¹ Paulo, aawehaka makhulupale aanamalaka, aahiira: Assuun'na, nimuupuwelelo wooreera wooteene kin'neetta ohoolo wamuluku npaka nihuku nolelo. ² Massi nkhulupale aananhuttho Ananias aahaaruma yaawaattaman'nalyaawe, wiira amwaatte. ³ Vano paulo aahomwiirela: Muluku naahala owaatta, essiri yootteelihiya. Onowookoma wiira okilamule tjin'himya ekettelo, ni mwaha wokettelo onrumiha wiira kaattiye? ⁴ Atthu yaari vaavale yaahiira: We onanruwana nankuttho amuluku? ⁵ Ni paulo aahiira; Mi akaatjuwela, assun'na, yena aari nankuttho; Kontha eri yowantikhiya: Khamun'hala wuuluma yootakhala wan'hooleli waatthweenhu. ⁶ Ni Paulo, atjuwelaka wiira nphantte nkwaawe yaari oohimirimatjaya ssaana, ni akhwaawe mafaritji, yena aahokhuwela wanamalaka muulupale: Assun'na mi kinfaritji, mwaana anfaritji; Mwaha woowehenra ni ovuwenla mwaatthu ookhwa ni kiniira kilamuliyaka. ⁷ Ni yena, wuulumatjalyaawe tjon'mo, waahaavo onhakulihanatjiya mafaritji naale oohireera nrima; Naatthu yaahokawanyaatja. ⁸ Kontha massaduceu aniira wiira wun'wenla khuuvo, hata nlaikha, massi mafaritji an'naamini. ⁹ Ni waahonhakuliya ventji, yaahovuwatja mayowantikha aamafaritji, yaanovaanhihatja yiiraka: Khanipwanhale wanlopwanoola hata yootakhala emotja, wakhalaka wiira n'nepa wala nlaikha nihuuluma niyena? ¹⁰ Ni onhakulihanatjiyaka ventji, n'hooleli, aahoova wiira paulo hittakatjiye naayenatja, ahaakurussa ankhotto, akumihatjaka eriyaryaayatja, anrweehaka nipuronoolipa. ¹¹ Ohiyu okhwaawe apwiya, wankhumenlalyaaya, yaahiira: On'novara yooreera, Paulo! Kntha tjitjon'mo tjaakivahalyaa namoona ojerusalem, tjitjon'mo ohopwanelatho wiira wan'vahe namoona oroma. ¹² Wassalyaaya, mafaritji akhwaawe yaahopanka etthu, ni yaaholuphatja mwaha wootakhalihiya, iiraka khayaalya wala owuurya woohimwiiva Paulo. ¹³ Ni yaahovikana arupayini yaaluphenle. ¹⁴ Yaayo yaahorwa npaka waakhulupale aana'nkuttho ni mahumu, yahiiratja: Niholuphela mwaha wootakhalihiya, wiira ehikhale en'haleehu ottehatteha woohimwiiva Paulo. ¹⁵ Vano nhuutja, wootakaneela anamalaka oolupale, muntjuwelihe n'hooleli wiira meelo oowiiheratjeni, toko tjaahaleenhu olakela onkohakoha ventji, yena hinaphiya, hi nihiitthinkomaniha woopheela omwiiva. ¹⁶ Mwana amwanrokorawe Paulo, wiiwalyaawe moolumwaala, aahowa ni aahokela nipuro noolipihatjiya, ni aahon'himeerya Paulo. ¹⁷ Ni Paulo, waamwiihanalyaawe, aahiira: Onkusse mwanlopwanoola onrweehe wan'hooleli, kontha yena haana etthu yoopheela woohimeeryani. ¹⁸ Vano yena aahonkussa, anrweehaka wan'hooleli, ni aahiira: Nantthukeliya Paulo, nakiihanale, aahokiirela wiira kowiihereni mwanlopwanoola, haana rtthu yoophela woohimeeryani. ¹⁹ Ni n'hooleli, wanvarenlalyaawe moono, arwaaka nipuro nootthonkokomanihiya, aahonkoha: Orinani yoopheela okihimeerya? ²⁰ Ni yena aahiira: Majudeu anoossikissanatja nlepeliye meelo wiira munkusse Paulo wanamalaka muulupale, wiira akohakohiye ventji. ²¹ Vano nhu, n'haakupalitji, kontha atthwaaya arupayini anontthonkomanihatjera nuulumo, yooyo mwaha wootakhalihiya aholuphela wiira ahilye wala ahiwurye ahimwiivale tooko, ni ayenatja ahotthonkomanihatja, mwanriihiyaka ekhuluvelihaleenhu. ²² Vano n'hooleli aahomwiirela mwanlopwana wiira orweeke, amwiirelaka: Hikhale non'himeerya wiira ohokitjuweliha tjitthun'nha. ²³ Ni hyena, wawiihanalyaawe atthweeli, aahowiirela: Waatthonkomanihe anakhotto emiya piili wiira arwee Ocesareia, naanakavalo ssapiini, anamavaka emiya piili, okhuma ewoora yonatthaaru yoohiyu. ²⁴ Ni ntthonkomanihe enama tjoopurula, wiira tjankussa Paulo, anpiihe nkumi wansatoro Felix. ²⁵ Ni yena aahantikheliya ewarakha, yaahimya moolumwaala: ²⁶ Claudio Lisias, essalamu tjnssatoro Felix. ²⁷ Nlopwnoola tthukeliye naamajudeu, apheelaka wiiviya, mi kiwaale naanakhotto ni kihonkussa, wahimeeriyaaka wiira aari nrooma. ²⁸ Nimi kipheelaka otjuwela etthu yaakossalyaawe, kaahon'rweeha wanamalakaayatja. ²⁹ Yooyo aakosseratjale mwaha wokettelotjaya, massi khiivo yaavaralyaawe yoopwanela okhwa wala otthukeliya. ³⁰ Wahimeeriyaaya wiira majudeu yiira apheelaka ohela etthu wanlopwanoole, wowaakuvyaatja kihon'wiiha wanhu, kaarumaka atthu yaamootherya wiira ohoolowinhu ahimyatje yaarinaaya niyena. Wiira nkhale nratta. ³¹ Anakhotto wankussalyaawe Paulo, toko tjaahimeeriyaaya, aahowaaniya ohiyu wooteene epooma yo Antipatride. ³² Orupossenliya, wan'hiyalyaawe arwaaka naanakavalo, yaahaakulela nipuro noolipihatjiya. ³³ Yaayo waaphyatjalyaaya Ocesareia, aavahiye ewarakha wanssatoro, aahothoonheriya tootho wa Paulo. ³⁴ Nssatoro, wassomalyaawe ewarakha, aahokohawiira yenankhuma epoomani, watjuwenlyaawe wiira aari Ocilicia, ³⁵ Aahiira: Kinaahala owiiwa yawavale atthu yawootherya. Ni aahorumiha wiira iissaathiye enupa ya Herodes.