¹ Mwaakha wowantjera wa Ciro, mwene oPersia, Apwiya yaahiiwa nuulumo na Jeremias ni yaahokhala nin'nepa wa Ciro, mwene oPirsia. Ntju na Ciro, naahiiwiya omwenyaawe wooteene. Yeeyo phayantikhiye ni yaahiiwiya: ² Ciro niira tjo, mwene oPersia: Apwiya Nluku owiirimu, ahokivaha omwene wooteene wovathi wiira kaatekele enupa oJerusalem, oJuda. ³ Wayoole wariinhu, ni Nluku phukhala niyena, awelaka oJerusalem, nkhala oJuda, ni atekaka enupa yaaPwiya, Nluku owiisrael, nkhala oJerusalem. ⁴ Atthu owoomwene wooteene, atthu ahanle elapweele akhalaka, ahaana akhalaka niiparatha, ewooru, enama, tjitjon'mo ni tjoovaha tjooreerela wonupa yaNluku oJerusalem. ⁵ Vano, yaahovuwa akhulupale aamutji aJuda ni aBenlamim, anankuttho naalevita ni ooteene yaari in'nepa waNluku woopheela oteka epoomaawe. ⁶ Ooteene yaakhala owaattaman'na yaahaakhavihera niiparatha, ewooru, enama, tjovaha tjooreerela nitjitthu tjikhwaawe. ⁷ Mwene Ciro aahowaana tjitthu npaani mwaaPwiya, tjen'nho Nabucodonosor tjaawaanalyaawe oJerusalem ni tjeessiyaka npaani mwaanlukwaawe. ⁸ Ciro, mwene oPersia, aahonvahatjera Mitredate, n'hakhu, wowiira anttonkele ni anvahatjere Sesbazar, n'hooleli ooJuda. ⁹ Phiphwanhaleehu mihakhun'nha: Epassiya talaathiini tjowooru, epassiya ekonto tjoparatha, myaalo ssiriini nakhentta, ¹⁰ mikhuki talaathiini tjowooru, mikhuki emiya tjesse wokhuumi tjooyevatja tjoparatha ni tjikhwaawe ekonto tjooyevayevatja. ¹¹ Tjooteene tjaahaavo ekonto thanu niimiya tjesse tjitthu tjowooru niiparatha. Sesbazar aahaawaana ooteene owakathi waakhumalyaya oBabilonia arwaaka oJerusalem.