¹ Nlopwana mmotja ehaniya Lazaro aari owerennya. Yena aari o Betania, nthethe wa Maria ni n'himaawe Marta. ² Yoola aari yoyo Maria aarapihale Apwiya ni ni makura ni omihaka manyaa ni kararitjawe, yoyo nrokorawe aari owerennya. ³ Asirokorawe yahoorumiha nuulumo wa Yesu, neerakaa: ''Pwiiya, yoole ononfentennyu onawerennya''. ⁴ Yesu wiwalyaawe eyo, ahaakula: Eyo eretheyo kihiyena yo nookhwa, masi yo waarya wa Nluku, wo wira mwana a Nluku avuwihiye nlathu wo yeyo'' ⁵ Yesu aonfenta Maria, munnaawe ni Lazaro. ⁶ Winwalyawe wira Lazaro anwerennya, ahookala mahuku meeli thotho opuro waaryawe. ⁷ Oholonwo, tawiirelawe arumeyaawe: '' Nirwee thotho o Judeia''. ⁸ Arumeyaawe yahoomwirela: ''Rabi, mwanananova ma judeu yaaphela wovonyakatjani ni maluku, masi tjitjammo mwinphela ohokolela wonwo?''. ⁹ Yesu ahaakula: ''Nihuku kanirina owakati khumi napili? Nthu eethaka othana, kankathuwa, mana onawoona nthuko woo nihuku. ¹⁰ Masi, yena eethaka ohiyu, onakakathuwa, kontha kuuvo nthuko mwa yena''. ¹¹ Yesu ahoolumatja nnya tjithunnya ni, onamalihale wuulum, aheerelatja: ''Mpwaniihu Lazaro oorupa, masi minnyano kinarwaa onvusa nkoveniwawe''. ¹² Arumeyaawe yahoomwirela: '' Pwiya, yena aarupa , onrwaa okala sana''. ¹³ Yesu amuulumela okhwa wa Lazaro, masi ayena yoonatja ntoko Yesu oolumela orupa ¹⁴ wookove. Vano Yesu ahahimeratja sanene: ''Lazaro ohokhwa. ¹⁵ Nlathu wawinyu, kinaatheliya mwaha wohikala n'wo, wo wira nkupali. Masi ninarwaa mpaka oryaawe yena''. ¹⁶ Vano Tome ehaniya Didimo, ahoowirela arumeyi akhwawe: ''Ninrwaa tjitjammo okwa ni Yesu''. ¹⁷ Waphiyalyawe Yesu, Yena ahoona wira Lazaro ahoovira mahuku matjese onasikiye. ¹⁸ O betania waari wakiviru ni o Jerusalem, wookalaka khuumi ni thanu tjeethalivelo. ¹⁹ Ma judeu mentji yaawowa ommaliiha Maria ni Marta, nlathu wonrokoraya. ²⁰ Vano Marta winwalyawe wira Yesu eera awaaka, ahoorwaa mpaka waryaawe, masi Maria ahohala wapuwani. ²¹ Vano, Marta yamwirelaawe Yesu: Pwiiya, Nnari vaa, nrokoraka kahala okhwa. ²² Poti nananovaa, mi kinaatjuwela wira ethu yoothene mwinrwennyu onlepela Nluku, Yena onahala wovahani''. ²³ Yesu ahoomwaakula: ''Nrokoraa onahala ovuwelela''. ²⁴ Marta aheera: ''Minnyano kinatjuwela wiira yena onahala ovuwelela nihuku noomalela''. ²⁵ Yesu ahoomwirela: '' Minnyano tuuvuwenla ni okumi, ole onkikupali mi, hataa akhwaka, onaakala nkumi, ²⁶ Ni yoole onkala ni onkikupali mi konkhwaatho. Onaakupali yeeyo?'' ²⁷ Yena ahoomwirela: ''Aayo, Pwiiya, mi kinaakupali wiira nyu mwa Cristo, mwaana a Nluku, aahala owa watuniyani''. ²⁸ Onuulumale eyo, ahokuma ni ahomwihana Maria mphantheru, eeraka: ''Mwithutjihi orii wenno, ni onawihana''. ²⁹ Wiwalyawe Maria, aho'wa wowaakuvyatja ni ahoorwaa onphanha Yesu. ³⁰ Yesu aari ohinaphiya onthetheninwo, masi nanlelo aari opuro waphwanyiyaawe ni Marta. ³¹ Ma judeu yammaalihaayo, woonalyaya wira Maria ahoonwa wowakuvyaatja ni ahookuma, yahoontharatja, mana yoonatja ntoko yena aarwaa omahiye orwaa wunla. ³² Vano Maria waphiyalyawe opuro waaryawe Yesu, onamonale, ahookoroma wa methoniwawe eeraka: ''Pwiiya, nnari vaa, nrokoraka kahala okhwa''. ³³ Wamonalyawe onlaka tjommo, ntoko tjitjammo ma judeu yanvelelale, Yesu ahookalana ekiriri munnepani. Ni, atjikiyaka nuuthuna wo wanrimani, ³⁴ aheerelatja: ''Mmwesatjalee vayi?''