¹ Nuulumo mwaha waEgito. Apwiya anrwaa ito, ninihutte nowoonya. Attontto oEgito an'nothukumela ohoolowawe ninrima waatthu oEgito ohothuluwa n'hinamwaya. ² Atthu oEgito kinaahala waattakan'niha ntthu nimwaamun'nawe, naahala waattakana nimwaattaman'nuaawe, epooma niipooma ni omwene noomwene. ³ Otteeliya waatthu oEgito onaahala otteetthya n'hinamwaya ni kinaahala okwanhula tjinuupuwelaaya; anaahala olepela ankhili waattontto, anaahala okhuwela minepa tjaatthu ookhwa. ⁴ Atthu owiitjiipitu kinaahala waavahenra n'matatani mwantthu oohootjyaa; mwene okuru ni naahala waahoolela n'na nuulumo naApwiya. ⁵ Maatji onpahari anaahala wuuma niimuro tjinaahala wuuma. ⁶ Emuro tjinaahala onukha tjinene; emuro tjoEgito tjinaahala ovukuwa ni tjinaahala wuuma; mihali nimalassi makhwaawe anaahala wuuma. ⁷ Mihali tjiri nimwaamuro Nilo, nkurukuru Nilo, ni tjooteene tjaaliye mon'mo tjinaahala wuuma, tjinaahala okumihiya ni khatjinkhalatho. ⁸ Atothi anaahala woova; ooteene an'hala orihela elowutjaya n'muro anaahala wunla, ni yaale ankoorihela matthavyaaya n'maatjini anaahala otjukula. ⁹ Yaale antthava matthavi ni anvara nteko nintthotje anaahala woona ehaaya. ¹⁰ Ananteko owiitjiipitu anaahala otankulatjiya; yaale anvara nteko woopheela waakhela ankoohala nin'nepa wootjukulatja. ¹¹ Akhulupale aZoa alolo. Moolumo aatthu ootjuwelatja aFarao khaakhalihiye etthu. On'mwiirela tjani Farao: Kimwaana antthu ootjuwelatja, mwaana omamwene okhalayi. ¹² Anamatjuwelatjeenhu ari vayi. Yaayo yootjuweliheni Apwiya ekhikitjenryaaya wohissima yoEgito. ¹³ Akhulupale aZoa athatun'wetho alolo, akhulupale aMenfis ahothepiya; yaayo ari mapotto omalokwaaya ahonkossiya Egito. ¹⁴ Apwiya ahorihela eriyaryaayatja n'nepa wookawanyaatja, ni ahontthekihatja Egito watjooteene tjaavaraawe, phanka nan'hapaliya amoramoraka nooraphyaawawe. ¹⁵ Khiivo etthu ntthu en'halaawe opanka mwaha waEgito, okhale muru wala mwiila, okhale nritta wala moono. ¹⁶ Nen'ne nihukun'ne atthu owiitjiipitu an'hala okhala phanka athiyana. Ayenatja anaahala othukumela niwoova kontha ntata naApwiya nin'hala okhala naayenatja wiira yaattarusse. ¹⁷ Elapo yooJuda phin'hala on'moriha Egito. Yuupuwelavale, anaahala woova, mwaha wayoolakela Apwiya erinaaya naayenatja. ¹⁸ Nihuku nen'ne, tjinaahala okhumenla epooma thanu elapo yoEgito tjinkowuuluma eluuka yooCanaa ni tjinaahala oluphela niikhweeli yaApwiya. Emotjaaya enkowiihaniya epooma yontjuwa. ¹⁹ Nen'ne nihukun'ne, naahala okhala altaare waApwiya eriyari weelapo yo Egito, n'mwiinanoniwaya, nipotto nimotja nonluku naApwiya. ²⁰ Nin'hala okhala nthoonhero ninamoona waApwiya elapo yo Egito. Yaakhuwela Apwiya mwaha womahuvohwaaya, anaahala onveleeliha moopoli nimwaakiho n'hala woopola. ²¹ Apwiya anaahala otjuweliya niEgito ni atthu oEgito anaahala waatjuwela Apwiya nihuku nen'ne. Ayenatja anaahala waakokhorela nitjoovahatjaya, anaahala waakhuluveliha Apwiya ni anaahala oviriha. ²² Apwiya anaahala onttarussa Egito, waattarussa niwaavoniha. Ayenatja anaahala waakulela waApwiya, ni Ayena anaahala wiiwa mavekelwaaya ni anaahala waavoniha. ²³ Nihukun'ne, enaahala okhala eparapaara okhuma Egito npaka Assiria; atthu oassiria anaahala owa oEgito ni atthu oegito, anaahala owa Assiria. Atthu oegito anaahala waatjivela atthu oassiria. ²⁴ Nihuku nen'ne, Israel n'hala okhala oneeraru, vamotja ni Egito ni Assiria, oreerihiya eriyari wolapo. ²⁵ Apwiya anaahala waareeriha ni anaahala wiira: Oreeriya akhale Egito, atthwaaka; Assiria, nteko won'matatanimwaka; ni Israel, yoohalanaaka.