¹ Festo aahokela nlaponi ni anavinreene mahuku mararu phaarwawe ocesarea ni ojerusalem. ² Nan'kuttho ni majudeu naatthu ookhuma mapuro makwawe yaahowaana tjowoottiya wa Festo amotheryaka Paulo. ³ Ni yaahon'lepela Paulo nin'swammaha wira amwiihane nattekussa, ni tjitjon'mo yaanaahala omwiiva ninttala. ⁴ Vano Festo aahaakhula wira Paulo aari nantthukiya ocesarea, ni yenani aanaahala okhuma naanaano arwaaka wonwo. ⁵ Phimaana yaale yaakootthuna yaahaana arwaaka nihiivano. Yakhala etthu yootakhala ninlopwanoola, n'motheryeke. ⁶ Ni yena nari naayenatja mahuku khuumi, aahokhuruwela Ocesareia; Ni nookomale okhttyaa nihuku nikhwaawe, aahorumiha wiira arwaaniye wa Paulo. ⁷ Niyena waawaawe, majudeu yaakhuma Ojerusalem yaahon'rukureerya, an'waanelaka Paulo tjtthu tjintji tjoomootheryatja, tjahaatthunaaya otteha, ⁸ Yena, aahiitjaakiha: Mi akikhottale ekettelo tjomajudeu, wala nkapela, wala ni Cesar, hateetthu. ⁹ Massi Festo, apheelaka waatjiveliha majudeu, amwaakhulaka Paulo, aahiira: We ompheela orwaa Ojerusalem okohakohiyaka tjitthun'nha ohoolowaka? ¹⁰ Ni Paulo aahiira: Mi kiri ohoolo wokhattyaa ya Cesar, on'halaaka okohakohiya; Khaavo njudeu n'motja npankalyaaka yootakhala, toko tjinkitjuweleenhu. ¹¹ Kontha wakhalaka wira ehaavo evan'ryaaka yootakhala, wala akhalaka wiira haavo mwiivalyaaka, mi akinkhotta okwa; Massi tjeehikhale tjitthu tjinkootteryaaya, hikhale n'kookirweeha waayenatja. Mi kinon'himeerya Cesar. ¹² Vano Paulo, niiwaleene tjoohimeeriya, ahaakhula: Mwaahon'himeerya Cesar; Ni wacesar n'naahala orwaa. ¹³ Anavirale mahuku vakaani, mwene Agripa ni Berenice yaahowaatja Ocesareia wiira an'ssalaameehe Festo. ¹⁴ Waakhanlyaaya mahuku mentji, Festo aahaahimeerya amwene mwaha wotjitthu tjiira Paulo, iiraka: Nlopwana n'motja hotthukeliya mwaha wo Felix. ¹⁵ Mwaha woyooyo, waaryaaka Ojerusalem, makhulupale aanan'kuttho ni mahumu omajudeu yaahowa waryaaka, avekelaka wiira yena akohakiye. ¹⁶ Woyaayo mi kihowaakhula wiira ehikhale elamalelo yomaromaano on'vaha ntthu nookhwe, hinaaya nootteriya okhala naatthu an'mootterya, ekhove niikhove, ni akhalane owakatti wiira iitjaakihe niyootteriyaawe. ¹⁷ Vano, anattukumanaleene, woohun'teeleliha, nihuku nikhwaawe, kinookomale nkhattyaa, kaahiira arweehiye wanlopwana. ¹⁸ Wa yoole akhulupale aanan'kuttho anari moomu, aawaaniye niiwootteriya nitjitthu tjahaanhiheraaka. ¹⁹ Ni yaahaanatja tjoopheela onkoha mwaha wotjitthu tjowaatjivelatjaya, ni ookhwa yesu, yoooyo Paulo anaamini wiira aahaavo mkumi. ²⁰ Nimi, nuutikinihiya akoona tjonkoha mwahoole, aahiira, iikohaka yena aapheela orwaa Ojerusalem, ni woowu ukhakohiya mwaha wotjitthun'nha. ²¹ Vano Paulo, nahimyale wira iissaattiye waanamakohakoha, kaahoruma wiira essaattiye, npaka waahalaaka on'vahenra wa Cesar. ²² Ni Agripa aahon'himeerya Festo: Nimi kaapheela omwiiwa nlopwanoola. Ni yena aahiira: Meelo n'naahala omwiiwa. ²³ Vano nihuku nikhwaawe, kaawa wagripa ni Berenice, nuutteeliya ventji, kirwaaka wiiwelela ni mahooleli naatthu oolupalessa oopooma, aahowaaniya wa Paulo wookumiha nuulumo Festo. ²⁴ Ni Festo aahiira: Mwene Agripa, naatthu ooteene ari nkhayi nihi, mun'nonweha nlopwanoola, atthu ooteene oojudeu, ojerusalem hata vaa, naakihimeeryaka, akhuwelaka wiira yena khankhalatho. ²⁵ Massi kinoonale wiira khiivo evaralyaawe woophwanela okhwa, ni yena nan'himeeryale n'hooleli, kaahoonela on'vahenra. ²⁶ Wayooyo akineetthu waleemotja yoopheela owantikhela apwiyaka; Kihon'waana ohoolowinhu; Akohakohiyaka, kooneke yowantikha. ²⁷ Kontha akinoona okhalela on'vahenra nantthukeliya, woohihimya etthekalyaawe.