¹ N'lopuana m'moza azimiya Ananias, ni muarawe Safira, yahitumiha n'thala nimoza, ² ni khuhavula n'zurukhu watumihanaliaya khuvitha (hata amuarawe yanizuwela yeyo). Yena ahikuxa n'zurukhu n'kina ni khuroana m'matatani warumei. ³ Vano, Pedro ahakoha: ''Ananias, exeni ozala xetuani varohoniwao wira othepie N'nepa Wowaria ni ohalane n'zurukhu n'kina otumihaliao nthala? ⁴ Wahiyale vohitumiha, khanaroa okhala nawao? Ni vano nutumiha, khawaroa wiriha entthunao? We wupuwelale zaietthunyo varohoniwao? Nyu khamuinthepiale atthu, muinthepiale N'luku''. ⁵ Nuwinwa ala molumoala Ananias ahimora ni khukhua. Wova wahakhumelela atthu otene yinwale eyo. ⁶ Ni yahivenha axilopuana khunkhunela, yahinkumihera ota khuroa khunsikha. ⁷ Ziviraka iwora ttharu, hata muarawe ahikela muenmue, ahizuwelaka yiraneale. ⁸ Pedro ahimuirela: ''Kihimerie wakhala wira wotumiha n'thalanne walani kavi?''. Yena ahakhula: ''Ayoni, kitumihale n'zurukhu ola''. ⁹ Vano, Pedro ahimuirela: ''Exeni nyu wiwanana othepia N'nepa Wowaria? Woneke, yasikhale amuannao taya ari vankhora voo ayena anamukuxa niweyano''. ¹⁰ Nannanoro yena himora ni khukhua, ni axilopuana yahiwaza khumphuanha onakhuale; yahinkumihera ota ni khunsikha watthamela namuannawe. ¹¹ Ni wova winjene wahapuanha atthu otene vanthukumanonivale ni hata atthu otene yinwale etthunye. ¹² Mithonhero ni mirira zinjene zanikhumelela eriyari yatthu m'matatani warumei. Ni ayenaze yathukumana m'puaro mua Salomao. ¹³ Yanukhalaru wira atthu yanafenta vinjene, khavo aweria otakanela nayena. ¹⁴ Ni yanunjererea okathi tukathi ale yankupali Pwiya, okhuma alopuana hata naathiyana, ¹⁵ hata nimarettha yanikuxiya oroaniya m'maphironi ni aheliyaka m'marepani m'matthokoni wira Pedro aviraka, n'nakhala erunkuawe yakhunele. ¹⁶ Hata aniwana atthu injene okhuma opoma ni m'mitthettheni woJerusalem, yawana marettha ni anamajini otakhala, ni otene yanivonihiya. ¹⁷ Vano m'holeli anankuttho ahivenha, ni otene ale yarinawe, (eyo phiyo, amasaduseu) ni yahaphuanha efitina ¹⁸ khuatthuka arumei, khuahela n'khatthea muaatthu. ¹⁹ Nuuhiyu, n'laikha naaPwiya nahitthukula mikhora zokhatthea, khuakumihera ota ni khuwirela: ²⁰ N'roazeke, muithonhihere m'pani waN'luku ni mualalieke molumo otene eekumi''. ²¹ Vinwaliaya eyo, yahikela m'pani waN'luku vaxaliaya ni khupajera osomiha. Vano, vawaliawe n'khulupale anankuttho naale yarinawe, yahilatthula n'thukumano, naamaholeli otene a etiini wa Israel ni khuwaniya anamasunkera okhattheia wira awaniye arumei. ²² anamasunkera yahiroaza m'pakha wuu, masi khayaaphuanhale n'khattheia, ni yahihokoliaza oroa ohimia: ²³ ''Niphuanhale ekhattheia enatthukiye nulipihiya sanene, nanamasunkera anemelale m'mamikhorani, masi vatthukulaliehu, khanimphuanhale hata ntthu''. ²⁴ Vano nkhulupale anamasunkera ompani waN'luku ni akhulupale anankuttho vinwaliaya molumoala, yahikhala otikinihiya niile yakhumelelale. ²⁵ Vano ahiwa ntthu ni khuahimeria: Alophuanale yahelalen'nhu n'khattheia ari m'pani waN'luku anasomiha atthu''. ²⁶ Vano n'holeli ahiroa nimakhulupale ni khuawana vohikhottho, maana yanawova atthu wavonhakaza. ²⁷ Ni, vano vawanaliaya, yaharoana wathukumaniye. N'khulupale ankuttho ahakoha, ²⁸ iraka: Nahuhimeriani sana wira muisomihetho n'zinanno, m'pakha vano, mozaliha eJerusalem ni zosomihazinhu ni muimphela n'nimuarexele ephomiawe n'lophuanole. ²⁹ Vano, Pedro ni arumei akhuawe yahakhula: ''Nintthuna omuinwelela N'luku vohikhala atthu. ³⁰ N'luku axipapehu on'hihimuxa Yesu, yole nyu omuinvalen'nhu, muinkhomelaka vamuinkimanho. ³¹ N'luku onweliha n'tatanawe calelia wira akhale N'khulupale ni Mopoli, wira avahe wituthuwa wa Israel ni oleveleliya wa etampi. ³² Nanamoni etthunya, ni n'va N'nepa Wowaria, N'luku onavahawe ale anMuiwelela''. ³³ Nuwinwiya eyo, ale yathukumanale yahinanariya khunaphela owinva arumei. ³⁴ Masi n'farizi m'moza azimiya Gamaliel, namazuwela a eketthelo, otthitthimihiya naatthu otene, ahivenha ni khuhimia wira arumeiale akuxiye aroaniye ota okathi vakani. ³⁵ Oholowaya khuwirela: ''alophuana awIsrael, mupuwele sana wa etthu emphelen'nhu owiriha axilopuanaala. ³⁶ Wa okathi ovirale, Teuda ahivenha iraka ari n'tthu, ni n'khalelo watthu, ophiyeraka emiya jexe, yahithukumana niyena. Yena ohokhua, ni otene yantthara amuariaza ni khamphuanhaniatho. ³⁷ Nuuvira eyo, Judas oGalileia, ahivenha mahiku apukhi, ni injene yahintthara. niyena ohokhua, ni ale otene yantthara amuariaza. ³⁸ Kinuhukeriani wira, m'winnhele atthuale ni muahiye, yakhala wira enirayeyo walayo tuwaatthu, onamala. ³⁹ Walani, wakhala waN'luku, n'hapuanhulazeni, okhala wira muinroa okhalaka muanaa muinwana niN'luku''. Ni voo ayena yahikupalizi.. ⁴⁰ Nu oholowaya, yahazimiya arumei, khuputthaziya, khuireliya wira ahilavuletho n'zina na Yesu, ni khireliya aroazeke. ⁴¹ Ayena yahihiya n'thukumano atthapaka okhala wira yahoneliya okhala anamakupali ohawa n'latthu wanzina naYesu. ⁴² Pata yazammo, wakhla mahiku, m'pani waN'luku ni m'mawani, yanisomiha nunlaleya Yesu, Mopoli.