¹ Owakathi apinaatamu wantjalyaaya oyarana ni yaayaraka asaana, ² asaana aNluku yaahoona wiira asaana aapinaatamu yaahotepa oreeratja ni yaahaakussa okhala asaaraya ooteene yaatjivela. ³ Ni Apwiya yaahiira: N'nepaaka khun'hala okhala owakathi mwintji nipinaatamu, kontha erutthu, ni mahukwaaya an'hala okhala eyaakha emiya wosiriini. ⁴ Atthu oorekamatja yaahaavo vathi, mahuku yaale. Eyo yiiranyaale kntha asaana aNluku yaathela asaana aapinaatamu, naayenatja yaahaayaranatja asaana, yaayo yaari alopwana ookhuluveliya, ootjuwelessiya. ⁵ Apwiya yaahoona wiira otakhalihiya waari naapinaatamu ovathi nimuupuwelelotjaya nimirimatjaya tjaari tjootakhala. ⁶ Ni Apwiya yaahiitjukulela mwaha woomunpa nlopwana yaahontjukuliha eroohwaawe. ⁷ Vano Apwiya yaahiira: Etthaya yeeyo emunpalyaaka ntthu kinaakwanhulatja; atthu ooteene, enama tjuulupale, tjitthu tjooteene tjineetta vathi niinuni tjowiirimu, kontha kihiituthuwa mwaha woowunpa. ⁸ Massi Noe aahaana n'nema waaPwiya. ⁹ Ala phayaari makhalelo a Noe. Yena aari nlopwana oohittheka, ooreeresiya waatthu onikhotonawe ni eetta niNluku. ¹⁰ Noe aari athumwaane aasaana araru: Sem, Cam ni Jafe. ¹¹ Etthaya yaari yootakhalihiya niNluku ni yaahotjara manhala. ¹² Nluku aahoona etthaya ni yaari yootakhalihiya, erutthu tjooteene tjaari tjootakhalihiya mittalatjawe aahotthuka. ¹³ Nluku aahomwiirela Noe: Kinoona wiira ohophiya owakathi woomaliha ekumi tjaatthu ooteene, kontha etthayeeyo tjinootjarana tjootakhala tjaapinaatamu. Phimaana kinawaakwanhulatja niitthaya yooteene. ¹⁴ Opanke ekalawa yomiri. Wuunuwihe nookawanihatja n'hinan'mo oreerihaka ota nin'hina. ¹⁵ Phiinan'na en'halaa opanka: erekamelo yokalaweeyo en'hala okhala emeeturu emiya tthaaru, eyaatapuwelo emeeturu hanssiini ni eyeemelelo emeeturu talaathiini. ¹⁶ Onaahala ottiyenla ekalaweeyo ni on'hala omalihera niimeeturu emotja vatjuluwaya. On'hala ohela nkhora n'motja. On'hala okawanihatja: Yowantjera, yonayeeli ni yoneeraru. ¹⁷ Okiiwe: Kinaahala owaana epaluwa vathi, yowaakwanhula atthu ooteene naale arina ekumi yintji vathi worimu. Yooteene eri vathi enaahala okhwa. ¹⁸ Massi nin'hala okhala nkhayi.We on'hala orwaa n'hina wokalawa, asaanaa, amwaaraa naasaara aasaanaa. ¹⁹ Enama tjooteene tjikumi, atthu ooteene, ohaana waahelaka nkalawani eeli wakhula enan'na, nlopwana ninthiyana, wiira waakhalane akumi. ²⁰ Enuni piili, enama piili, wakhula etthu eneetta vathi pili piili, ni tjinaahala wooweela khula enan'na piili piili, wiira okhalane. ²¹ Osunke khula enan'na yoyoolya, kontha tjen'nho phin'halaa olya niinaman'nho. ²² Vano, Noe aahopnka tjitjon'mo. Phanka tjooteene tjaahimeeriyaawe niNluku, yena aahopanka.