¹ Woopatjeroni, Nluku hunpa erimu niitthaya. Etthayeeyo yaari yoohiithu. ² Waanooripela n'maatjini, ni n'nepa waNluku waanokhala weettaka nmaatjini. ³ Nluku aahiira: Okhale nthuko. Ni nthuko waahoonyaa. ⁴ Ni Nluku aahoona wiira vaahoreera; vano , aahokawaniha woonyaa nooripela. ⁵ Nluku aahiihana woonyaa othana ni oripela ohiyu. Waahokhala owitjissu niwiila, nihuku noopatjera. ⁶ Ni Nluku aahiira: Maatji akawanyee. ⁷ Ni Nluku yuulumalyaawe yaahiiranyaa ni maatji yaahokawanyaa yaari vathi nintjulu. Ni waahiiranyaa. ⁸ Ni Nluku aahiihihana erimu. Waahokhala owitjissu niwiila, nihuku nonayeeli. ⁹ Ni Nluku aahiira: Akhale vamotja maatji ovathi worimu, ni okhale vohun'ma. Ni waahiiranyaa. ¹⁰ Nluku aahuumiha etthaya, ni otakanihatja womaatji, on'mapahari. Nluku aahoona wiira vahoreera. ¹¹ Ni Nluku aahiira: Ekhale etakhwa, nimiri tjowiima mihokorokho, phanka ekhalelwaaya, epyoo ekhaleke mun'hokorokhoni. Ni waahiiranyaa. ¹² Etthaya yaahaana etakhwa, phanka ekhalelwaaya, niimiri tjowiima mihokorokho epyootjaya tjaakhala mon'mo. Ni Nluku aahoona wiira vahoreera. ¹³ Waahokhala owitjissu niwiila, nihuku noneeraru. ¹⁴ Nluku aahiira: Woonyee wiirimu nookawaniha wiira okhale othana noohiyu; wiira tjikhale ethoonhero tjoottonka, mahuku nimyaakha. ¹⁵ Tjikhale mithuko wiirimu wiira tjimwaleeleke etthaya. Ni waahiiranyaa. ¹⁶ Nluku aahopanka mithuko miili tjuulupale: Muulupale oomwaleela othana ni mwankaani oomwaleela ohiyu. Ni aahunpa etthontto. ¹⁷ Nluku aaheessa wiirimu wiira tjimwaleele etthaya, ¹⁸ Tjoomwaleela othana ni ohiyu. Ni Nluku aahoona wiira vahoreera. ¹⁹ Waahokhala owitjissu niwiila, nihuku noneetjesse. ²⁰ Nluku aahiira: Tjikhale tjitthu tjintji tjikumi n'maatjini, ni enuni tjivaveke vatjulu votthaya, vathi wowiirimu. ²¹ Nluku aahunpa enama tjuulupale tjon'maatjini niinama tjikhwaawe tjinkhala nmaatjini, niikhalelwaaya; enuni tjooteene, niikhalelwaaya. Ni Nluku aahoona wiira vahoreera. ²² Ni Nluku aahoreeriha, iiraka: Nýaraneke, ni mwintjiveke nmaatjini tjonpahari. Enuni tjintjiveke vatthayani. ²³ Waahokhala Owitjissu niwiila, nihuku noneethanu. ²⁴ Ni Nluku aahiira: Etthayeeyo ekhalane khula etthu ekumi, hula etthu niikhalwaaya, enama tjowapuwani, enama tjontakhwani, nitjitthu tjikhwaawe tjikumi tjovatthayani; khula etthu niikhalelwaaya. Ni waahiiranya. ²⁵ Nluku hunpa enama tjontakhwani vatthayani, niikhalelwaaya, enama tjovapuwani, niikhalelwaaya, nitjitthu tjikhwaawe tjikumi tjovathi, niikhalelwaaya. Nluku aahoona wiira vahoreera. ²⁶ Ni Nluku aahiira: Nimunpe ntthu phanka ekhoveehu, oolikana nihi. Wiira yooyo ahoolele ehopa tjon'maatjini, enuni tjowiirimu, niinama tjooteene tjunpiye, etthaya yooteene ni wakhula etthu ekumi yovathi. ²⁷ Nluku aahomunpa ntthu weekhalelwaawe, ekhalelo ya Nluku aahunpa; nlopwana ninthiyana Nluku aahowunpa. ²⁸ Nluku aahaareeriha ni aahiira: N'yarihaneke ni mwintjiveke, vatthayani. N'hoolele ehopa tjooteene tjon'maatjini, enuni tjooteene tjowiirimu ni wakhula etthu ekumi eneetta vatthayani. ²⁹ Nluku aahiira: Kihoovahatjani miri tjooteene tjinima tjiri vatthayani nimri tjooteene tjiniima mihokorokho; phin'hala okhala eyoolyeenhu. ³⁰ Wonama tjooteene tjontakhwani, enuni tjooteene tjowiirimu, ni wakhula etthu ekumi eneetta vatthayani, ni wakhula yowunpiya erina ekumi yintji, nri wooteene on'hala wiima phun'hala okhala eyoolyeenhu. Waahiiranyaa tjitjon'mo. ³¹ Ni Nluku aahoona wiira tjooteene tjaapankalyaawe, tjaari tjoreera. Waahossa niwiila, nihuku nonasita.