¹ Vano, aPwiya yaahomwiirela Moises: ² Waaveleelihe atthu arwee elapo yooCanaa, yaavahalyaaka atthu owiisrael. Onveleelihe ntthu n'motja wokhula nloko naatthwaaya okhalayi. Khula ntthu akhale n'hooleli aayenatja. ³ Moises aahaaveleelihatja woothakoni wooPara, wowiiwenla mweettihero aaPwiya. Oteene yaari ahooleli atthu owiisrael. ⁴ Matjinaaya yaari phaala: Nloko naRuben, Samua, mwaana Zacur. ⁵ Nloko naSimeao, Safate, mwaana Hori. ⁶ Nloko naJuda, Calebe, mwaana Jefone. ⁷ Nloko naIssacar, Igal, mwaana Jose. ⁸ Nloko na Efraim, Oseias, mwaana Num. ⁹ Nloko naBenjamim, Palti, mwaana Rafu. ¹⁰ Nloko naZebulom, Gadiel, mwaana ¹¹ Sodi. Womakhoto aJose, nloko naManasses, Gadi, mwaana Susi. ¹² Nloko naDa, Amiel, mwaana Gemail. ¹³ Nloko naAser, Setur, mwaana Micael. ¹⁴ Nloko naNaftali, Nabi, mwaana Vofsi. ¹⁵ Nloko naGade, Geuel, mwaana Maqui. ¹⁶ Ala phamatjina aatthu Moises yaaveleelihalyaawe wiira yawehawehe elapo. Moises aahomwiihana Oseias, mwaana Naum, mwantjina naJosue. ¹⁷ Moises aahaaveleeliha wiira yawehawehe elapo yooCanaa. Yena aahowiirelatja: N'mwaattamenlatje Nequebe ni n'welatje npaka n'mamyaakoni. ¹⁸ N'wehawehe elapweeyo tjiryaaya. Mwaawehe atthu arivo, yakhala oolipa wala ootteetthyaa, ni yakhala wiira ari vakaani wala entji. ¹⁹ Yakhala wiira elapo yomaana wala mena? Epooma tjiri tjani? Tjiri mwana mapuro onthukumano wala epooma tjoolipihatjiya? ²⁰ N'wehawehe elapweeyo tjiryaaya, yakhala wiira enaaphwanela waala wala mena. Nkhalatje oolipa nrima ni n'mwaane nthoonhero elapweeyo tjinruweryaaya. Khalayi yaari mapuro oohephiya Uva owantjera. ²¹ Vano, yaahowelatja ni yaahoonatja elapo okhuma woothakoni Zim npaka Reobe, waattamenla Lebo-Hamate. ²² Yaahowelatjale oNeguebe ni yaaphiyatja npaka Hebrom. Aima, Sesai, ni Talmai, mahimo omaloko Anaque, yaakhalatja vaava. Hebrom aatekale eyaakha saapa Zoa hinaaya, wiigiipitu. ²³ Waphiyatjalyaaya nssepa nooEscol, yaahothikilatja nritta wo Uva. Yaahokussatja nkoponi eriyari waatthu eel. Yaahowaanatja tjitthu tjikhwaawe. ²⁴ Nen'ne nipuron'ne niihaniya nssepa nooEscol, mwaha wo Uva atthu owiisrael waathikilalyaaya. ²⁵ Waviralyaaya mahuku arupayini, yaahaakulela owehaweha elapo. ²⁶ Yaahaakulelatja waMoises, Arao, ninssovo wooteene aathu owiisrael, yaari moothakoni ooPara, oCades. Yaahowuulumanatja ninssovo wooteene, ni yaahaathoonheratja mihokorokho tjooteene tjonlaponi. ²⁷ Yaahonttonkelatja Moises: Nihophiya elapo yaanirumaleenhu. N'nha mihokorokhotjinhu. ²⁸ Phimaana mapuro ankhalaaya phokuru. Epooma phitjoolipihatjiya ni tjuulupale. Nihoona makhoto aAnaque. ²⁹ Amalequita ankhala oNaquebe. An'naheteu, an'najebuseu, ni an'naamurreu ankhala nmamyaakoni. Acananeu ankhala waattaman'na nro Jordao. ³⁰ Vano, Calabe aahaamaliha atthu yaathukuman'ne ohoolo wa Moises. Yena aahiira: Niwele ni nikusse elapo, phimaana nihaana ekuru yoopheela okussa. ³¹ Massi atthu akhaawe yaarwaale niyena yaahiira: Hi nihaana ekuru yoowattakan'na atthwaale, phoolipessa woonivikana. ³² Vano, yaahowiirela atthu owiisrael elapo yaawehawehaaya. Ayenatja yaahiira: Elapo yaawehaweheehu elapo enaapwetessa atthwaaya. Ni ooteene yaawehaleehu atthu oolupale. ³³ Nihoona atthu oolupale, nikhoto naAnaque, nssovo waatthu oolupale. Woonawihu, yaanooniha phanka etjoroope.