¹ Yesu nahimiatjaale n'nha tjithun'nha, ahorwa nawithutjiawe mphantti nkhwawe mooloko wo Cedrom, nipuro naari ejardim, wakenliawe Yesu na winthutjiaawe. ² Ni Judas, namatumiha, anatjuwela nipuroon'ne; koonta emaara tjintji Yesu alia wenwe na winthutjiawe. ³ Vano Judas, ahorwa ojardim na nakhotto ni na namukutho ni mafariseu, yahowa wenwe ni mithuko, mwenke, ni kaputhi. ⁴ Yesu anatjuwela yaphela omwiranieela, ahoholela ni ahakoha, mwanwelale tipani? ⁵ Yahaakhulatja: Yesu Onazareti. Yesu ahira: Thimivano. Ni Judas, namatumihoole, aari na yena. ⁶ Vano wiraliawe Yesu: Timivano, yahohokolela ottuli, ni yahomorelatja vathi. ⁷ Ahakohatho: Mwanwelale tipani? Ayena yahakhulatja: Yesu o Nazareti. ⁸ Yesu ahowakhulatho: kihohimeriani wira thimivano. Mwakhala wira mwakiwelale thimi, mwahiye alaa arwatje. ⁹ Wira tjimaliheriye tjowantikhiya, yahimialiawe: Akivahaleen'nhu, khavo kirimelale. ¹⁰ Ni Simao Pedro, ahaana ekatana, ahonrakaliha nanteko anamukutho, ni ahonttuphula n'nharu nelopwana. Ihaniya Malco. ¹¹ Yesu ahomwirela Pedro: Ossunke ekataneeyo. Ononiha wiira akinvuria ekalice evahiyaka na papaka yomahuviho? ¹² Vano anakottoaale, kapitauule ni macomantate omajudeu yahonvatja Yesu, ni yahonthukatja. ¹³ Wupatjeroni yankussatjale wa Anas, kontha anonthelela Caifas, kontha ari namukutho yole mwaakhoole. ¹⁴ Ni ari Caifas alaakale majudeu wira wanaphwanela nthu okhwa mwaha waathu. ¹⁵ Simao Pedro ahonthara Yesu na winthutji akhwawe. Yole mwinthuthjiuule anatjuweliya ninamukuthoole. ¹⁶ Pedro ari oota. Ahokhuma mwinthutjiuule atjuwelia ni namukuthool, ahomwirela nantekoole akhaliha nkhoroole. Ni ahon'hiya Pedro okela. ¹⁷ Vano nantekoole ahomwirela Pedro: We keera omwinthutji anlopwanoole? Ahakhula: Akinakhala. ¹⁸ Ni yahavo vavale ananteko, ni anamakhaleenla, yoora mooro. Kontha wanaririya, ni Pedro ari vavale. ¹⁹ Vano namukutho ahoonkoha Yesu mwaha awinthutjiaawe, ni mwaha wokettelotjawe. ²⁰ Yesu ahomwakhula: Mi kihohimeria etuniia; kaanossoha m'masinagoga ni m'makeretja, mapuro majudeus wathukumanaaya, ni khivo ethu evithaliaaka. ²¹ N'nokikoherani? Mwakohe yale yinwale, yahimeraliaka. Ayena anatjuwela yeele ehimaliaaka. ²² Wahimaliawe n'nhe, na makhalenla m'motja ari vaavale, ahompataha Yesu, iraka: phinakhuliawe tjon'mo namukutho? ²³ Yesu ahomwaakhula: Wakhala wira kihuluma onhala, okumihere ossahiti, yakhala wira ekhweeli, onkattelani? ²⁴ Vano, Anas ahonruma Yesu nathukiye wanamukutho. ²⁵ Simao Pedro arii vavale, ooraka; ahireliya: We kera omwinthutjiaawe? Yena ahokhotta, ni ahira: Akinakhala. ²⁶ Ahira nanteko anamukutho, m'mutjiaawe yole Pedro anthikilale n'nharu: Akiwonale we ojardim ni yena? ²⁷ Pedro ahokhotta, nthupi thipaawe wowakuviawene. ²⁸ Ahokussiya Yesu orwaaniya epalacio ya Governador, Ni wari owitjissu; khayakelatjale mpalaciuun'mwe wira ahitankanhe, ni wira yanlhe pascoa. ²⁹ Vano, Pilatos ahikhuma ahorwa okumanatja na yena, ni ahira: M'mwanale essiyani epankaliawe nlopwanoola? ³⁰ Yahakhula, ni yahomwirela: Nlopwanoola ahari n'nhali khananwanava. ³¹ Pilatos ahira: Mwinkusee nheenhuva, mwahukhumu ni nlamuloninhu. Ayena yahakhulatja: Khaninlamuliya onkussa nthu omwiiva. ³² Wira yiraniee nulumo na Yesu na himaliaawe, manaan'na tjakelaawe okhwa. ³³ Vano Pilatos ahohokolela okela mpalacio, ni ahomwihana Yesu, ni ahonkoha: Thi we Mpewe omajudeu? ³⁴ Yesu ahaakhula: We ohohimia, wala onohimeriya naathu mwaha wawaka? ³⁵ Pilatos ahakhula: Vano mi kijudeu? Athuaa ni akhulupaliaa anamukutho anookivaha we, opankaleni? ³⁶ Yesu hakhula: Omweneaka kuhiyena wontuniamu, omweeneaaka onari wontuniyanimu, anantekoaaka yanawana wira mi kivariye ni majudeu; omweneaaka kuhiyena wontuniyanimu. ³⁷ Pilatos ahonkoha: Vano we ompewe? Yesu ahakhula: We onahimia wira mi ki mpewe. Phiwelaliaka ntuniyanimu. wira kivahe enamona yokhweli. Yole rii mpantti we khweeli namwinwa ntjuunaka. ³⁸ Pilatos hokoha: Ekhweli pissiani? Pilatos ahorwa owulumana athuaale, ni ahira: Akinona ethu epankaliawe. ³⁹ Massi ntoko tjilamalenleenhu, kinanthukulaka nthu m'motja nihuku no pascoa. N'nophela kuthukuleleni mpewe o majudeu? ⁴⁰ Yahantja okhuwela otenewaia , yiraka: Oyo mena, nimphela n'nithukulele Barrabas! Ni Barrabas ari nan'nhatha.