¹ Vano, enua yaahaana ethapiya woovirikana niinama tjikhwaawe Nluku tjunpalyaawe. Ni yaahokohiya athiyana: Khweeli Nluku iirale: Ohikhale nri onpheeleenhu olya won'mattani? ² Nthiyana aahaakhula enua: Ninaalya wakhula nri on'mattani, ³ massi nihilye n'hokorokho wonri ori eriyari ematta, kontha Nluku hohimya: N'hilye wala, n'hikwanhe, n'naahala okhwa. ⁴ Enua yaahomwiirela nthiyana: Khan'nohala okhwa, ⁵ kontha Nluku naatjuwela wiira, nihuku nin'haleenhu olya, meethweenhu anaahala ohulya, ni n'nohala okhala phanka Nluku, ntjuwelaka yootakhala ni yooreera. ⁶ Nthiyana woonalyaawe wiira nryuule waari ooreera olya, ni waapheelaawe okhala ootjuwelatja, aahokussa n'hokorokho aaholya, aahaavaha awan'nhawe ni yaaholya. ⁷ Meetho aatthu ooyeeli yaahotthukuwa ni yaahoonatja wiira ari matamata; yaahorukulatja mataakhuru moolupale ni yaahowaratja. ⁸ Yaahiiwatja ntju naNluku, iira eettaka n'mattani. Vano, nthiyana ninlopwanoole yaahiipithatja nimiri. ⁹ Nluku aahomwiiha nlopwana ni aahiira: Ori vai? ¹⁰ Ni nlopwana aahiira: Kinowiiwa ntjuuninhu ni kaahokhala owoova, kontha kaari matamata; vano, kaahiipitha. ¹¹ Nluku aahiira: Tupani oohimeeryale wiira waari matamata? Onoolya n'hokorokho wiiralyaaka ohilye? ¹² Nlopwana aahaakhula: Nthiyana kivahaleenhu nookivaha n'hokorokhooyo ni kihilya. ¹³ Nluku aahomwiirela nthiyana: Opankaleni? Nthiyana aahaakhula: Enua enookithepya nimi kiholya. ¹⁴ Nluku aahiirela enu: Opankenleni tjo, onaahala otakhalihiya weenema tjooteene on'hala weetta n'mirimaniwaa ni on'hala olya ntthupi okhuma elelo npaka ohoolo. ¹⁵ Kinaahala woopankela ewani naamwaaraa naatthu an'haleenhu waayara. Yena naahala orakaliha murweenhu ni n'naahala ohuva. ¹⁶ Ni nthiyana aahomwiirela: N'naahala ohuva tjinene mwiiyaraka; Otthunawinhu on'hala okhala waawan'nhinhu, massi yena n'hala woohoolelalni. ¹⁷ Ni nlopwana aahomwiirela: Ohowiiwelela amwaraa ni oholya n'hokorokho wonri wookhottihalyaaka, kiiraka: N'hilye, etthaya enaahala otakhalihiya mwaha wawaa, n'nohala ovara nteko tjinene woopheela olya, mahuku ooteene npaka onrweenhu. ¹⁸ Anaahala orikrika makhalelwaa. ¹⁹ N'nohala olya orettheelawinhu, npaka ohokoleela watthayani wakhumaleenhu. Kontha weetthaya ni watthayani onaahokoleela. ²⁰ Nlopwana aahowiihana amwaarawe ntjina na Eva, kontha ayena, yaari anumwanaya tjitthu tjooteene. ²¹ Nluku aahopanka ekuwo tjonttapala Arao naamwarawe yaahowaratja. ²² Nluku aahiira: Vano nlopwana aahokhala phanka hiivano, atjuwelaka yooreera ni yootakhala. Akin'hala otthuniha wiira alye nri weekumi ni akhalaka womahuku ooteene. ²³ Phimaana, Nluku ahaarihela ota wa Eden, wiira yalimeke etthaya yeeyo ekhumalyaaya. ²⁴ Vano, Nluku aahomoomola mlopwana, anamakhlenla nphantte nkhwaawe wa Eden niikatana yeemelale miphantte tjooteene, wiira akhalenle nri weekumi.