¹ Vano, Core, mwaana a Izar, mwaana a Coate mwaana a Levi, wamotja ni Data wamotja ni Abirao, asaana a Eliabe, ni Om, mwaana a Pelete ,nikhoto na Ruben, yahaathukumaniha mkupatti waatthu. ² Yahomwemelatjera Moises,wamotja naatthu o wiisrael , ahooleli emiinya piili wo hansiini wo yooyo nthukumanooyo ,ni atthu oothaanliya omunttettheni. ³ Yaahothukumanatja wiira an'wanane Moises ni Arao. Yaahowiirelatja: Paassi! Eyo yintji. Nihimo nooteene noottakattifihiya, ooteene phoottakattifihiya ni aPwiya ari naayenatja. N'naakusserani atthu ahanle aaPwiya? ⁴ Moises owakathi wiiwalyaawe iyo, aahooroma. ⁵ Aahuluma ni Core ninphwinkwaawe wooteene iiraka: Owitjissuru, Nluku naahala onthoonha awawe phuuvi ni ttakattiifu phuuvi, naahala wiiwaanela. Yoole nohalaawe onthanla, yena naahala wiiwiihera wakhiviru. ⁶ Opanke yeeyo, Core ninphwinkwaawe wooteene. ⁷ Meelo npahatje mooro wolunpani ohoolo waPwiya. Ntthu n'hala othanliya, n'hala oreerihiya waPwiya. N'noorweesa ottayi, nikhoto naLevi. ⁸ Moises aahomwiirelatho Core: Vano nkiiwatje, nikhoto naLevi. ⁹ Phimaana etthu vakaani Nluku owiisrael enoovahaaweni, wiira nmwaattaman'ne, wiira nvare nteko npaani wanluku, ni nkhalaka ohoolo waatthu wiira mwaavarele nteko? ¹⁰ Yena oowiihaleni wakhiviru, hoowiiherani eri yawinhu yooteene, nikhoto naLevi, ni nanlelo n'nopheelatja onankuttho! ¹¹ Phimaana enthukumeneenhu naaPwiya. Vano essiyani omwaapaka Arao, nmwiiwelela Pwiya? ¹² Vano, Moises, aahomwiihana Data ni Arao, assaana aEliabe, massi yaahomwiirelatja: Khaninrwaa! ¹³ Vano, phimaana n'nikumihaka waakumiheehu eleeti nuuravo, wiira n'niive moothakoni? Vano, n'nopheela okhala n'hooleliihu! ¹⁴ Phimaana khan'niwiihale elapo yaakumihaaka eleeti nuuravo, wala khan'nivahale ematta toko yoonihiyera. Vano n'nopheela onithepyatja? Khaninoottharani. ¹⁵ Moises aahotikinihiya ni aahowiirela Apwiya: Nhiweheehe yovahiyeenhu. Akikussale yawaya, wala khiivo yaatankulatjeralyaaka. ¹⁶ Vano, Moises aahomwiirela Core: Meelo, ooteenetjinhu mwawaatje ohoolo waaPwiya ni Arao. ¹⁷ Khula ntthu wanhu, n'hala okussa myaaputjawe noohela elunpani. Vano, khula ntthu n'hala okussa ohoolo waaPwiya, emiya piili wohanssiini myaaputjene. We ni Arao n'nohala okussatja tjawinhu. ¹⁸ Vano khula ntthu aahokussa okutthwaawe, ni aahopaha, ni yaahokhala omakumenloni woheeme wonthukumano Moises ni Arao. ¹⁹ Core, aahaathukumaniha atthu ooteene wa Moises ni Arao wookhumenloni wohema wonthukumano, ni waarya waaPwiya waahaakhuruwela atthu ooteene. ²⁰ Vano, Apwiya yaahomwiirela Moises ni Arao: ²¹ Mwiikumihatje eriyari waatthwaala, kaamwaressatje phiyaaruva. ²² Mooromelatje vathi, Moises ni Arao, yaahiiratja: Nluku, nluku ominepa tjaatthu ooteene, ntthu atthekakavale, n'naarussiya naatthu ooteene? ²³ Apwiya yaahomwaakhula Moises, yiiraka: ²⁴ Wuulume naatthu ooteene wiiraka: Nkhumatje n'heemani wa Core, Data ni Abirao. ²⁵ Vano, Moises aahovuwa ni aahorwaa npaka wa Data ni Abirao, mahumu owiisrael ni yaahorwaatja. ²⁶ Ni aahowiirela atthu ooteene: Nkhumatje n'heemani mwaatthu ontuniyanyaala, ehikhale enkwanheenhu yawaya, wala n'nohala orimeelatja mwaha wotanpitjaya. ²⁷ Vano, atthu ooteene on'maheemani a Core, Data ni Abirao, yaahohiyatja. Data ni Abirao yaahokhumatja ni yaahorwaatja omakhumenloni waaheemaaya, naasaaraya naasaanaaya. ²⁸ Vano, Moises aahiira: Phimaana n'naahala otjuwela wiira Apwiya ahokiruma wiira kivare mitekon'nha tjooteene, kontha akinvara nootthunawaka. ²⁹ Atthwaala yakhwaka ni nookhwe eeyareelo, toko tjiniiranyaakaaya, Apwiya khaakirumale. ³⁰ Massi, Apwiya yunpa elapo yoothukuwa, yoomiryakani phanka mwaano, vamotja watjooteene tjiri tjawaya, ni ayenatja yakhuruwa akumi oSheol, vano, n'naahala othuwela wiira atthwaala anawaatanhifu Apwiya. ³¹ Moises wamalihalyaawe wuuluma moolumwaala, etthaya yaahohulya vathi waatthwaaale. ³² Etthaya yaahowula malakwaaya ni yaahomiryatjiya, assimutjaaya, naatthu ooteene aCore, ni tootho, nitjitthu tjooteene tjaarinaaya. ³³ Ayenatja naassimutjaaya ooteene, yaahokhuruwatja akumi oShoel. Etthayeeyo yaahiitthuka, ni yaahorimeelatja eriyari waatthu. ³⁴ Israel ooteene aahotthwa nookhuwelawaya. Yiiraka: Nihi etthayeeyo enaanimirya! ³⁵ Vano, waahopharela mooro waaPwiya, ni waahaapaha atthu emiya piili wohanssiini yaavahale elunpani. ³⁶ Apwiya yaahomwiirelatho Moises: ³⁷ Omuulumane Eleazar, mwaana anankuttho Arao, wiira akumihe okuttho wamooroni, ni orihele ottayi, kontha kaahovahenriya. ³⁸ Okusse okutthooyo tjihiyale okumyaaya mwaha wotanpitjaya, wiira akhale phanka exsaapa tjoophitiya ni tjikhuneeliye waltaare. Atthwaale yaavahale ohoolowaka, vano ayenatja phooreerihiya nimi. Ayenatja an'hala okhala nthoonherwaaka waatthu owiisrael. ³⁹ Eleazer, nankuttho, aahokussa myaapu tjoporontje tjaapaheriye atthu. Yena aahophitakatja phanka yookhuneeliya waltaare. ⁴⁰ Toko aPwiya tjan'himeeryalyaawe Moises, wiira akhale nthoonhero waatthu owiisrael, wowiira hikhale ntthu onikhoto naArao haattamenle wiira apahe elunpani ohoolo waPwiya. Weenan'na yeeyo, khaavo ntthu aahala onlikan'na Core ninphwinkwaawe toko Apwiya tjaahimyalyaaya eriyari yaMoises. ⁴¹ Massi, ihuku nikhwaawe, atthu ooteene owiisrael, yaahomwaapa Moises ni Arao yiiraka: N'howiivatja atthu aaPwiya. ⁴² Vano, atthu yathukumana mwaha wa Moises ni Arao, awehaka nphantte woheema wonthukumano, ni yaahoona wiira nihutte naahokhuneela. Waarya waaPwiya waahowa. ⁴³ Moises ni Arao yaahorwaa npaka ohoolo woheema wonthukumano. ⁴⁴ Vano, aPwiya yaahomwiirela Moises: ⁴⁵ Nkhumatje eriyari waatthwaala kaarimeelihatje phiyaaruva. ⁴⁶ Vano, Moises i Arao yaahooromelatja vathi. Moises aahomwiirela Arao: Okusse mwaapo ni opahe ohoolo waaltaare, ohele elunpani, oteessere wowaakuvyaatja waatthuni, ni waamwaresselatje, maana orussiya waaPwiya oneera owaaka. ⁴⁷ Vano, Arao aahopanka phanka Moises tjaamwiirelalyaawe. AAhotthawa arwaaka eriyari yaatthu. Assinttunttu yaahantja ovavaryeela waatthuni, vano, aaheessa elunpani ni aahaamwaressela atthu. ⁴⁸ Arao aahiitjeessa wookhwani ni wookumini, weenan'na yeeyo, assinttuuttu yaaheemela. ⁴⁹ Akhwale mwaha waassintthunttu, yaari ekonto khuumi natjesse niimiya saapa, waahiya yaakhwale mwaha wossariya tja Core. ⁵⁰ Arao aahaakulela wa Moises omakhumenloni woheema wonthukumano, ni assinttunttu yaahomala.