¹ Mahuku sita ehinaphiya epaskuwa, Yesu aahowa o Betania, wonwo waaryawe Lazaru, yooyo akhwale onwenlihiyaka mwaathu ookhwa. ² Vano yaahopankiya eyoolya, ni Marta haapyaatja, ni Lazaru wamotja ni Yesu. ³ Vano Maria aahokusa ntiita wo makura oonukhela yaapankiye ni nardo, yontjurukhu mwintji, aahomooyhiha Yesu nnhaaniwawe, ni aahonthikitha enhaatjawennho ni ekhararitjawe; ni wathokonivale waahotjara onukela wo makhuraale. ⁴ Mwiithutji mmotja ehaniya Judas Iscariotes, yoole aarwaa onvariiha , aahera: ⁵ Ehitumiheriyeni ala makhuraala emiinha thaaru, ni avahiyaka amasikini?". ⁶ Massi yena oolumale eyo kahii nlathu woowonela othunku amasikini, massi kontha aari vatinhu, yena aari namasunka onsurukhu, ni anennha yootene yaaheliya. ⁷ Yesu teerawe: Mwinhiye, yena osunkale ela wo nihuku ninrwaaka osikiya" ⁸ Amasikinyaayo anrwaa okhala ninhuu kula mahuku, massi kahii wira mwinrwaa okikhalana kula mahuku. ⁹ Ma Judeu entji yaahotjuwela wiira yena aari wenwe, ni yaawatjale kahi nlathu wa Yesu phaahi, massi tjitjommo opheela omoona Lazaru, yooyo oowenlelihiye ni Yesu eriyari yaathu ookhwa. ¹⁰ Anamukutho olupale yaahopuwela nruku wamotja wira amwiivatje Lazaru; ¹¹ Kontha waari nlathu wawawe yena weehapusalyaaya majudeu mentji ni yankupaliki Yesu. ¹² Nihuku nowaakulela, athu entji yawaale osukuhuuluni, winwalyaaya wira Yesu anwa o Jerusalem, ¹³ Yaahokusa mikhutha ni yaahomwiikamelatja, ni yankhuwela: Osana! Ooreeriya ti yoole onwaa mwa ntjina naapwiya, Mpewe owisrael! ¹⁴ Ni Yesu aahonphwanha puuru, ni aahomonkomela, ntoko tjantikhiyaaya: ¹⁵ Ohoove, mwaana a Siau, Mpewyaa onwaa onamonkomenle mwaana o Purru. ¹⁶ Vano amwiithutjaawe khayaatjuwenlale ela woopatjera; massi Yeesu wavuwihiyaawe, vano tuupuwelenlyaaya wiira yaahantikhiya, ni yeeyo taapankiyaawe. ¹⁷ Athu, yaari ni Yeesu, yan-himyakatja wiira aahomwihana Lazaru mmahiye, ni ahomunweleliha eriyari waathu ookhwa. ¹⁸ Pimaana athwaale tjitjommo yaahonrweela Yeesu, Kontha yaahinwa wiira aahopanka yooyo nthonhiherooyo. ¹⁹ Vano ma Fariseu yaahera yaayoru: Mooneke wiira kiivo enrweehu ophwanha? Athu ootene anonrweela yena. ²⁰ Ni yaahavi ma Grego yaarwaale opepetja o Jerusalem osukuhuuluni. ²¹ Yaayo yaahonweela Filipe, aari o Betania yo Galileia, ni yaahonvekela , yiiraka: Nlopwana, naaphela omoona Yesu. ²² Filipe aahowa, ni amwiirela Andre; ni Andre ni Filipe yaahon-himeeratja Yesu. ²³ Vano, Yesu aahowakhulatja, eeraka: Ohophiya owakati onrwaawe ovuwihiya mwaana nthu. ²⁴ Weekhweli, weekhweli kinawuuhimeerani wira ethaka yo tirico wanmorelaaya vathi yaahikhweeke, eyo enrwaa okhala veekhaaya; vano yakhwaaka, enawimma mihokhoroko tjintji. ²⁵ Ole ofenta ekumyaawe onaarwaa ohaleela; ni ole onthanha ekumyaawe va watuniyanivaa, onrwaa osunka wiikumini yoohimala. ²⁶ Nthu akivarela nteko, akithare; ni wonwo onrwaaka