁴⁹ Jezer, nihimo naajezerita; Silem, nihimo naasilemita. ⁵⁰ Ala yaari maloko aNaftali, yaahaalikeliya atthu ekonto arupayini nathanu niimiya tjesse. ⁵¹ Waari waalikeliya waatthu ooteene owiisrael: Ekonto emiya sita namotja, niimiya saapa wotalaathiini. ⁵² Apwiya yaahuuluma ni Moises ni yaahiira: ⁵³ Etthaya enaahala okawanyaa waatthwaala phanka yoohiyeriya toko tjaalikeliyaaya nimatjinaaya. ⁵⁴ Mahimo moolupale, n'nohala ovaha yoohiyeriya yuulupale, ni, mahimo ooyevatja, n'nohala ovaha yoohiyeriya yankaani. Amutji ooteene an'hala ovaha weenan'na waatthu tjiryaaya. ⁵⁵ N'nava etthaya en'hala okawanihiya niikhipantte tjoparakha. Ayenatja anaahala okhala phanka tjikawanihiyaaya nimaloko aatthwaaya okhalayi. ⁵⁶ Tjoohiyeriyaaya tjin'hala okawanihiya nimahimo moolupale ni ooyevatja, akawelatjiyaka niikhipantte tjoparakha. ⁵⁷ Mahimo aalevita, yaalikeliye nihimo ni nihimo, yaari phaala: Gerson, nihimo naagersonita; Coate, nihimo naacoatita; Merari, nihimo naamerarita. ⁵⁸ Mahimo aLevi yaari phaala: nihimo naalibnita; nihimo naahenronita; nihimo naamalita; nihimo naamusita; nihimo naacoraita. Coate aari ntthu okhalayi aAnrao. ⁵⁹ Ntjina naamwaarawe Anrao naari Joquebede, nloko naLevi yaayariye naalevita wiigipitu. Ayena yaahaayara assaana aAnrao, yaari Arao, Moises ni Miria, assirokoraya. ⁶⁰ Arao, ahaayara Nadabe ni Abiu, Eleazar ni Itamar. ⁶¹ Nadabe ni Abiu yaahokhwatja owakathi waavahatjalyaaya mooro woohikhala ohoolo waapwiya. ⁶² Atthu yaalikeliye waalevita yaari ekonto siriini natthaaru, alopwana ooteene omweeri nmotja weeyareelo woorwaa ohoolo. Massi ayenatja khayaalikeliye nmalokoni owiisrael kontha khayaavahiye yoohiyeriya naatthu owiisrael. ⁶³ Ala phayaale yaalikeliye ni Moises ni nankuttho Eleazar. Ayenatja yaahowaalikela atthu owiisrael mapuro aMoabe, vamotja waJordao ni Jerico. ⁶⁴ Massi, yaayoru, kharivo ntthu aalikeliye ni Moises wala nankuttho Arao owakathi waalikeliyaaya maloko owiisrael woothakoni Sinai. ⁶⁵ Kontha apwiya ahohimya wiira atthwaale ooteene an'hala okhwa woothakoni. Wayaayo khaavo nlopwana aahinýe, woohikhala Calebe, mwaana Jefone, ni Josue, mwaana Num.