. Ayena yahaakulatja: ''Pwiiya, nwe ni mwawoone''. ³⁵ Yesu ahoonla. ³⁶ Ma judeu akinayaheera yayooru: ''Mwinwehe tjanfentaawe Lazaro''. ³⁷ Vano akina yaheera: ''Ola nlopwanola, omonihale nthu ohoona,kahaala okitiri tjitjammo opanka ethu wira ola nlopwnola ohikhwe?''. ³⁸ Vano Yesu otjikiyene ventji wanrimani, ahorwaa mpaka omahiye. Naari nikhuku neeseriyye nluku nuulupale wankoraniwaya. ³⁹ Yesu aheera: ''mkumihe nlukunno!''. Marta, nrokorawe Lazaro, yoyo aakhwale, ahoomwerela Yesu: ''Pwiiya, yena ohuntha, mana ahovira mahuku matjese onakhwale''. ⁴⁰ Yesu ahoomwakula: Mi akuuhimerale wira wakupali, onahala woona waarya wa Nlulu?''. ⁴¹ Vano, yahookumihatja nlukunno, Yesu ahoweha wiirimu ni aheera: ''Papa, kinawusukuruni nlathu wookiiwa. ⁴² Minnyano kinatjuwela wiira nnakiiwesa, masi orii mwaha waathwala yeemenle anakirikuryenre, wo wira akupali wira mookiruma''. ⁴³ Onamalihale wuuluma nnya tjithunnya, Yesu ahokuwela ni ntju nulupale: ''Lazaro, okumele ota!''. ⁴⁴ Nankhwa ahokuma ni matata ni metho tjoopharana, ni ekhove yookuneeliya niikuwo. Yesu aheerelatja: mwinthukule ni mwinhiye arwee''. ⁴⁵ Vano, ma judeu entji yawaale omootola Maria, amoonaka Yesu ethu yapankalyawe, yahonkupali yena; ⁴⁶ masi akina yahorwaa mpaka wo ma fariseu, ni ahahimeeryatja tjithu Yesu tjapankalyawe. ⁴⁷ Vano, ahooleli anamukutho ni ma fariseu yathukumana wa kumasaya, ni yaheera: ''Nipankeke esiyani? Yooyo nlopwanoyo neera apankaka mithonhihero tjintji tjomirirya. ⁴⁸ Nan'hiyaka , athu entji anahala onkupali yena; vano ma Romano anahala owa ni anaahala okusa nipuronihunno ni elapwela yothene''. ⁴⁹ Vano, mmotja, ehaniya Caifas, arii namukutho yoyo mwaakhoyo, ahopapa nuulumo ni aheera: ''Nyu kamwintjuwela ethu. ⁵⁰ Kannoonela wira onarera nlopwana mmotja okhwa nlathu waathu ovirikana nuukhwatja elapo yoothene''. ⁵¹ Yena koolumale ele ethwile mwa yena, masi, nlathu wookala namukutho oyoole mwaakhole, ahooloha wira Yesu anahala okhwa nlathu weelapo. ⁵² Ni kahi pahi nlathu weelapo masi tjitjammo mwaha waasana a Nluku, amwaryenle, wira athukumanihe wonthethe mmotja. ⁵³ Vano ,ekumelo nenne nihukunne, yahothonkamonihatja mananna omwiiva Yesu. ⁵⁴ Yesu keethetha tho waathuni eriyari yo ma judeu, masi ahorwaa n'hina, nthethe mmotja waathamenle wuuthakoni, ntjoko mmotja wehaniya Efraim, wonwo wakanlyawe ni arumeyawe. ⁵⁵ Epascoa yo ma judeu yahaathamela, Ni entji yahokuma nenne nipuronne arwaaka o Jerusalem wo wira yeererihe. ⁵⁶ Vano, ayena yanomphelatja Yesu, ni yeeratja yayooru nkeretja: ''Nnonela tjani? Poti yena kan'hala owa osukuhuluni?''. ⁵⁷ Aholeli aanamukutho ni ma fariseu yahoruma wira, nthu amoona nipuro niryaawe, ahana ahimyaka, wo wira ayena anthukatje.