okhala, wenwe onrwaa okhala nantekwaaka. Ni nthu akivarela nteko, apaapa anarwaa onttithimiha. ²⁷ Vano erohwaa erii yopwapwaneela; kinrwaa ohimya eseeni? Paapa nkoopole wo yoola okatyuula; pimaana kiwaaka ola owakatyuula. ²⁸ Paapa, nvuwihe ntjinaninhu. Naahowa vano ntju nookhuma wiirimu niira: Minnhaano kiniira kuuvuwihaka, ni ekwaha ekina kinrwaa wovuwiha. ²⁹ Vano athu yaaryaale vale, ni amwiiwaka, yeera yaari etari. Akinaku yeera: Naarii nlayikha naamulumanne. ³⁰ Yeesu aahakhula eeraka: Nna ntjunna kaniwaale nlathu wawaka, massi nlathu wawinhu, ³¹ Vano ola owakati woopheela ohukhumwiya etuniyeela; vano onrwaa oriheliya ota n-hooleli oyeela etuniyeela. ³² Ni minnhaano, konvusiyaka vathayani, kinaarwaa wookusani ootenewinhu. ³³ (Ni ela aahimya, aatjaka mananna yaarwaawe okhwa.) ³⁴ Athwaale yaahomwaakhula: Ninamwinwaka mmalamuloni wiira Kristu onrwaa okhala mahuku ootene; vano we oniira onaaphwane mwaana a nthu ovussiya? Tuuvi yooyo mwaana anthuuyo? ³⁵ Vano Yeesu aahowirelatja: Nanlelo okati vakaani nthuko orii ninhuu; mweettele warinennhu wanthuko, wowira epiphi ehuuphwanheni. Ni ole oneetha mpiphini kantjuwela onrwaawe. ³⁶ Nnari ninthuko, nkupali nthuko, wo wiira nkale asaana onthuko. Nnha tjithunnha oolumale Yeesu, ni akhumaka aaheepitha. ³⁷ Ni waminthoniwaya onapankale mithoonhihero tjintji, ayena kayankupanli Yena. ³⁸ Wo wiira nimaliheriye nuulumo na namaloha Isaia , nineera: Pwiiya, tipani okupanli olalyaa wihu? Ni tipani wiira waari moono wa Pwiiya waavara nteko? ³⁹ Pimaana wahaakupalyaya, kontha ekwaha ekina Isaia aahera: ⁴⁰ Muluku hothiyenla weenthwaaya, ni holipiha mirimatjaya; wo wiira ahoone ni meenthwaaya, ni ahitjuwelele ninrimaaya, wiira ahikituruwele, ni minnhaano kaavonihaka. ⁴¹ Ela oolumenle Isaias, wonalyaawe waarya wa Yeesu, ni aahomuulumela yena. ⁴² Momtheene ahooleli entji yaahonkupali Yesu; Massi kayaahimyatjale waathuni nlathu wo ma Fariseu; wiira ahoomoliye nsinagoga. ⁴³ Kontha yaafenta waarya waathu ovirikaniha waarya wa Muluku. ⁴⁴ Ni Yesu aahokhuwela ventji: Onkikupali minnhaano, kankipali minnhaano phaahi, massi tjitjommo ole okiwaanale. Ni ⁴⁵ nthu onkiweela minnhaano, onaamona ole okiwaanale. ⁴⁶ Minnhaano kinthuko kiwaale watuniyani, wo wiira yoole onkipali, ohikale wiipiphini. ⁴⁷ Ni nthu onrwaa winwa moolumwaaka, ni ohikupaliki, minnhaano nkinon-hukhumu; kontha minnhaano nkiwaale ohukhumu etuniya, massi kiwaale woopola etuniya. ⁴⁸ Ole onrwaa okikhotha ni ohaakhela moolumwaaka, ohaavo onrwaa on-hukhumu: Nuulumo kin-himyaaka, nenno tinrwaa on-hukhumu nihuku noomalela. ⁴⁹ Kontha minnhaano akiniitjulumela; masi apaapa akirumale, ayena ahokivaha ekettelo enpheelaka ohimya, ni enpheelaka wuuluma. ⁵⁰ Minnhaano kinaatjuwela wira ekettelwaaya ekumi yoohimala. Maanaya ethu enuulumaka, kinuuluma ntoko apaapa tjinkiirelaaya.