¹ Tjinavirale tjitthun'nha, naawiiha nipha ni namwaapyaatja amwene owiigiipitu yaahonveehatja funtyaaya, mwene owiigipitu. ² Farao aahotikinihiya naakhulupalyaawe ooyeeli. ³ Yena aahaatthukelatja. nkhattyaa mon'mo mwaatthukeliyaawe Jose. ⁴ Nkhulupale aahon'vahatjera Jose wiira anvarele nteko. Yaahokhala nkhattya owakathi mwintji. ⁵ Ooyeeli yaaholohatja anaritji nkhattyaa khula ntthu aaholoha nttoranawe, ohiyu n'motja ni khula nttora naahimya etthwaaya. ⁶ Jose warwaalyaawe waawehatja owitjissu, aahowoona wiira yaanaatjukulatja. ⁷ Yena aahaakoha akhulupale aFarao yaarinaawe nkhattyaa: Essiyani olelo otjukulatjaka? ⁸ Ayenatja yaahaakhulatja: Ninooloha ohiyu ni khaavo nkhwitiri otaphulela. Jose aahowiirelatja: Tjootaphulelan'nho khatjinakhala tjaNluku? Sontte nkittonkelatje. ⁹ N'motjoole aahonttonkela yoolohaawe Jose iiraka: Kilohale, nri n'motja onari ohoolowaka. ¹⁰ Munrinin'mo, tjaahaavo eritta tthaaru. Weeraaya tjiphuwaka, tjaaniima mihokorokho tjoottokottha. ¹¹ Etthuvo ya Farao yaari nmatataniwaka. Mi kaahokussa mohokorokho waamela ntthuvoni mwa Farao ni kaahon'hokolossera nmatataniwawe. ¹² Jose aahomwiirela: Yootaphuleliya wayoolohiyeeyo phiila: Eritta tthaarun'nho mahuku mararu. ¹³ N'hina womahuku mararu yaayo, Farao naahala okussa murwaa ni naahala woorunussa, okhalaihaka phanka nkhulupalyaawe. Onaahala okussa etthuvo ya Farao ni ovarelaka nteko nmatataniwawe, phanka vaavale tjanvarelaa. ¹⁴ Massi okuupuwele tjitthu tjooteene tjooreeravale; kinawoolepela, okuulumelaka wa Farao ni okikumihe nkhattyaamu. ¹⁵ Weekhweeli, kaavariye elapo yomeebreu. Hata moomu akiiraleetthu woopheela otthukeliya. ¹⁶ Nlopwana nkhwaawe woonalyaawe wiira yoolohaawe yaahotaphuleliya, aahomwiirela Jose: Nimi kihaana yooloha, kaahoona etthuttu tthaaru tjophaawu vamuruwaka. ¹⁷ Etthuttu yontjulu, yaahaana khula enan'na tjowoossiya tja Farao, massi enuni tjaaholya tjaari vamuruwaka. ¹⁸ Jose aahomwaakhula ni aahiira: Yootaphuleliyaaya phiila: Etthuttu tthaaru mahuku mararu. ¹⁹ N'hina womahuku mararu, Farao naahala okussa murwaa ni onaahala otthukatjeriya wanrini ni enuni tjinaahala olyaerutthwaa. ²⁰ Nihuku noneeraru, Naari nihuku naayariyaawe Farao. Yena aahopanka essukuhuulu waanantekwaawe ooteene. ²¹ Yena aahomwaakha ekhulupalyaawe ohoolo waanantekwaawe. ²² Yena aahorehenrya ekhulupalyaawe ni aaheessa etthuvo nmatatani mwa Farao. Massi yena aahon'variha nlopwanoole, phanka Jose tjaahimeeryatjalyaaya. ²³ Massi nlopwanoole khaamuupuwenletho Jose; aahonliyala.