¹ Nahimyalene nnya tjithunnya, Yesu ahoweha wiirimu ni aheera: Papa ohophi okati munvuwihe mwaninyu wo wira mwaninyu ovuwiheni, ² ntoko nyu tjinvahatjenrennyu eworti waathu otheene, wo wira yena aavahe okumi wohimala athu othene mwinvahalennyu. ³ Ekumi yoohimala piila: Wira ayena yuutjuweleni nyu, Nluku mmotja eekhweli, ni Yesu cristo yoole nyu munrumalennyu. ⁴ Minnyano kihovuwihani vathiva kimaliheraka nteko nkivahalennyu wira kivare. ⁵ Vano Papa, nkivuwihe wamotja ninyu ni waarya waarinaka ninyu ehinapathusiya etuniya. ⁶ Koomwaarusela ntjinaninyu waathu akivahalennyu watuniyani. Ayena yaari awinyu, ni nyu mookivaha mi, ni ayena ahosunka nuulumo ninyu. ⁷ Vano anaatjuwelatja wira tjithu tjoothene nkivahalennyu tjinkuma wa nyu. ⁸ Kontha moolumo akivahalennyu ni mi kihavatja, ayena ahakenlatja ni weekhweli ahotjuwelatja wira kinkuma wa nyu ni ahokupai wira nyu mookiruma. ⁹ Minnyano kinnaswalela ayena; akinswalela etuniya, masi wo yaale nyu nkivahalennyu, maana ayena taawinyu. ¹⁰ Yoothene erii yawaka tiyaawinyu, ni yoothene erii yawinyu tiyaawaka; ni kinkala ovuwihiya naayena. ¹¹ Minnyano akirivotho watuniyani, masi ayena arii watuniyani, mi kinrwaa wa nyu. Papa thakathifu mwaasunke nintjinaninyu nkivahalennyu, wo wira ayena akale mmotja ntoko hinnyano nirihu mmotja. ^{14 12} Okati kaaryaka naayena, minnyaano kihasunka mwa ntjinaninyu nkivahalennyu; Mi kihasunka ni kaavo orimeelale, on'hiya mwaana owuurimelani, wo wira tjoolepiya tjimaliheriye. ¹³ Vano kinrwaa wa nyu, masi kinuuluma nnya tjithunnya watuniyani, wo wira akalane otheliyawaya woomalela naayena. ¹⁴ Mi kihavatja nulumonaka ni etuniya ehaathanya kontha ayena ahiyena owatuniyani; tjitjammo ntoko minnyaano kihiryaka owatuniyani. ¹⁵ Minnyaano akinswali wira mwakumihe wa tuniyani, masi wo wira mwaasunke mwaa atakhali. ¹⁶ Ayena kahiyena owatuniyani, ntoko mi kihiryaka owatuniyani. ¹⁷ Mwaathakathifihe muukhweelini; nuulumo ninyu tiikhweeli. ¹⁸ Tjitjammo ntoko nyu nkirumalennyu otuniyani, nimi kihaaruma otuniyani. ¹⁹ Mwaha waayena mi kiheethakathifiha, wo wira ayena tjitjammo akale othakathifihiya niikhweli. ²⁰ Akinaaswalela ayena pahi, masi tjitjammo wo yaale akikupanli minnyaano wonuulumonaya. ²¹ Wo wira ayena akale mmotja, ntoko nyu, Papa nrinnyu ni mi , ni minnyaano ni mi. Mi kinaaswali wira ayena akale nihinnyaano wira etuniya ekupali wira nyu mookiruma. ²² Waarya nkivahalennyu, mi kihaavaha wira ayena akale mmotja, ntoko hinnyaano nirihu mmotja; ²³ Minnyaano naayena, ni nyu ni minnyaano, wo wiira ayena akale ohooleliya niwaatana; wira etuniya etjuwele wira nyu mookiruma, ni mohafenta ntoko tjikifentalennyu mi. ²⁴ Papa, kimpheela ale akivahalennyu wira akale tjitjammo nimii onrwaaka okala wira ayena yoone waryawaka, ole okivahalennyu, maana nyu mookienta ekumelo etuniya ehinapathusiya. ²⁵ . Papa osariya, etuniya kinootjuwelani, masi mi kinawutjuwelani, ni yaala anaatjuwella wira nyu mookiruma, ²⁶ Minnyano kihatjuweliha ntjinaninyu, ni mi kinaahala waatjuweliha wira nifento nkifentalennyu nikale naayena, nimi naayena nikale.