¹ Paulo, murumeyi a Yesu Kristu, ithaneliwe okhala murummwa, othanleliwe wira alaleya mavyu a Muluku, ² Wopatheryani aharoromeliha variyari wa maprofeta mwa vyolempwa vyowarya, ³ Mwaha wa mwanawe ( Yowo variyari wa eruthu oyariwe mwa n'loko na David) ⁴ Ncvyo alaleriwe okhala mwana a Muluku nu owerya, mwaha wa munepa worera, mwa ohihimuwa wa alipa okwa, Yesu Kristu pwiyahu. ⁵ Mwaha wa yowo nihakela samahala ni okhala arummwa, wira niwelele ororomela wa atthu othene a Mulaponi mwaha wa n'sinanawe. ⁶ Mwaha wa yowo nyuwo mwinnithaaniwa wira mukhale a Yesu Kristu. ⁷ Othene nyuwo muri Oroma, ophentiwa ni Muluku, ni mwinithaniwa okhala orera, mwa nyuwo ophanyiwe samahala ni murethele variyari wa Muluku, thithahu, ni Apwiyahu Yesu Kristu. ⁸ Vopatherya, kinnimuxukuru Mulukwaka variyari wa Yesu Kristu, mwa nyuwo othene, okhala wira wamini wanyu onnilaleiwa mulaponi mothene. ⁹ Okhala wira Muluku, yowo miyo kinimurumelaka ni eroho aka kimulaleyaka mwanawe, yowo namunaka kihiparariki ni kiwupuwelakni nyuwo. ¹⁰ Kinnovekelelani okthi wothene miyo kinvekela wira wathuna niphiye nihiku ninweryaka vothuna wa Muluku kirye kothotoleni. ¹¹ Vekekhayi kinnithuna owonani wira kimaliherye wira kovaheni sovaha sikina sa eroho wira mukhale olipihiwa, ¹² Kirale wira ni miyo kikhale olipihiwa vamosa ni nyuwo ni wamini omosaru, ori wawinyu ni wawaka. ¹³ Amusi aka, n'kinthuna wira mutikine wira okathi munthene kinnithuna orya variyari vanyu (Masi kinnikhothihiwa mpwakha olelo), kathuna wira miyo kipwanye mihokorokho sikina variyari vanyu n'khama kapwannyaka ni amalapo akina. ¹⁴ Miyo ka mulipa olokihiwa n'nakhala Akeresiya ni Amalapo wala avyuweli wala ohivyuwela. ¹⁵ Tivo wa miyo, kiri olikanene wira kolaleryeni mavyu orera nyuwo tho munkhala Oroma. ¹⁶ Vekekhayi nkinuleliwa muru mwaha wa olaleya, thiri eri owerya wa Muluku wira yopowe atthu othene anamini, opatherya wene ayuda, nvyo numala maloko makina akeresiya. ¹⁷ Thiri olaleiwa wa ehapari ennoniherya exariya ya Muluku okuma wamini mphakha wamini; tivo watikiwaya: naxariya onokhala mwaha wa wamini. ¹⁸ Vekekhayi onanariwa wa Muluku onnikuma wirimu, wakuruwelaka atthu othene animukhotha, ehinettela exariya, enathukela ekekhayi mwa sotakhala saya. ¹⁹ Thiri etthu enwerya ovyuweliwa sa Muluku ti sowoneya wa yawo, okhala wira Muluku mwanene ohathonyerya. ²⁰ Thiri atthu anniwerya wona makhalelo ahinoneya, hata oMuluku awe ni owerya wawe okuma opatuxalyawe olumwenku sinnivyuweliwa nvyo sinnoneya variyari wa itthu opakalawe, tivo awo khanleveleleya. ²¹ Okhala wira, hata emuvyuwelaka Muluku, kiyamuthithiminhe n'toko Muluku n'nakhala kiyamuthapenle; ohiya vo athwelela mwa sothokolela saya sohiloka, ni siso murima aya wa elolo worowa mwepiphini. ²² Annikuwelela okhala asuweli, numala erine alolo, ²³ Nvyo ahakakanya n'thithimiho na elikanyihaka ni eratarato ya mutthu anikwa ni apalame, ni inama ni itthu sinipurula. ²⁴ Tivo, Muluku ahavaheryerya sothuna sa eruthu sanlelaya mirima saya, wira ehithithimiheiruthu saya ni ya mukwaya, ²⁵ Ahakakhanya exariya ya Muluku ni wotha, nvyo annikokorela ni annirumela itthu sipattuxiwe onvikana yelo opattunxe, yowo okhanle ottittimihiwa mahiku othene Amem! ²⁶ Mwaha wa itthu iya, Muluku ohavaheryerya sinasivela murima aya, thiri athiyana aya ahakakhanya elimalelo aya yorupihiwa ni axiyaya wa ephathu, enira sonanara sinvirikanya makkalelo a ephatthu. ²⁷ Nvyo onolathana ni mwettelo wa alopwana ahiya elimalelo ya warupiha axaraya wa ephattu, nvyo kuyasivelana orupihana mukina ni mukwawe, mulopwana ni mulopwana, yiraka sonanara numala ahakela mweruthuni mwaya ihikumu saphanela mwaha wa itampi saya. ²⁸ Nvyo okhala wira awo akotha omuvyuwela Muluku, numala Muluku yowo ahavaheryerya mupuwelo wonanara wira yireke itthu sowuliha muru. ²⁹ Numala awo asareya itthu sonanara sinthene: onanara murima; milili; olimalela sonanara; n'rima; wiva; owana; wotha; olavilavi; wotherya, ³⁰ Awo wasivela wapa; oruwana; awanani a Muluku; wisona; wikuxeryerya; okumiherya sotakhala; khaniwiwelela asipapaya, ³¹ Karino miruku; tohiroromeleya; khanaphenta akwaya; khanamorela ikharari akwaya. ³² Awo enamwi esuwelaka olamula wa Muluku( wira ale anira itthu sene seiyo annipwanela okwa), hata esuwelaka siso annikhalela nthithi sothakhala seiyo, votepa-tho annathothopela ale anira itthu seiyo.