¹ Yudas, nanteko a yesu kristu, ni muulupalyaawe Tiago, woyaale yiihaniye, oofentiya ni mluku, ni yaasunkiya na Yesu kristu. ² Ekiri wa nhu, nimrethele mfento wintjenriye. ³ Asun´naka, owakathi wiilipihenraka wira kiwamtikheleni mwaha wowoopwaa orineehu, kaahaana wiivahenra wa nhu wira koolipihereni wira mkhale nimfento woohimala avahiye athu oorera mrima. ⁴ Vano athu akinaku yaahokeleliya niwipitya nuuthepiya, nen´ne nokhalayi yaari owantikhiya mootharusiyani. Athu ontuniyani amkwanhulatja mahala amluku nuuraruwa, ni anonkhotha mluku m´motja ni pwiya yesu kristu. ⁵ Masi kimphela owuupuserani, kootjuwelakani ooteene womkwaha m´motja: wira apwiya, yaahaataphula athu wira akhume elapo yoweetjipitu, ohoolowaya yaahaakwanhula yaale yaahaakupali. ⁶ Ni malaikha ahisumkale makhalelwaaya, masi yaahohiya mapuro yaakhalaaya, yena haasunka vatti weepiphi yuulupale nuuthukiya woohimala mpaka nihuku nuulupale nohukhumu. ⁷ Tjitjom´mo toko Sodoma ni Gomora, niipooma tjowaathaana, wira toko yaale, yaavara tjootheka mooluvani, ni atharaka eruthu yoohikhala, arwaale opamkiya toko mlikanihero, yaakhemlaka mtharuso wo mooro woohimala. ⁸ Timaana yaala, anaalikana naathu ootteethya, ampwanhiha eruthu, ni amkhotha wiiwelela, ni antarawa tjithu tjoopwanela ovuwiha. ⁹ Masi Miguel arikantju, yena waapwapwihanaawe nim´tjasera, ni waawanihanaawe mwaha wo ruthu ya Mosi, khiiwale ni yena omlamula mphuki ootakhaliha, vano ahiira: Apwiya anawoothukela. ¹⁰ Masi alatja atarawale tjen´nhe tjooteene tjihin´tjuwelaaya; ni tjooteene tjintjuwelaaya niilamalelwaaya, toko enama tjohaankili, tjitjom´mo tjem´nho tjim´notarawana. ¹¹ Vaava woyaayo: kontha ayenatja am´hala othara mthala wo Caim, enkhala yiirihelakamoothepiya mwa Balaao wookuttakuttyaa niitjaaira, ni yaahokhala amorelaka moohiiwelela wa Core. ¹² Athu yaala ari owiivitha munttoonheeronimwinhu nimfento, amkhala m´masukuhuuluni mkhayi ninhu, yeethatjaka mkhayi woohoova: ayenatja mahuthe oohimaatji, amkusiya niiphyoo nuuvavaresiya; ari toko miri tjinuuma, tjoohiima, tjimkwa emaara piili ni tjikusiyaka nimrayi. ¹³ Mawimpi oorusiya ompharya, tjimkumiha tjohaayatjaya; ettontho tjookosa, wira yaayo epiphyaaya yoohimala eri yowiisattiya. ¹⁴ Ni Enoque, onaasapa navirale Adao, aahaahimeeryatja, iiraka: apwiya ahowa, naathuaya entji oothakathifihiya: ¹⁵ wira aphuke milathu tjaathu ooteene, ni yaahiyaka athu ooteene yahaamweethela, mwaha womitekotjaya tjooteene, yaatheka ntuniyani, ni mwaha womoolumwaaya oohiloka anamatheka yaamuulumelaaya yena. ¹⁶ Yaayo anamatthocutha, yaavaanhiha, aneethela tjoothunatjaya; nimalakwayaayo anuuluma moolumo oohikhala, atthoonheraka otikinihiya waathu wira apwanhe yoopwanha. ¹⁷ Nhu, oofentiya, muupuwele moolumo yaahimiye nimrumeyi pwiyehu yesu kristu; ¹⁸ Toko ayenatja tjawiirelaayani, wira wuumalani okatti anaahala okhumenla athu owiihimyahimyera, ankoweethela toko makhalelwaaya ontuniyani. ¹⁹ Yaala ankhala owiikawanihatja yaayoru, ntuniyani, ahirina m´nepa nthakathiifu ²⁰ Masi nhu, oofentiya, mwiilipihatje moowaamininiwenhu, m´vekelaka mun´nepani nthakathiifu. ²¹ Mwiisunkatje munfentoni mwanluku, mwanthiihaka miiriirya tjaapwiya yesu kristu wookumi woohimala. ²² Ni m´wooneleke ekiriri akina ari niisukhuli; m´woopole, mwaakumihaka omooroni. ²³ Masi akwaawe m´wooneleke ekiriri anoova, tjuurusakani niikuwo tjinkhala mruthuni ²⁴ Ni yoole ri ooweryesa wira awisaattini m´hivuluwe, niwoothoonheerani tjihinthukelya nuutheeliya ohoolowawe; ²⁵ Mlukumotja yooyo, moopoliihu, eriyari wa yesu kristu pwiyehu, okhale wowaarya nuuthema, ekuru nuuwerya, nen´nava, mpaka ohoolo, Amen.