¹ Vano, Jaco aahowiihana asaanaawe ni aahowiirela: Nthukumanatje, koohimeeryatjeni enkowiinya ohoolo. ² Nthukumanatje ni nkiviriyanatje, assaana aJaco. Munviriyanatje Israel, athumwaninhu. ³ Ruben, omwaamwanaka owantjeriya, oophwanela ni okuru. ⁴ Oohiiwehaweha phanka eluuka tjoohitjuwanyaa, khun'hala okhalatho owantjeriya, kontha onoowela wakorini waathumwanaa. Tjitjon'mo ohotakhaliha; onowela ekoryaaka. ⁵ Simeao ni Levi ntthu ni mwamun'nawe. Ekatanatjaya tjowoopiha. ⁶ Nrimaaka ohikele mwatjoohimyatjaa. Akin'hala okhala nmithukumanoniwinhu, kontha nrimaaka ohomaalelyaa mwaha woyeeyo. Kontha ahowiivatja atthu. Yaahothikilatja metto tjomope. ⁷ Orussiyawaa okhale wootakhalihiya, kontha waari woolipa, ni orussiyawaa waari woolipa. Kinaahala waakawaniha wa Jaco ni waamwaressela wa Israel. ⁸ Juda, assun'naa anaahala woovuwiha. Ntatanaa nin'hala okhala naawananyaa. Assaana aathumwanaa anaahala wookokhorela. ⁹ Juda ntthu owoopiha. Ohokhwitiri tjoopankalyaawe, mwaamwanaka. Nooromale, aahokhala phanka kharamu. Tupani aahala onwehaweha? ¹⁰ Nopo khun'hala okhuma oJuda, wala oweryawawe khunkhumatho n'nhaaniwawe, npaka wan'waawe Silo. Atthu anaahala owiiwelela. ¹¹ Weeraawe atthukaka enamaawe nmattani yaathanliye, yena naahala okussa ekuwotjawe ninlayanawe nmaatjini mouuva. ¹² Meethwaawe an'hala okhala ooriipa nimeenuwaawe ootteela phanka eleeti. ¹³ Zebulom n'hala okhala nphantte nkhwaawe. Yena n'hala okhala nipuro noweemela anaviyu ni tjoovaratjawe tjin'hala okhala npaka oSidom. ¹⁴ Issacar ntthu oolipa, aariheliye wantjitjini wopwittipwitthi. ¹⁵ Yena nahoona nipuro noomumula niilapo yontjivela. Naahala ovaha makhataawe i nawiivahenra nmitekoni. ¹⁶ Da naahala waalamula atthwaawe nloko nimotja nimotja naIsrael. ¹⁷ Da n'hala okhala phanka enuaa nkurukuru niiparapaara, enuaa enluma ekotjokotjo yokavalo, ni tjitjon'mo enanvulussa nameettiha ekavalweeyo. ¹⁸ Kinanriiha okoopolawinhu, aPwiya. ¹⁹ Gade, naahala okhumenliya naanakavalo, massi yena n'hala waaluma ekotjokotjotjaya. ²⁰ Eyoolya ya Aser en'hala okhala yintji, ni naahala oruwerya ventji. ²¹ Naftali ntthu ootaphwuwatja ni naahala pkhalana asaana ooreera. ²² Jose nri wowiima mihokorokho, waattaman'na nro, tjuunuwaka woottharan'na. ²³ Naahala okhumenliya naanamattheere. ²⁴ Nrekonawe ninaahala okhala noolipa nimatataawe anaahala okhala ooreera mwaha womatata okuru aJaco ni mwaha wontjina nan'hakheli, mwala waIsrael. ²⁵ Nluku aathumwanaa naahala wookhavihera ni Nluku oowerya tjooteene naahala wooreeriha ni tjooreerihiya tjowiirimu, tjooreerihiya tjowinssera tjinkhala vathi ni ooreeriha nmirimani. ²⁶ Tjooreerihiya tjaathumwanaa tjin'hala okhala tjuulupale ovirikana tjooreerihiya tjomwaako tjokhalayi wala tjitthu tjoopheelessiya tjoohimala. Ayenatja an'hala okhalatja omuruni wa Jose, tjooreerihiya tjinkhala wiimuru wayoole aari nkhulupale aassihimaawe. ²⁷ Benjamim mwalapwa muulupale. Owitjissu, n'hala okhuura, ni ohiyu, n'hala okawaniha tjookussatjawe. ²⁸ Ala phamaloko khuuminameeli aIsrael. Phaahimeeryatjiyaaya naathumwanaya owakathi waareerihatjalyaawe. Khula ntthu aareerihiye niinan'naawe. ²⁹ Vano, yena aahowiirelatja: Nmaphiyaaruni, kinaarwaa waatthwaaka. Nkissikhe naamutjaaka munlikittini niri ematta yoEfrom, ³⁰ nikhuku niri oMacpela, waattamenla oManre, elapo yooCanaa, nipuro nithualyaawe Abraao naEfrom, wiira ossikhaniye. ³¹ Vaavale, aahossikhiya Abraao ni Sara, amwaarawe; vaavale, ayenatja yaahonssikha Isaque ni Rebeca, amwaarawe; ni vaavale kaahossikha Lia. ³² Nipuro ninlikitti naaryaaya naathumiye naatthu oHete. ³³ Jaco wamalihalyaawe waahimeeryatja assaanaawe, aahokumiha enhaatjawe vakorini ni aahiittha ephumu tjookhitjera ni aahorwaa waassimutjaawe.